911 ਵਿੱਚ ਮਾਰੇ ਗਏ ਲੋਕਾਂ ਨੂੰ ਨਿੱਘੀ ਸ਼ਰਧਾਂਜਲੀ ਭੇਟ ਕੀਤੀ ਗਈ

ਜਾਨ ਮਕੈਨ ਤੇ ਬਰਾਕ ਉਬਾਮਾ ਸਰਧਾ ਦੇ ਫੁੱਲ ਭੇਟ ਕਰਦੇ ਹੋਏ

ਅਮਰੀਕਾ ਦੇ ਵੱਖ ਵੱਖ ਸਹਿਰਾ ਵਿੱਚ 911 ਵਿੱਚ ਮਾਰੇ ਗਏ ਲੋਕਾਂ ਨੂੰ ਨਿੱਘੀ ਸ਼ਰਧਾਂਜਲੀ ਭੇਟ ਕੀਤੀ ਗਈ,ਦੋਨਾ ਪਾਰਟੀਆ ਦੇ ਰਾਸ਼ਟਰਪਤੀ ਦੇ ਉਮੀਦਵਾਰ ਜਾਨ ਮਕੈਨ ਤੇ ਬਰਾਕ ਉਬਾਮਾ ਨੇ ਗਰਾਉਡ ਜੀਰੋ ਤੇ ਜਾਕੇ ਸਰਧਾ ਦੇ ਫੁੱਲ ਭੇਟ ਕੀਤੇ। ਅਦਾਰਾ ਨਿਊਜ ਪੰਜਾਬ ਵੀ 911 ਨੂੰ ਮਾਰੇ ਗਏ ਲੋਕਾਂ ਨੂੰ ਨਿੱਘੀ ਸ਼ਰਧਾਂਜਲੀ ਭੇਟ ਕਰਦਾ ਹੈ

ਕੈਪਟਨ ਅਮਰਿੰਦਰ ਸਿੰਘ ,ਚੌ.ਜਗਜੀਤ ਸਿੰਘ ਅਤੇ ਹੋਰਾਂ ’ਤੇ ਪਰਚਾ ਦਰਜ
ਅਮਰਿੰਦਰ ਦੀ ਪਟੀਸ਼ਨ ’ਤੇ ਹਾਈ ਕੋਰਟ ਵੱਲੋਂ ਸੁਣਵਾਈ ਅੱਜ

ਚੰਡੀਗੜ੍ਹ, 11 ਸਤੰਬਰ -ਕੱਲ੍ਹ ਪੰਜਾਬ ਵਿਧਾਨ ਸਭਾ ਚੋਂ ਖਾਰਿਸ ਕਰ ਦਿੱਤੇ ਜਾਣ ਬਾਅਦ ਅੱਜ ਵਿਜੀਲੇਂਸ ਨੇ ਸਾਬਕਾ ਮੁੱਖ ਮੰਤਰੀ ਨੇ ਕੈਪਟਨ ਅਮਰਿੰਦਰ ਸਿੰਘ ਖਿਲਾਫ਼ ਜ਼ਮੀਨ ਘੁਟਾਲੇ ਦਾ ਕੇਸ ਦਰਜ ਕਰ ਦਿੱਤਾ। ਦੇਰ ਸ਼ਾਮ ਦਰਜ਼ ਕੀਤੇ ਗਏ ਇਸ ਪਰਚੇ ਅਮਰਿੰਦਰ ਸਿੰਘ, ਸਾਬਕਾ ਮੰਤਰੀ ਚੌਧਰੀ ਜਗਜੀਤ ਸਿੰਘ, ਘੁਟਾਲੇ ਨਾਂਲ ਸਬੰਧਿਤ ਕਲੋਨਾਈਜ਼ਰ, ਪੰਜਾਬ ਵਿਧਾਨ ਸਭਾ ਦੇ ਸਕੱਤਰ ਨਛੱਤਰ ਸਿੰਘ ਮਾਵੀ, ਪੰਜਾਬ ਵਿਧਾਨ ਸਭਾ ਦੇ ਡਿਪਟੀ ਸਕੱਤਰ ਸ. ਤਾਰਾ ਸਿੰਘ ਜਿਸ ਨੂੰ ਬਾਦਲ ਵਜਾਰਤ ਨੇ ਆਪਣੇ ਰਾਜ ਵਿੱਚ ਐਕਸਟੈਸ਼ਨ ਦਿੱਤੀ ਸੀ, ਦੇ ਨਾਂ ਦਰਜ ਹਨ। ਇਹ ਪਰਚਾ ਮੁਹਾਲੀ ਪੁਲਿਸ ਸਟੇਸ਼ਨ ’ਚ ਦਰਜ ਕੀਤਾ ਗਿਆ ਹੈ। ਜਦ ਕਿ ਪਹਿਲਾ ਇਹ ਅਫ਼ਵਾਹ ਚੱਲਦੀ ਰਹੀ ਇਹ ਪਰਚਾ ਅੰਮ੍ਰਿਤਸਰ ’ਚ ਦਰਜ ਕੀਤਾ ਗਿਆ। ਜ਼ਿਕਰਯੋਗ ਹੈ ਇਸ ਮਾਮਲੇ ਵਿੱਚ ਕੈਪਟਨ ਅਮਰਿੰਦਰ ਸਿੰਘ ਅਤੇ ਚੌਧਰੀ ਜਗਜੀਤ ਸਿੰਘ ਪਹਿਲਾਂ ਹੀ ਪੱਕੀ (ਬਲੈਕੈਡ) ਜ਼ਮਾਨਤ ਹੋ ਚੁੱਕੀ ਹੈ। ਜਦਕਿ ਬਾਕੀ ਪਰਚੇ ’ਚ ਦਰਜ ਵਿਅਕਤੀਆਂ ਨੂੰ ਕਿਸੇ ਵੇਲੇ ਵੀ ਗ੍ਰਿਫ਼ਤਾਰ ਕੀਤਾ ਜਾ ਸਕਦਾ ਹੈ। ਵਿਧਾਨ ਸਭਾ ਵਲੋਂ ਕੈਪਟਨ ਅਮਰਿੰਦਰ ਸਿੰਘ ਦੀ ਮੈਂਬਰੀ ਨੂੰ ਰੱਦ ਕੀਤੇ ਜਾਣ ਦਾ ਮਾਮਲਾ ਅੱਜ ਹਾਈਕੋਰਟ ਨੇ ਸੁਣਵਾਈ ਲਈ ਪਟੀਸ਼ਨ ਮਨਜ਼ੂਰ ਕਰ ਲਈ ਹੈ। ਇਸ ਕੇਸ ਦੀ ਸੁਣਵਾਈ ਭਲਕੇ 12 ਵਜੇ ਮੈਂਬਰੀ ਪੈਂਚ ਜਸਟਿਸ ਆਦਰਸ਼ ਕੁਮਾਰ ਗੋਇਲ ਤੇ ਅਜੇ ਤਿਵਾੜੀ ਵਲੋਂ ਕੀਤੀ ਜਾਵੇਗੀ।
ਜ਼ਿਕਰਯੋਗ ਹੈ ਕਿ ਅੰਮ੍ਰਿਤਸਰ ਇੰਪਰੂਵਮੈਂਟ ਟਰੱਸਟ ਦੀ 32.10 ਏਕੜ ਜ਼ਮੀਨ ਨੂੰ ਛੱਡਣ ਦੇ ਮਾਮਲੇ ਤੇ ਸਦਨ ਵਲੋਂ ਬਣਾਈ ਵਿਸ਼ੇਸ਼ ਕਮੇਟੀ ਦੀ ਰਿਪੋਟਰ ਨੇ ਬੀਤੇ ਦਿਨੀਂ ਕੈਪਟਨ ਅਮਰਿੰਦਰ ਸਿੰਘ ਦੀ ਮੈਂਬਰੀ ਰੱਦ ਕਰ ਦਿੱਤੀ ਸੀ, ਜਿਸ ਤੇ ਆਪਣੀ ਟਿੱਪਣੀ ਕਰਦਿਆਂ ਕੈਪਟਨ ਨੇ ਕਿਹਾ ਸੀ ਕਿ ਉਹ ਇਸ ਅਦੇਸ਼ ਦੇ ਖਿਲਾਫ ਹਾਈਕੋਰਟ ਦਾ ਦਰਵਾਜ਼ਾ ਖੜਕਾਉਂਣਗੇ ਯਾਦ ਰਹੇ ਕੈਪਟਨ ਨੂੰ ਬਚੇ ਹੋਏ ਸਾਢੇ ਤਿੰਨ ਸਾਲ ਲਈ ਮੁਅੱਤਲ ਕੀਤਾ ਹੈ। ਕੈਪਟਨ ਦੇ ਦੋਬਾਰਾ ਚੋਣ ਲੜਨ ਦੇ ਮਾਮਲੇ ਨੂੰ ਲੈ ਕੇ ਵੀ ਕਾਨੂੰਨੀ ਮਾਰਗ ਦੀ ਰਾਏ ਅਲੱਗ-ਅਲੱਗ ਹੋ ਮਾਹਿਰਾ ਅਨੁਸਾਰ ਮਾਮਲੇ ਦੀ ਹਾਈਕੋਰਟ ’ਚ ਸੁਣਵਾਈ ਦੌਰਾਨ ਉਨ੍ਹਾਂ ਦੀ ਮੈਂਬਰੀ ਬਹਾਲੀ ਵੀ ਹੋ ਸਕਦੀ ਹੈ ਜੇਕਰ ਹਾਈਕੋਰਟ ਮਾਮਲੇ ਤੇ ਸਟੇਅ ਆਰਡਰ ਜਲਦੀ ਕਰਦੀ ਹੈ। ਸੂਤਰਾਂ ਅਨੁਸਾਰ ਅੱਜ ਸਰਕਾਰ ਨੇ ਸਾਰੇ ਦਸਤਾਵੇਜ਼ ਤਿਆਰ ਕਰਨੇ ਸ਼ੁਰੂ ਕਰ ਦਿੱਤੇ ਹਨ ਜੋ ਹਾਈਕੋਰਟ ’ਚ ਪੇਸ਼ ਕੀਤੇ ਜਾਵੇਗਾ। ਪੰਜਾਬ ਦੇ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਵਿਧਾਨ ਸਭਾ ਦੀ ਮੈਂਬਰਤਾ ਰੱਦ ਕੀਤੇ ਜਾਣ ਤੋਂ ਇਕ ਦਿਨ ਬਾਅਦ ਅੱਜ ਇਸ ਫੈਸਲੇ ਖਿਲਾਫ਼ ਹਾਈਕੋਰਟ ਵਿਚ ਅਰਜ਼ੀ ਦਾਇਰ ਕੀਤੀ ਹੈ। ਉਨ੍ਹਾਂ ਆਪਣੀ ਅਰਜ਼ੀ ਵਿਚ ਮੈਂਬਰਤਾ ਰੱਦ ਕੀਤੇ ਜਾਣ ਦੇ ਫੈਸਲੇ ਨੂੰ ਅਣਉ¤ਚਿਤ ਦੱਸਦਿਆਂ ਕਿਹਾ ਕਿ ਇਹ ਫੈਸਲਾ ਗੈਰ ਕਾਨੂੰਨੀ ਅਤੇ ਅਸੰਵਿਧਾਨਿਕ ਹੈ। ਉਨ੍ਹਾਂ ਕਿਹਾ ਕਿ ਮੈਂਬਰਤਾ ਰੱਦ ਕੀਤੇ ਜਾਣ ਦਾ ਫੈਸਲਾ ਸੰਸਦੀ ਸਕੱਤਰ ਦੀ ਪ੍ਰਧਾਨਗੀ ਵਿਚ ਕੀਤਾ ਗਿਆ ਜੋ ਅਸੰਵਿਧਾਨਿਕ ਹੈ।ਵਰਣਨਯੋਗ ਹੈ ਕਿ ਕੱਲ੍ਹ ਕੈਪਟਨ ਅਮਰਿੰਦਰ ਸਿੰਘ ਦੀ ਵਿਧਾਨ ਸਭਾ ਮੈਂਬਰਤਾ ਸਾਢੇ ਤਿੰਨ ਸਾਲ ਲਈ ਰੱਦ ਕਰ ਦਿੱਤੀ ਗਈ ਸੀ। ਅਮਰਿੰਦਰ ਸਿੰਘ ਖਿਲਾਫ਼ ਇਹ ਕਾਰਵਾਈ ਪੰਜਾਬ ਵਿਧਾਨ ਸਭਾ ਸਪੀਕਰ ਵੱਲੋਂ ਹੋਈ। ਅਮਰਿੰਦਰ ਨੂੰ ਅੰਮ੍ਰਿਤਸਰ ਵਿਚ 32 ਏਕੜ ਜ਼ਮੀਨ ਘੋਟਾਲੇ ਵਿਚ ਸ਼ਾਮਿਲ ਹੋਣ ਦਾ ਦੋਸ਼ੀ ਪਾਇਆ ਗਿਆ ਹੈ। ਹਾਲਾਂਕਿ ਕੈਪਟਨ ਅਮਰਿੰਦਰ ਸਿੰਘ ਨੇ ਇਸ ਫੈਸਲੇ ਨੂੰ ਪੱਖਪਾਤੀ ਦੱਸਿਆ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਸਰਕਾਰ ਦੇ ਇਸ਼ਾਰੇ ’ਤੇ ਉਨ੍ਹਾਂ ਨੂੰ ਫਸਾਇਆ ਜਾ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਮੈਂ ਬੇਕਸੂਰ ਹਾਂ। ਮੇਰੇ ਖਿਲਾਫ਼ ਜਾਂਚ ਕਰਨ ਵਾਲੀ ਕਮੇਟੀ ਗੈਰ ਕਾਨੂੰਨੀ ਹੈ।

ਕੈਪਟਨ ਨੂੰ ਅਸੀਂ ਗ੍ਰਿਫਤਾਰ ਨਹੀਂ ਕਰਾਂਗੇ -ਬਾਦਲ

ਚੰਡੀਗੜ੍ਹ, 11 ਸਤੰਬਰ -ਪੰਜਾਬ ਦੇ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੂੰ ਗ੍ਰਿਫਤਾਰ ਨਹੀਂ ਕੀਤਾ ਜਾਵੇਗਾ। ਇਹ ਗੱਲ ਇੱਥੇ ਪੰਜਾਬ ਦੇ ਮੁੱਖ ਮੰਤਰੀ ਸ. ਪ੍ਰਕਾਸ਼ ਸਿੰਘ ਬਾਦਲ ਨੇ ਉਦੋਂ ਕਹੀ, ਜਦੋਂ ਇੱਕ ਪੱਤਰਕਾਰ ਨੇ ਪੁੱਛਿਆ ਕਿ ਹੁਣ ਸਰਕਾਰ ਦਾ ਕੈਪਟਨ ਅਮਰਿੰਦਰ ਸਬੰਧੀ ਅਗਲਾ ਕਦਮ ਕੀ ਹੋਵੇਗਾ? ਕੈਪਟਨ ਅਮਰਿੰਦਰ ਸਿੰਘ ਨੂੰ ਸਰਕਾਰ ਜਲਦੀ ਗ੍ਰਿਫਤਾਰ ਕਰੇਗੀ। ਇਸ ਤੇ ਮੁੱਖ ਮੰਤਰੀ ਸ. ਪ੍ਰਕਾਸ਼ ਸਿੰਘ ਬਾਦਲ ਨੇ ਕਿਹਾ ਕਿ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੂੰ ਨਾ ਸਰਕਾਰ ਨੇ ਗ੍ਰਿਫਤਾਰ ਕਰਨਾ ਹੈ ਤੇ ਨਾ ਹੀ ਸਰਕਾਰ ਦਾ ਕੋਈ ਅਮਰਿੰਦਰ ਸਿੰਘ ਨੂੰ ਗ੍ਰਿਫਤਾਰ ਕਰਨ ਦਾ ਇਰਾਦਾ ਹੈ। ਅਸੀਂ ਕਿਉਂ ਕੈਪਟਨ ਅਮਰਿੰਦਰ ਸਿੰਘ ਨੂੰ ਗ੍ਰਿਫਤਾਰ ਕਰੀਏ? ਕਾਨੂੰਨ ਆਪਣਾ ਕੰਮ ਕਰੇਗਾ। ਕਾਨੂੰਨ ਅਤੇ ਜੁਡੀਸ਼ਰੀ ਦੀ ਸਰਕਾਰ ਕਦਰ ਕਰਦੀ ਹੈ। ਇਸ ਤੋਂ ਬਾਹਰ ਨਹੀਂ ਜਾਂਦੀ।

ਭਾਈ ਚਤਰ ਸਿੰਘ ਜੀਵਨ ਸਿੰਘ ਫਰਮ ਦੇ ਪਾਰਸਲ ਵਿੱਚੋ ਚਾਰ ਕਿਲੋਗ੍ਰਾਮ ਤੋਂ ਵੱਧ ਹੈਰੋਇਨ ਫੜੀ

ਅੰਮ੍ਰਿਤਸਰ, 11 ਸਤੰਬਰ -ਲੱਗਭਗ 22 ਕਰੋੜ ਰੁਪਏ ਦੇ ਮੁੱਲ ਦੀ ਚਾਰ ਕਿਲੋਗ੍ਰਾਮ ਤੋਂ ਵੱਧ ਹੈਰੋਇਨ ਫੜੇ ਜਾਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਕਰੀਬ ਡੇਢ ਸਦੀ ਤੋਂ ਦੁਨੀਆਂ ਭਰ ਦੇ ਸਿੱਖਾਂ ਨੂੰ ਸਿੱਖ ਧਰਮ ਨਾਲ ਸਬੰਧਿਤ ਧਾਰਮਿਕ ਸਾਹਿਤ, ਗੁਰਬਾਣੀ ਦੇ ਗੁਟਕੇ ਅਤੇ ਹੋਰ ਵਡਮੁੱਲੀਆਂ ਵਸਤਾਂ ਵੇਚਣ ਤੇ ਸਪਲਾਈ ਕਰਨ ਵਾਲੀ ਅੰਮ੍ਰਿਤਸਰ ਦੀ ਮਸ਼ਹੂਰ ਫਰਮ ਭਾਈ ਚਤਰ ਸਿੰਘ ਜੀਵਨ ਸਿੰਘ ਇੱਕ ਵਾਰ ਮੁੜ ਵਿਵਾਦਾਂ ’ਚ ਘਿਰ ਗਈ ਹੈ। ਹਾਲਾਂਕਿ ਫਰਮ ਦੇ ਮਾਲਕ ਸ. ਹਰਭਜਨ ਸਿੰਘ ਨੇ ਆਪਣੀ ਕੰਪਨੀ ਤੇ ਪ੍ਰਬੰਧਕਾਂ ਨੂੰ ਨਿਰਦੋਸ਼ ਦੱਸਿਆ ਹੈ ਪਰ ਪ੍ਰਾਪਤ ਸੂਚਨਾ ਅਨੁਸਾਰ ਉਂਕਤ ਫਰਮ ਦਾ ਪਰਸਲ ਜਿਸ ਵਿੱਚ ਧਾਰਮਿਕ ਸੀ. ਡੀਜ਼ ਸਨ, ਕੋਰੀਅਰ ਰਾਹੀਂ ਵਿਦੇਸ਼ ਭੇਜਿਆ ਗਿਆ, ਜਿਸ ਵਿੱਚੋਂ ਹੈਰੋਇਨ ਬਰਾਮਦ ਹੋਣ ਤੇ ਡਾਇਰੈਕਟਰ ਰੈਵਨਿਊ ਇੰਟਲੀਜੈਂਨਸ ਅਤੇ ਕਸਟਮ ਦੇ ਅਧਿਕਾਰੀਆਂ ਨੇ ਉਕਤ ਫਰਮ ਦਾ ਹੋਟਲ ਸੀ. ਜੇ. ਚਤਰ ਸਿੰਘ ਜੀਵਨ ਸਿੰਘ ਜੋ ਸਚਖੰਡ ਸ੍ਰੀ ਹਰਮਿੰਦਰ ਸਾਹਿਬ ਦੇ ਬਿਲਕਲ ਨੇੜੇ ਪੁਰਾਣੇ ਮੋਚੀ ਬਜ਼ਾਰ ਵਿੱਚ ਸਥਿਤ ਹੈ ਸਮੇਤ ਮਾਈ ਸੇਵਾ ਬਜ਼ਾਰ ਵਿਚਲੀ ਵੱਡੀ ਦੁਕਾਨ ਅਤੇ ਰਿਹਾਇਸ਼ ਦੀ ਅੱਜ ਕਈ ਘੰਟੇ ਬਰੀਕੀ ਨਾਲ ਤਲਾਸ਼ੀ ਲਈ। ਇਸ ਦੌਰਾਨ ਭਾਵੇਂ ਕੋਈ ਬਰਾਮਦੀ ਦਾ ਦਾਅਵਾ ਨਹੀਂ ਕੀਤਾ ਗਿਆ ਪਰ ਇਸ ਤਲਾਸ਼ੀ ਮੁਹਿੰਮ ਦੀ ਸ਼ਹਿਰ ਅਤੇ ਸ੍ਰੀ ਦਰਬਾਰ ਸਾਹਿਬ ਦੇ ਨੇੜਲੇ ਇਲਾਕਿਆਂ ’ਚ ਭਾਰੀ ਚਰਚਾ ਹੁੰਦੀ ਰਹੀ।
ਫਰਮ ਦੇ ਮਾਲਕਾਂ ਦੇ ਪਰਿਵਾਰ ਦੇ ਦੋ ਮੈਂਬਰਾਂ ਰਿਪਜੀਤ ਸਿੰਘ ਅਤੇ ਪ੍ਰਭਜੋਤ ਸਿੰਘ ਨੂੰ ਵੀ ਡੀ. ਆਰ. ਆਈ. ਵਲੋਂ ਹਿਰਾਸਤ ਵਿੱਚ ਰੱਖਕੇ ਪੁਛਗਿੱਛ ਕੀਤੀ ਜਾ ਰਹੀ ਹੈ। ਇਥੇ ਇਹ ਵਰਨਣਯੋਗ ਹੈ ਕਿ ਉਕਤ ਹੋਟਲ ਵਾਲੀ ਥਾਂ ਤੇ ਪਹਿਲਾਂ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੇ ਸਰੂਪਾਂ ਦੀ ਛਮਾਈ ਹੁੰਦੀ ਸੀ, ਪਰ ਸ੍ਰੀ ਅਕਾਲ ਤਖਤ ਸਾਹਿਬ ਦੇ ਹੁਕਮਾਂ ਕਿ ਛਪਾਈ ਅਤੇ ਸੰਗਤਾਂ ਨੂੰ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਸਿਰਫ ਸ਼੍ਰੋਮਣੀ ਕਮੇਟੀ ਤੋਂ ਹੀ ਮਿਲਣਗੇ। ਇਸ ਥਾਂ ਤੇ ਫਰਮ ਦੇ ਮਾਲਕਾਂ ਨੇ ਹੋਟਲ ਬਣਾ ਲਿਆ, ਜੋ ਸ੍ਰੀ ਦਰਬਾਰ ਸਾਹਿਬ ਦੇ ਨੇੜੇ ਹੋਣ ਕਰਕੇ ਬਹੁਤ ਚਲਦਾ ਹੈ। ਇਥੇ ਇਹ ਵੀ ਦੱਸਣਯੋਗ ਹੈ ਕਿ ਉਕਤ ਫਰਮ ਦੇ ਮਾਲਕਾਂ ਨੂੰ ਧਾਰਮਿਕ ਅਣਗਿਆ ਦੇ ਮਾਮਲੇ ਸ੍ਰੀ ਅਕਾਲ ਤਖਤ ਸਾਹਿਬ ਵਲੋਂ ਤਨਖਾਹ ਦੀ ਲਗੀ ਸੀ। ਹੈਰੋਇਨ ਪਕੜੇ ਜਾਣ ਨਾਲ ਇਹ ਮਾਮਲਾ ਇੱਕ ਵਾਰੀ ਮੁੜ ਭਖਣ ਦੇ ਆਸਾਰ ਹਨ। ਦੂਜੇ ਪਾਸੇ ਡੀ. ਆਰ. ਆਈ ਦੇ ਅਧਿਕਾਰੀ ਸ੍ਰੀ ਰਸਭੋਗੀ ਅਨੁਸਾਰ ਸਾਰੇ ਮਾਮਲੇ ਦੀ ਪੂਰੀ ਜਾਂਚ ਕੀਤੀ ਜਾ ਰਹੀ ਹੈ ਕਿ ਹੈਰੋਇਨ ਪਾਰਸਲ ’ਚ ਕਿੱਥੋਂ ਪਾਈ ਗਈ।

ਮਲੇਸ਼ੀਆ ‘ਚ ਦਲਜੀਤ ਸਿੰਘ ਧਾਲੀਵਾਲ ਸੈਨੇਟਰ ਬਣੇ

ਕੁਆਲਾਲੰਪੁਰ (ਮਲੇਸ਼ੀਆ), 11 ਸਤੰਬਰ -ਮਲੇਸ਼ੀਆ ਦੇ ਪੰਜਾਬੀ ਬਿਜ਼ਨੇਸ ਚੈਂਬਰ ਦੇ ਪ੍ਰਧਾਨ ਸ. ਦਲਜੀਤ ਸਿੰਘ ਧਾਲੀਵਾਲ (48) ਨੂੰ ਸੈਨੇਟਰ ਬਣਨ ਦਾ ਮਾਣ ਹਾਸਲ ਹੋਇਆ ਹੈ। ਉਨ੍ਹਾਂ ਨੂੰ ਕੱਲ੍ਹ ਦੀਵਾਨ ਨੇਗਾਰਾ ਪ੍ਰਧਾਨ ਡਾ. ਅਬਦੁਲ ਹਾਮਿਦ ਪਵਨਤੇਹ ਨੇ ਸਹੁੰ ਚੁਕਾਈ। ਅਮਰੀਕਾ ਦੀ ਯੂਨੀਵਰਸਿਟੀ ਆਫ਼ ਨਿਊ ਇੰਗਲੈਂਡ ਤੋਂ ਐਮ. ਬੀ. ਏ. ਦੀ ਡਿਗਰੀ ਪ੍ਰਾਪਤ ਸ. ਦਲਜੀਤ ਸਿੰਘ 1989 ‘ਚ ਉਦੋਂ ਹੀ ਸਰਗਰਮ ਸਿਆਸਤ ‘ਚ ਕੁੱਦ ਪਏ ਸਨ ਜਦੋਂ ਉਹ ਮਲੇਸ਼ੀਅਨ ਇੰਡੀਅਨ ਕਾਂਗਰਸ ਵਿੱਚ ਸ਼ਾਮਲ ਹੋਏ ਸਨ। ਉਹ 1990 ਤੋਂ ਹੁਣ ਤੱਕ ਤੇਲਾਵੀ ਕਾਂਗਰਸ ਦੇ ਚੇਅਰਮੈਨ ਰਹਿ ਚੁੱਕੇ ਹਨ ਅਤੇ ਉਹ 2005 ਤੋਂ ਕੇਂਦਰੀ ਸੰਘੀ ਮਲੇਸ਼ੀਅਨ ਇੰਡੀਅਨ ਕਾਂਗਰਸ ਦੇ ਮੈਂਬਰ ਵੀ ਹਨ। ਆਪਣੀ ਨਿਯੁਕਤੀ ‘ਤੇ ਖ਼ੁਸ਼ੀ ਦਾ ਪ੍ਰਗਟਾਵਾ ਕਰਦਿਆਂ ਸ. ਧਾਲੀਵਾਲ ਨੇ ਕਿਹਾ ਕਿ ਉਨ੍ਹਾਂ ਦੀ ਨਿਯੁਕਤੀ ਤੋਂ ਲਗਦਾ ਹੈ ਕਿ ਸਰਕਾਰ ਨੇ ਸਿੱਖਾਂ ਨੂੰ ਅੱਖੋਂ ਪ੍ਰੋਖੇ ਨਹੀਂ ਕੀਤਾ। ”ਮਲੇਸ਼ੀਆ ਦੇ ਸਿੱਖ ਇਸੇ ਛਿਣ ਦੀ ਚਿਰਾਂ ਤੋਂ ਉਡੀਕ ਕਰ ਰਹੇ ਸਨ ਕਿਉਂਕਿ ਬਹੁਤੇ ਸਿੱਖ ਮਲੇਸ਼ੀਅਨ ਇੰਡੀਅਨ ਕਾਂਗਰਸ ਨਾਲ਼ ਹੀ ਜੁੜੇ ਹੋਏ ਹਨ। ਇਹ ਭਾਰਤੀਆਂ ਦਾ ਵੀ ਮਾਣ ਹੈ।“

ਕੈਨੇਡਾ ਦੀਆਂ ਪਾਰਲੀਮੈਂਟ ਚੋਣਾਂ ਵਿਚ ਦੋ ਦਰਜਨ ਪੰਜਾਬੀ ਉਮੀਦਵਾਰ ਚੋਣ ਮੈਦਾਨ ‘ਚ ਨਿੱਤਰੇ

ਵੈਨਕੂਵਰ 9 ਸਤੰਬਰ -ਕੈਨੇਡਾ ਦੀਆਂ 14 ਅਕਤੂਬਰ ਨੂੰ ਹੋ ਰਹੀਆਂ ਹਨ,ਇਸ ਵਾਰ ਕੈਨੇਡਾ ਦੀਆਂ ਚੋਣਾਂ ‘ਚ ਦੋ ਦਰਜਨ ਪੰਜਾਬੀ ਮੂਲ ਦੇ ਉਮੀਦਵਾਰ ਵੱਖ ਵੱਖ ਪਾਰਟੀਆਂ ਵੱਲੋਂ ਆਪਣੀ ਕਿਸਮਤ ਅਜ਼ਮਾ ਰਹੇ ਹਨ।
ਸੁਨਣ ਵਿਚ ਇਹ ਵੀ ਆਇਆ ਹੈ ਕਿ ਕਈ ਪੰਜਾਬੀ ਉਮੀਦਵਾਰਾਂ ਵੱਲੋਂ 14 ਅਕਤੂਬਰ ਨੂੰ ਸ਼ੁਭ ਦਿਹਾੜਾ ਮੰਨਿਆ ਜਾ ਰਿਹਾ ਹੈ ਕਿਉਂਕਿ ਉਸ ਦਿਨ ਪੂਰਨਮਾਸੀ ਹੈ। ਵੱਖ ਵੱਖ ਚੋਣ ਸਰਵੇਖਣਾਂ ਅਨੁਸਾਰ ਪ੍ਰਧਾਨ ਮੰਤਰੀ ਸਟੀਫਨ ਹਾਰਪਰ ਦੀ ਕਨਜ਼ਰਵੇਟਿਵ ਪਾਰਟੀ ਦਾ ਹੱਥ ਕਾਫੀ ਉਪਰ ਦੱਸਿਆ ਜਾ ਰਿਹਾ ਹੈ। ਕੈਨੇਡਾ ਦੀ 40ਵੀਂ ਪਾਰਲੀਮੈਂਟ ਦੀਆਂ ਇਨ੍ਹਾਂ ਚੋਣਾਂ ਤੇ 300 ਮਿਲੀਅਨ ਡਾਲਰ ਖਰਚ ਆਵੇਗਾ। ਦਿਲਚਸਪ ਗੱਲ ਇਹ ਹੈ ਕਿ ਬੀਤੇ ਐਤਵਾਰ ਨੂੰ ਚੋਣਾਂ ਦਾ ਐਲਾਨ ਹੁੰਦੇ ਹੀ ਸਭ ਤੋਂ ਪਹਿਲਾਂ ਪੰਜਾਬੀ ਉਮੀਦਵਾਰਾਂ ਨੇ ਵੈਨਕੂਵਰ, ਟਰਾਂਟੋ ਇਲਾਕੇ ਵਿਚ ਰਾਤੋ ਰਾਤ ਆਪਣੇ ਸਾਈਨ ਬੋਰਡ ਸੜਕਾਂ ਤੇ ਗੱਡ ਦਿੱਤੇ। ਸਿਆਸੀ ਮਾਹਿਰਾਂ ਦਾ ਮੰਨਣਾ ਹੈ ਕਿ ਇਸ ਵਾਰ ਪੰਜਾਬੀ ਮੂਲ ਦੇ ਸਭ ਤੋਂ ਵੱਧ ਕਨਜ਼ਰਵੇਟਿਵ ਪਾਰਟੀ ਦੇ ਉਮੀਦਵਾਰ ਜਿੱਤਣਗੇ। ਪਿਛਲੀ ਲੋਕ ਸਭਾ ਵਿਚ 8 ਪੰਜਾਬੀ ਜਿੱਤੇ ਸਨ ਜਦ ਕਿ ਇਸ ਵਾਰ 10 ਤੋਂ 12 ਪੰਜਾਬੀ ਉਮੀਦਵਾਰਾਂ ਦੇ ਜਿੱਤਣ ਦੀ ਸੰਭਾਵਨਾ ਹੈ।
ਇਨ੍ਹਾਂ ਸੰਸਦੀ ਚੋਣਾਂ ਵਿਚ ਲਗਾਤਾਰ 5 ਵਾਰ ਐਮ ਪੀ ਬਣਨ ਵਾਲੇ ਪਹਿਲੇ ਦਸਤਾਰਧਾਰੀ ਸਿੱਖ ਐਮ ਪੀ ਅਤੇ ਮੋਗਾ ਜ਼ਿਲ੍ਹੇ ਦੇ ਪਿੰਡ ਚੁੱਘਾ ਕਲਾਂ ਦੇ ਜੰਮਪਲ ਸ: ਗੁਰਬਖਸ਼ ਸਿੰਘ ਮੱਲ੍ਹੀ ਛੇਵੀਂ ਵਾਰ ਬਰੈਮਲੀ-ਗੋਰ-ਮਾਲਟਨ ਹਲਕੇ ਤੋਂ ਚੋਣ ਮੈਦਾਨ ਵਿਚ ਕੁੱਦੇ ਹਨ। ਕੈਨੇਡਾ ਦੇ ਸਾਬਕਾ ਸਿਹਤ ਮੰਤਰੀ ਅਤੇ ਜ਼ਿਲ੍ਹਾ ਜਲੰਧਰ ਦੇ ਪਿੰਡ ਦੋਸਾਂਝ ਕਲਾਂ ਦੇ ਜੰਮਪਲ ਉਜਲ ਦੋਸਾਂਝ ਲਿਬਰਲ ਪਾਰਟੀ ਦੀ ਟਿਕਟ ਤੇ ਵੈਨਕੂਵਰ ਸਾਊਥ ਹਲਕੇ ਤੋਂ ਤੀਸਰੀ ਵਾਰ ਚੋਣ ਲੜ ਰਹੇ ਹਨ। ਕੈਨੇਡਾ ਦੀ ਪਾਰਲੀਮੈਂਟ ਵਿਚ ਜਿੱਤਣ ਵਾਲੀ ਪਹਿਲੀ ਪੰਜਾਬਣ ਮੈਂਬਰ ਪਾਰਲੀਮੈਂਟ ਦਾ ਮਾਣ ਹਾਸਲ ਕਰਨ ਵਾਲੀ ਤੇ ਜ਼ਿਲ੍ਹਾ ਸੰਗਰੂਰ ਦੇ ਪਿੰਡ ਟੱਲੇਵਾਲ ਦੀ ਜੰਮਪਲ ਬੀਬੀ ਨੀਨਾ ਗਰੇਵਾਲ ਫਲੀਟਵੁੱਡ-ਪੋਰਟਕੈਲਜ (ਸਰੀ) ਤੋਂ ਕਨਜ਼ਰਵੇਟਿਵ ਪਾਰਟੀ ਦੀ ਟਿਕਟ ਤੇ ਤੀਸਰੀ ਵਾਰ ਚੋਣ ਲੜ ਰਹੇ ਹਨ ਜਿਨ੍ਹਾਂ ਦੇ ਚੋਣ ਦਫਤਰ ਦਾ ਬੀਤੇ ਸੋਮਵਾਰ ਪ੍ਰਧਾਨ ਮੰਤਰੀ ਦੀ ਧਰਮ ਪਤਨੀ ਲੋਰੀਨ ਹਾਰਪਰ ਨੇ ਕੀਤਾ। ਸਰੀ ‘ਚ ਪੰਜਾਬੀਆਂ ਦੀ ਸੰਘਣੀ ਵਸੋਂ ਵਾਲੇ ਨਿਊਟਨ-ਨਾਰਥ ਡੈਲਟਾ ਹਲਕੇ ਤੋਂ ਜ਼ਿਲ੍ਹਾ ਲੁਧਿਆਣਾ ਦੇ ਪਿੰਡ ਸੂਜਾਪੁਰ ਦੇ ਜੰਮਪਲ ਸੁੱਖ ਧਾਲੀਵਾਲ ਲਿਬਰਲ ਪਾਰਟੀ ਦੀ ਟਿਕਟ ਤੇ ਤੀਸਰੀ ਵਾਲ ਆਪਣੀ ਕਿਸਮਤ ਅਜ਼ਮਾ ਰਹੇ ਹਨ। ਉਨ੍ਹਾਂ ਦਾ ਮੁੱਖ ਮੁਕਾਬਲਾ ਜ਼ਿਲ੍ਹਾ ਲੁਧਿਆਣਾ ਦੇ ਹੀ ਰਾੜਾ ਸਾਹਿਬ ਨੇੜਲੇ ਪਿੰਡ ਘਲੋਟੀ ਦੇ ਕੈਨੇਡੀਅਨ ਜੰਮਪਲ ਨੌਜੁਆਨ ਕਨਜ਼ਰਵੇਟਿਵ ਪਾਰਟੀ ਦੇ ਸੰਦੀਪ ਪੰਧੇਰ ਨਾਲ ਹੋਵੇਗਾ। ਸੰਦੀਪ ਪੰਧੇਰ ਕੈਨੇਡਾ ਦੇ ਸਾਬਕਾ ਕੇਂਦਰੀ ਮੰਤਰੀ ਹਰਬ ਧਾਲੀਵਾਲ ਦੇ ਨਿੱਜੀ ਸਕੱਤਰ ਰਹਿ ਚੁੱਕੇ ਹਨ ਤੇ ਪਹਿਲੀ ਵਾਰ ਚੋਣ ਮੈਦਾਨ ਵਿਚ ਨਿੱਤਰੇ ਹਨ। ਇਸ ਹਲਕੇ ਵਿਚ ਪੰਜਾਬੀਆਂ ਦੀ 40 ਪ੍ਰਤੀਸ਼ਤ ਵੋਟ ਹੈ।
ਵੈਨਕੂਵਰ ਇਲਾਕੇ ‘ਚ ਰੀਅਲ ਅਸਟੇਟ ਦੀ ਦੁਨੀਆਂ ਦੇ ਪਿਤਾਮਾ ਵਜੋਂ ਜਾਣੇ ਜਾਂਦੇ ਤੇ ਉਘੀ ਰੀਅਲ ਅਸਟੇਟ ਕੰਪਨੀ ‘ਰੋਇਲ ਗਰੁੱਪ ‘ ਦੇ ਕਰਤਾ ਧਰਤਾ ਸੈਮ ਰੱਖੜਾ ਬਰਨਬੀ-ਨਿਊਵੈਸਟ ਮਿਨਸਟਰ ਹਲਕੇ ਤੋਂ ਕਨਜ਼ਰਵੇਟਿਵ ਉਮੀਦਵਾਰ ਹਨ। ਜ਼ਿਲ੍ਹਾ ਮੋਗਾ ਦੇ ਪਿੰਡ ਕਪੂਰੇ ਦੇ ਜੰਮਪਲ ਸੈਮ ਰੱਖੜਾ ਪਹਿਲੀ ਵਾਰ ਚੋਣ ਲੜ ਰਹੇ ਹਨ। ਕੈਲਗਰੀ ਦੇ ਉਘੇ ਵਕੀਲ ਤੇ ਬਰਨਾਲਾ ਸ਼ਹਿਰ ਦੇ ਜੰਮਪਲ ਦਵਿੰਦਰ ਸ਼ੋਰੀ ਕਨਜ਼ਰਵੇਟਿਵ ਪਾਰਟੀ ਦੀ ਟਿਕਟ ਤੇ ਕੈਲਗਰੀ ਨਾਰਥ ਈਸਟ ਤੋਂ ਪਹਿਲੀ ਵਾਰ ਚੋਣ ਮੈਦਾਨ ‘ਚ ਨਿੱਤਰੇ ਹਨ। ਉਨ੍ਹਾਂ ਦਾ ਮੁੱਖ ਮੁਕਾਬਲਾ ਲਿਬਰਲ ਪਾਰਟੀ ਦੇ ਸਨਮ ਕੰਗ ਨਾਲ ਹੋਵੇਗਾ। ਦਵਿੰਦਰ ਸ਼ੋਰੀ ਬਰਨਾਲੇ ਦੇ ਉਘੇ ਪਰਜਾ ਮੰਡਲੀਏ ਰਹੇ ਸਵਰਗੀ ਪੰਡਿਤ ਬਿੰਦਰਾਵਨ ਸ਼ੋਰੀ ਦੇ ਸਪੁੱਤਰ ਹਨ। ਉਘੇ ਕਨਜ਼ਰਵੇਟਿਵ ਆਗੂ ਦੀਪਕ ਉਬਰਾਏ ਕੈਲਗਰੀ ਤੋਂ ਚੌਥੀ ਵਾਰ ਆਪਣੀ ਕਿਸਮਤ ਅਜ਼ਮਾ ਰਹੇ ਹਨ। ਦਿੱਲੀ ਦੇ ਜੰਮਪਲ ਦੀਪਕ ਉਬਰਾਏ ਪਿਛਲੀ ਹਾਰਪਰ ਸਰਕਾਰ ਵਿਚ ਸੰਸਦੀ ਸਕੱਤਰ ਰਹਿ ਚੁੱਕੇ ਹਨ।
ਕਨਜ਼ਰਵੇਟਿਵ ਪਾਰਟੀ ਦੀ ਟਿਕਟ ਤੇ ਜ਼ਿਲ੍ਹਾ ਲੁਧਿਆਣਾ ਦੇ ਕਸਬਾ ਬੱਸੀਆਂ ਨਾਲ ਸਬੰਧਿਤ ਕੈਨੇਡੀਅਨ ਜੰਮਪਲ ਦਸਤਾਰਧਾਰੀ ਸਿੱਖ ਨੌਜੁਆਨ ਟਿਮ ਉਪਲ ਐਡਮਿੰਟਨ-ਸ਼ੇਰਵੁੱਡ ਪਾਰਕ ਹਲਕੇ ਤੋਂ ਟੋਰੀ ਉਮੀਦਵਾਰ ਹਨ। ਇਸ ਨਵੇਂ ਹਲਕੇ ਤੋਂ ਉਨ੍ਹਾਂ ਆਪਣਾ ਚੋਣ ਪ੍ਰਚਾਰ ਸ਼ੁਰੂ ਕਰ ਦਿੱਤਾ ਹੈ। ਐਡਮਿੰਟਨ ਬੋਮੌਂਟ ਹਲਕੇ ਤੋਂ ਇੰਦਰਾ ਕੌਰ ਸਰੋਆ ਲਿਬਰਲ ਉਮੀਦਵਾਰ ਹਨ ਜਦ ਕਿ ਐਡਮਿੰਟਨ ਤੋਂ ਹੀ ਰਹੀਮ ਜਾਫਰ ਕਨਜ਼ਰਵੇਟਿਵ ਪਾਰਟੀ ਦੇ ਉਮੀਦਵਾਰ ਹਨ। ਬ੍ਰਿਟਿਸ਼ ਕੋਲੰਬੀਆ ਦੇ ਨਿਊਟਨ-ਨਾਰਥ ਡੈਲਟਾ ਅਤੇ ਅਲਬਰਟਾ ਸੂਬੇ ਦਾ ਕੈਲਗਰੀ ਨਾਰਥ ਈਸਟ, ਬਰੈਂਪਟਨ-ਸਪਰਿੰਗਡੇਲ ਅਤੇ ਮਿਸੀਸਾਗਾ ਬਰੈਂਪਟਨ ਸਾਊਥ ਚਾਰ ਅਜਿਹੇ ਹਲਕੇ ਹਨ ਜਿਥੇ ਪੰਜਾਬੀ ਮੂਲ ਦੇ ਉਮੀਦਵਾਰਾਂ ਦਾ ਸਿੱਧਾ ਮੁਕਾਬਲਾ ਹੈ। ਇਨ੍ਹਾਂ ਚੋਣਾਂ ਵਿਚ ਕਈ ਨਵੇਂ ਉਮੀਦਵਾਰ ਵੀ ਸਾਹਮਣੇ ਆ ਰਹੇ ਹਨ।
ਮਿਸੀਸਾਗਾ ਬਰੈਂਪਟਨ ਸਾਊਥ ਤੋਂ ਅੰਮ੍ਰਿਤਧਾਰੀ ਐਮ ਪੀ ਨਵਦੀਪ ਸਿੰਘ ਬੈਂਸ ਦੇ ਮੁਕਾਬਲੇ ਇਸ ਵਾਰ ਪਾਕਿਸਤਾਨੀ ਮੂਲ ਦੀ ਪੰਜਾਬਣ ਸਲਮਾ ਕਨਜ਼ਰਵੇਟਿਵ ਪਾਰਟੀ ਦੀ ਉਮੀਦਵਾਰ ਹੈ ਜੋ 28 ਸਾਲਾਂ ਤੋਂ ਕੈਨੇਡਾ ਵਿਚ ਰਹਿ ਰਹੀ ਹੈ ਅਤੇ 18 ਸਾਲ ਤੋਂ ਰੀਅਲ ਅਸਟੇਟ ਏਜੰਟ ਵਜੋਂ ਕੰਮ ਕਰ ਰਹੀ ਹੈ। ਉਹ ਇਕ ਰਾਜਨੀਤਕ ਪਰਿਵਾਰ ਨਾਲ ਸਬੰਧਿਤ ਰਹੀ ਹੈ। ਸਲਮਾ ਨੇ ਭਾਈਚਾਰੇ ਨਾਲ ਮਿਲ ਕੇ ਕਰੈਡਿਟ ਵੈਲੀ ਹਸਪਤਾਲ ਲਈ ਵੀ ਫੰਡ ਇਕੱਠਾ ਕੀਤਾ ਸੀ।
ਬਰੈਂਪਟਨ ਸਪਰਿੰਗਡੇਲ ਹਲਕੇ ਤੋਂ ਪਿਛਲੀਆਂ ਚੋਣਾਂ ‘ਚ ਜਿੱਤੀ ਰੂਬੀ ਢਾਲਾ ਦਾ ਮੁਕਾਬਲਾ ਇਸ ਵਾਰ ਪਰਮ ਗਿੱਲ ਨਾਲ ਹੋ ਰਿਹਾ ਹੈ। ਪਰਮ ਗਿੱਲ ਕਨਜ਼ਰਵੇਟਿਵ ਪਾਰਟੀ ਦੇ ਅਤੇ ਰੂਬੀ ਢਾਲਾ ਲਿਬਰਲ ਪਾਰਟੀ ਦੀ ਉਮੀਦਵਾਰ ਹੈ। ਇਸ ਤੋਂ ਇਲਾਵਾ ਬਰੈਂਪਟਨ ਵੈਸਟ ਤੋਂ ਪੰਜਾਬੀਆਂ ਦੀਆਂ ਚਹੇਤੀ ਐਮ ਪੀ ਕੋਲੀਨ ਬੋਮੀਏ ਪਿਛਲੀਆਂ ਪੰਜ ਚੋਣਾਂ ਵਿਚ ਲਗਾਤਾਰ ਜਿੱਤ ਪ੍ਰਾਪਤ ਕਰਨ ਮਗਰੋਂ ਇਸ ਵਾਰ ਸਿਆਸਤ ਤੋਂ ਸੰਨਿਆਸ ਲੈ ਲਿਆ ਹੈ ਜਿਸ ਕਰਕੇ ਇਸ ਹਲਕੇ ਤੋਂ ਲਿਬਰਲਪਾਰਟੀ ਦੀ ਟਿਕਟ ਹਾਸਲ ਕਰਨ ਲਈ ਤਿੰਨ ਉਮੀਦਵਾਰ ਹਨ ਜਿਨ੍ਹਾਂ ਵਿਚੋਂ ਰਾਈਡਿੰਗ ਦੇ ਸਾਬਕਾ ਪ੍ਰਧਾਨ ਤੇ ਪੰਜਾਬੀ ਭਾਈਚਾਰੇ ਵਿਚ ਜਾਣੇ ਪਹਿਚਾਣੇ ਉਘੇ ਆਗੂ ਰਾਜ ਝੱਜ, ਗੁਜਰਾਤੀ ਮੂਲ ਦੀ ਦੀਪਿਕਾ ਅਤੇ ਵਕੀਲ ਐਂਡਰੀਓ ਕੈਨੀਆ ਬੀਤੇ ਮੰਗਲਵਾਰ 9 ਸਤੰਬਰ ਨੂੰ ਨੌਮੀਨੇਸ਼ਨ ਚੋਣ ਹੋਣੀ ਸੀ, ਪਰ ਸਵੇਰੇ ਹੀ ਪਾਰਟੀ ਹਾਈਕਮਾਂਡ ਵੱਲੋਂ ਨੌਮੀਨੇਸ਼ਨ ਰੱਦ ਕਰਕੇ ਫੈਸਲਾ 12 ਸਤੰਬਰ ਤੇ ਪਾ ਦਿੱਤਾ ਹੈ ਜਿਸ ਕਰਕੇ ਕੋਲੀਨ ਬੋਮੀਏ ਪਾਰਟੀ ਹਾਈ ਕਮਾਂਡ ਦੇ ਫੈਸਲੇ ਤੋਂ ਕਾਫੀ ਨਿਰਾਸ਼ ਦੱਸੀ ਜਾ ਰਹੀ ਹੈ। ਪੰਜਾਬੀ ਭਾਈਚਾਰਾ ਰਾਜ ਝੱਜ ਨੂੰ ਉਮੀਦਵਾਰ ਬਣਾਏ ਜਾਣ ਦੇ ਹੱਕ ਵਿਚ ਹੈ। ਇਸੇ ਹਲਕੇ ਤੋਂ ਐਨ ਡੀ ਪੀ ਪਾਰਟੀ ਦੇ ਜਗਤਾਰ ਸ਼ੇਰਗਿੱਲ ਚੋਣ ਮੈਦਾਨ ‘ਚ ਕੁੱਦੇ ਹਨ ਅਤੇ ਉਹ ਨਵਾਂ ਸ਼ਹਿਰ ਦੇ ਪਿੰਡ ਝੀਂਗਰਾ ਦੇ ਜੰਮਪਲ ਹਨ। ਪਿਛਲੀਆਂ ਚੋਣਾਂ ਵਿਚ ਵੀ ਉਨ੍ਹਾਂ ਨੇ ਆਪਣੀ ਕਿਸਮਤ ਅਜ਼ਮਾਈ ਸੀ ਤੇ ਉਹ ਤੀਜੇ ਸਥਾਨ ਤੇ ਰਹੇ ਸਨ। ਸ਼ੇਰਗਿੱਲ ਨੂੰ ਇਸ ਗੱਲ ਤੇ ਆਸਾਂ ਹਨ ਕਿ ਕੋਲੀਨ ਦੇ ਰਾਜਨੀਤੀ ਚੋਂ ਹਟਣ ਨਾਲ ਉਨ੍ਹਾਂ ਦੀ ਜਿੱਤ ਦਾ ਰਾਹ ਕਾਫੀ ਹੱਦ ਤੱਕ ਪੱਧਰਾ ਹੋ ਗਿਆ ਹੈ।
ਐਬਟਸਫੋਰਡ ਹਲਕੇ ਤੋਂ ਇਕ ਹੋਰ ਪੰਜਾਬਣ ਬੋਨੀ ਰਾਏ ਵੱਲੋਂ ਐਨ ਡੀ ਪੀ ਦੀ ਟਿਕਟ ਤੇ ਚੋਣ ਲੜਨ ਦੀ ਉਮੀਦ ਕੀਤੀ ਜਾ ਰਹੀ ਹੈ। ਇਸੇ ਤਰ੍ਹਾਂ ਰੈਕਸਡੇਲ ‘ਚ ਈਟੋਬੀਕੋ ਨੌਰਥ ਹਲਕੇ ਤੋਂ ਬੌਬ ਸਰੋਆ ਕਨਜ਼ਰਵੇਟਿਵ ਪਾਰਟੀ ਦੀ ਟਿਕਟ ਤੇ ਚੋਣ ਲੜ ਰਹੇ ਹਨ ਤੇ ਉਨ੍ਹਾਂ ਦੇ ਦਫਤਰ ਦਾ 13 ਸਤੰਬਰ ਨੂੰ ਉਦਘਾਟਨ ਕੀਤਾ ਜਾ ਰਿਹਾ ਹੈ। ਇਸ ਤੋਂ ਇਲਾਵਾ ਕੁਝ ਹੋਰ ਪੰਜਾਬੀ ਉਮੀਦਵਾਰਾਂ ਦੇ ਨਾਵਾਂ ਬਾਰੇ ਚਰਚਾ ਹੋ ਰਹੀ ਹੈ ਜੋ ਆਉਂਦੇ ਦਿਨਾਂ ਵਿਚ ਵੱਖ ਵੱਖ ਪਾਰਟੀਆਂ ਖਾਸ ਕਰਕੇ ਗਰੀਨ ਪਾਰਟੀ ਵੱਲੋਂ ਚੋਣ ਮੈਦਾਨ ਵਿਚ ਕੁੱਦ ਰਹੇ ਹਨ। ਹੈਲੀਫੈਕਸ ਵੈਸਟ ਹਲਕੇ ਤੋਂ ਭਾਰਤੀ ਮੂਲ ਦੇ ਸ੍ਰੀ ਰਾਕੇਸ਼ ਖੋਸਲਾ ਵੀ ਕਨਜ਼ਰਵੇਟਿਵ ਪਾਰਟੀ ਦੀ ਟਿਕਟ ਤੋਂ ਕਿਸਮਤ ਅਜ਼ਮਾ ਰਹੇ ਹਨ। ਰਾਕੇ ਸ਼ ਦੂਸਰੀ ਵਾਰ ਚੋਣ ਮੈਦਾਨ ਵਿਚ ਆਏ ਹਨ। ਪਿਛਲੀ ਵਾਰ ਉਨ੍ਹਾਂ ਨੇ ਲਿਬਰਲ ਪਾਰਟੀ ਦੇ ਜਿਆਫ ਰੀਗਨ ਤੋਂ ਹਾਰ ਖਾਧੀ ਸੀ। ਮਿਸੀਸਾਗਾ ਸਟਰੀਟਵਿਲ ਹਲਕੇ ਤੋਂ ਕਨਜ਼ਰਵੇਟਿਵ ਪਾਰਟੀ ਦੇ ਉਨਟਾਰੀਓ ਚੋਂ ਇਕੋ ਇਕ ਪੰਜਾਬੀ ਅਤੇ ਲਾਹੌਰ ਦੇ ਜੰਮਪਲ ਅਤੇ ਪ੍ਰਧਾਨ ਮੰਤਰੀ ਸਟੀਫਨ ਹਾਰਪਰ ਦੇ ਸਲਾਹਕਾਰ ਵਾਜਿਦ ਖਾਨ ਤੀਸਰੀ ਵਾਰ ਚੋਣ ਮੈਦਾਨ ਵਿਚ ਨਿੱਤਰੇ ਹਨ। ਇਸ ਤੋਂ ਪਹਿਲੀਆਂ ਚੋਣਾਂ ਵਿਚ ਵਾਜਿਦ ਖਾਨ ਨੇ ਇਕ ਵਾਰ ਰਮਿੰਦਰ ਗਿੱਲ ਅਤੇ ਦੂਸਰੀ ਵਾਰ ਨੀਨਾਂ ਤਾਂਗੜੀ ਨੂੰ ਹਰਾਇਆ ਸੀ। ਵਾਜਿਦ ਖਾਨ ਪਹਿਲਾਂ ਲਿਬਰਲ ਪਾਰਟੀ ਵਿਚ ਸਨ, ਬਾਅਦ ਵਿਚ ਉਹ ਕਨਜ਼ਰਵੇਟਿਵ ਪਾਰਟੀ ਵਿਚ ਸ਼ਾਮਿਲ ਹੋ ਗਏ ਸਨ। ਬ੍ਰਿਟਿਸ਼ ਕੋਲੰਬੀਆ ਇੰਟੀਰੀਅਰ ਹਲਕੇ ਤੋਂ ਲਿਬਰਲ ਪਾਰਟੀ ਦੀ ਟਿਕਟ ਤੇ ਪੰਜਾਬਣ ਬਰੈਂਡਾ ਜਗਪਾਲ ਨੇ ਵੀ ਚੋਣ ਲੜਨ ਲਈ ਆਪਣੇ ਫਾਰਮ ਦਾਖਲ ਕਰ ਦਿੱਤੇ ਹਨ।

ਔਰਤ ਦੀ ਬੱਚੇਦਾਨੀ ’ਚੋ 6 ਕਿਲੋ ਦੀ ਰਸੌਲੀ ਕੱਢੀ,
ਸਰਕਾਰੀ ਹਸਪਤਾਲ ਦੇ ਡਾਕਟਰਾਂ ਨੇ ਕੀਤਾ ਗੁੰਝਲਦਾਰ ਅਪ੍ਰੇਸ਼ਨ

ਮਾਛੀਵਾੜਾ 11 ਸਤੰਬਰ (ਸੁਸ਼ੀਲ ਸ਼ਰਮਾ) ਸਥਾਨਕ ਮੁੱਢਲਾ ਸਿਹਤ ਕੇਂਦਰ ਵਿਖੇ ਇੱਕ ਮਹਿਲਾ ਮਰੀਜ ਦਾ ਸਫਲ ਅਪ੍ਰੇਸ਼ਨ ਕਰਕੇ 6 ਕਿਲੋ ਦੀ ਭਾਰੀ ਰਸੌਲੀ ਕੱਢਣ ਦਾ ਅਨੋਖਾ ਕੰਮ ਹੋਇਆ । ਇੰਨੀ ਵੱਡੀ ਅਤੇ ਭਾਰੀ ਰਸੌਲੀ ਕੱਢਣ ਆਪਣੇ ਆਪ ਵਿੱਚ ਕਿਸੇ ਰਿਕਾਰਡ ਪ੍ਰਾਪਤੀ ਤੋਂ ਘੱਟ ਨਹੀ ਹੈ। ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਹਸਪਤਾਲ ਦੇ ਮੈਡੀਕਲ ਸਰਜਨ ਡਾ: ਬਲਵੀਰ ਸਿੰਘ ਨੇ ਦੱਸਿਆ ਕਿ ਗਰੀਬ ਔਰਤ ਬੇਬੀ ਪੁੱਤਰੀ ਚਰਨਦਾਸ ਵਾਸੀ ਮੀਆਂ ਮੁਹੱਲਾ ਮਾਛੀਵਾੜਾ ਦੇ ਬੱਚੇਦਾਨੀ ਵਿੱਚ ਇਹ ਰਸੌਲੀ ਵਿਕਸਤ ਹੋਈ, ਇਸ ਰਸੌਲੀ ਦਾ ਅਕਾਰ ਤਰਬੂਜ਼ ਜਿੰਨ੍ਹਾਂ ਵੱਡਾ ਸੀ, ਜਿਸ ਕਰਕੇ ਇਹ ਅਪ੍ਰੇਸ਼ਨ ਬਹੁੱਤ ਗੁੰਝਲਦਾਰ ਤੇ ਚਨੌਤੀ ਭਰਿਆ ਸੀ ਅਪ੍ਰੇਸ਼ਨ ਸਮੇਂ ਮਰੀਜ਼ ਦਾ ਖੂਨ ਦੀ ਮਾਤਰਾ ਵੀ (5 ਗ੍ਰਾਮ) ਜੋ ਕਿ ਘੱਟ ਸੀ। ਮਰੀਜ਼ ਦੇ ਨੇੜਲੇ ਤੇ ਖੂਨਦਾਨੀਆਂ ਨੇ ਇਸ ਮਰੀਜ਼ ਨੂੰ ਦੇ ਕੇ 6 ਬੋਤਲਾਂ ਖੂਨ ਦਾਨ ਕਰਕੇ ਅਪ੍ਰੇਸ਼ਨ ਨੂੰ ਸਫਲ ਬਣਾਇਆ । ਉਨ੍ਹਾਂ ਦੱਸਿਆ ਕਿ ਕੁੱਝ ਅਖੌਤੀ ਬਾਬਿਆਂ ਵੱਲੋਂ ਦਿੱਤੀਆਂ ਜਾਂਦੀਆਂ ਦੇਸੀ ਦਵਾਈਆਂ ਲੈਣ ਨਾਲ ਜਿਹੜੀਆਂ ਕਿ ਬਿੰਨ੍ਹਾਂ ਮਾਤਰਾ ਸੈ¤ਟ ਕੀਤੇ ਤੋਂ ਵੱਧ ਘੱਟ ਲਈਆਂ ਜਾਂਦੀਆਂ ਹਨ , ਅਜਿਹੇ ਕਾਰਨਾਂ ਕਰਕੇ ਇਹ ਰਸੌਲੀ ਪੈਂਦਾ ਹੋ ਜਾਂਦੀ ਹੈ। ਮਾਛੀਵਾੜਾ ਮੁੱਢਲਾ ਸਿਹਤ ਕੇਂਦਰ ਵਿੱਚ ਇਸ ਤਰ੍ਹਾਂ ਦੀ 6 ਕਿਲੋ ਰਸੌਲੀ ਵਾਲਾ ਪਹਿਲਾਂ ਸਫਲ ਅਪ੍ਰੇਸ਼ਨ ਕੀਤਾ ਗਿਆ ਹੈ । ਇਸਤੋਂ ਪਹਿਲਾਂ ਇਸੇ ਸਰਜਨ ਨੇ ਇੱਕ ਛੋਟੇ ਬੱਚੇ ਦਾ ਅਪ੍ਰੇਸ਼ਨ ਵੀ ਕੀਤਾ ਸੀ ਜਿਸਦੇ ਕਿ ਨੱਕ ਤੇ ਮੂੰਹ ਵਿੱਚੋਂ ਕੀੜੇ ਨਿਕਲਣ ਲੱਗ ਪਏ ਸਨ । ਜਿਕਰਯੋਗ ਹੈ ਕਿ ਇਹ ਗਰੀਬ ਔਰਤ ਹੁਣ ਮੋਹਾਲੀ ਰਹਿੰਦੀ ਹੈ, ਸਥਾਨਕ ਸ਼ਹਿਰ ਦੀ ਕੁੜੀ ਹੋਣ ਕਰਕੇ ਅਮਰਜੀਤ ਸਿੰਘ, ਮਹਿੰਦਰਪਾਲ, ਸਤਨਾਮ ਸਿੰਘ, ਰਿੰਕਾ, ਹਰਪ੍ਰੀਤ ਸਿੰਘ ਨੇ ਇਸਨੂੰ ਖੂਨ ਦੇ ਕੇ ਅਪ੍ਰੇਸ਼ਨ ਯੋਗ ਬਣਾਇਆ ।

ਸੜਕ ਹਾਦਸੇ ਵਿੱਚ ਇੱਕ ਦੀ ਮੌਤ , ਇੱਕ ਜ਼ਖਮੀ

ਮਾਛੀਵਾੜਾ 11 ਸਤੰਬਰ (ਸੁਸ਼ੀਲ ਸ਼ਰਮਾ) ਸਥਾਨਕ ਰੋਪੜ ਰੋਡ ਤੇ ਸਥਿੱਤ ਪਿੰਡ ਸ਼ੇਰਪੁਰ ਨੇੜੇ ਫਲਾਹੀ ਵਾਲਾ ਚੌਂਕ ਵਿੱਚ ਮਿੰਨੀ ਬੱਸ ਦੀ ਲਪੇਟ ਵਿੱਚ ਆਉਣ ਨਾਲ ਇੱਕ ਵਿਅਕਤੀ ਦੀ ਮੌਤ ਤੇ ਇੱਕ ਵਿਅਕਤੀ ਗੰਭੀਰ ਜਖ਼ਮੀ ਹੋ ਗਿਆ, ਜਿਸਨੂੰ ਕਿ ਇਲਾਜ਼ ਲਈ ਹਸਪਤਾਲ ਦਾਖਲ ਕਰਵਾਇਆ ਗਿਆ । ਪ੍ਰਾਪਤ ਜਾਣਕਾਰੀ ਮੁਤਾਬਿਕ ਸ਼ਹਿਰ ਦੇ ਨੈਸ਼ਨਲ ਗਰਲਜ਼ ਕਾਲਜ ਦੀ ਮਿੰਨੀ ਬੱਸ ਨੰ: ਪੀ.ਬੀ. 31 ਐਫ. 0391, ਜੋ ਕਿ ਸ਼ੇਰਪੁਰ ਬੇਟ ਵਿਖੇ ਕਾਲਜ ਦੀਆਂ ਲੜਕੀਆਂ ਨੂੰ ਛੱਡਣ ਤੋਂ ਬਾਅਦ ਵਾਪਸ ਆ ਰਿਹਾ ਸੀ ਤਾਂ ਫਲਾਹੀ ਚੌਂਕ ਦੇ ਨਜ਼ਦੀਕ ਦੋ ਮੋਟਰ ਸਾਈਕਲ ਸਵਾਰਾਂ ਨੂੰ ਆਪਣੀ ਲਪੇਟ ਵਿੱਚ ਲੈ ਲਿਆ। ਜਿਸ ਦੌਰਾਨ ਗਿਆਨ ਸਿੰਘ ਵਾਸੀ ਡੱਲ੍ਹਾ ਦੀ ਘਟਨਾ ਸਥਾਨ ਤੇ ਹੀ ਮੌਤ ਹੋ ਗਈ ਤੇ ਰਵੀ ਕੁਮਾਰ ਗੰਭੀਰ ਰੂਪ ਵਿੱਚ ਜਖ਼ਮੀ ਹੋ ਗਿਆ। ਇਹ ਉਪਰੋਕਤ ਦੋਨੋ ਵਿਅਕਤੀ ਪਿਉ -ਪੁੱਤਰ ਹੇਡੋਂ ਬੇਟ ਵਿਖੇ ਕੁਸ਼ਤੀ ਦੰਗਲ ਦੇਖਣ ਲਈ ਆ ਰਹੇ ਸਨ ਤੇ ਦੁਰਘਟਨਾ ਦਾ ਸ਼ਿਕਾਰ ਹੋ ਗਏੇ। ਬੱਸ ਚਾਲਕ ਤੁਰੰਤ ਮੌਕੇ ਤੋਂ ਫਰਾਰ ਹੋ ਗਿਆ । ਮਾਛੀਵਾੜਾ ਪੁਲਿਸ ਨੇ ਬੱਸ ਚਾਲਕ ਦੇ ਖਿਲਾਫ਼ ਪਰਚਾ ਦਰਜ ਕੇ ਵਾਹਨ ਨੂੰ ਕਬਜ਼ੇ ਵਿੱਚ ਲੈ ਲਿਆ ਸੀ।

ਹੈਂਡੋ ਬੇਟ ਦਾ ਦੰਗਲ ਮੇਲਾ ਧੂਮ ਧੜੱਕੇ ਨਾਲ ਸਮਾਪਤ
ਪਹਿਲੀ ਵਾਰ ਹੋਈਆਂ ਦੋ ਝੰਡੀ ਦੀਆਂ ਕੁਸ਼ਤੀਆਂ

ਮਾਛੀਵਾੜਾ 11 ਸਤੰਬਰ (ਸੁਸ਼ੀਲ ਸ਼ਰਮਾ) ਇੱਥੋ ਕੁੱਝ ਕਿਲੋਮੀਟਰ ਦੀ ਦੂਰੀ ਤੇ ਸਥਿੱਤ ਇਲਾਕੇ ਦੇ ਪ੍ਰਸਿੱਧ ਪਿੰਡ ਹੈਂਡੋ ਬੇਟ ਵਿਖੇ ਸਦੀਆਂ ਤੋਂ ਬਾਬਾ ਗੁੱਗਾ ਜ਼ਾਹਰ ਪੀਰ ਦੀ ਯਾਦ ’ਚ ਕਰਵਾਈ ਜਾਂਦੀ ਛਿੰਝ ਦਾ ਹਜ਼ਾਰਾਂ ਲੋਕਾਂ ਨੇ ਦਿਲ ਖੋਲ ਕੇ ਲੁਤਫ ਉਠਾਇਆ। ਇਸ ਛਿੰਝ ਮੇਲੇ ਵਿੱਚ ਪੰਜਾਬ ਅਤੇ ਰਾਜ ਤੋ ਬਾਹਰਲੇ ਸੂਬਿਆਂ ਤੋਂ ਆਏ 300 ਦੇ ਕਰੀਬ ਪਹਿਲਵਾਨਾਂ ਨੇ ਆਪਣੇ ਜ਼ੋਹਰ ਦਿਖਾਏ। ਹਜ਼ਾਰਾਂ ਦੀ ਤਦਾਦ ਵਿੱਚ ਪਹੁੰਚੇ ਦਰਸ਼ਕਾਂ ਨੇ ਦੌਰਾਨ ਮੁੱਖ ਮਹਿਮਾਨ ਵੱਜੋਂ ਪਹੁੰਚੇ ਹਲਕਾ ਕੂੰਮਕਲਾਂ ਦੇ ਸਾਬਕਾ ਵਿਧਾਇਕ ਇੰਦਰ ਇਕਬਾਲ ਸਿੰਘ ਅਟਵਾਲ ਨੇ ਕਿਹਾ ਕਿ ਇੰਨਾਂ ਵੱਡਾ ਇਕੱਠ ਮੈਂ ਆਪਣੀ ਸਿਆਸੀ ਜਿੰਦਗੀ ਵਿੱਚ ਕਿਸੇ ਵੀ ਛਿੰਝ ਤੇ ਨਹੀ ਦੇਖਿਆ। ਇਸ ਮੌਕੇ ਪਟਕੇ ਦੀ ਇੱਕ ਨੰਬਰ ਦੀ ਕੁਸ਼ਤੀ ਵਿੱਚ ਦੋ ਪ੍ਰਮੁੱਖ ਜੋੜੀਆਂ ਨੇ ਆਪਣੇ ਜ਼ੋਹਰ ਦਿਖਾਏ, ਪਹਿਲੀ ਜੋੜੀ ਵਿੱਚ ਭਾਰਤ ਕੇਸਰੀ ਪਰਮਿੰਦਰ ਡੂੰਮਛੇੜੀ ਨੇ ਜਗਰੂਪ ਅਮ੍ਰਿੰਤ ਸਰ ਨੂੰ ਕੁੱਝ ਮਿੰਟਾਂ ਵਿੱਚ ਹੀ ਚਿਤ ਕਰਦੇ ਹੋਏ ਦਰਸ਼ਕਾਂ ਨੂੰ ਤਾੜੀਆਂ ਮਾਰਨ ਤੇ ਮਜ਼ਬੂਰ ਕਰ ਦਿੱਤਾ ਜਦਕਿ ਦੂਸਰੀ ਝੰਡੀ ਦੀ ਕੁਸ਼ਤੀ ਲੱਡੂ ਡੂੰਮਛੇਡੀ ਤੇ ਗੁਰਦੇਵ ਮਲਕਪੁਰ ਅੱਧਾ ਘੰਟਾ ਜ਼ੋਰ ਅਜਮਾਈ ਕਰਨ ਉਪਰੰਤ ਬਰਾਬਰ ਤੇ ਰਹੇ । ਦੂਜੀ ਝੰਡੀ ਦੀ ਕੁਸ਼ਤੀ ਵਿੱਚ ਸ਼ਤੀਸ਼ ਆਲਮਗੀਰ ਤੇ ਗੁਰਵਿੰਦਰ ਚੌਤਾ ਵੀ ਬਰਾਬਰ ਰਹੇ ਜਦਕਿ ਸਤਨਾਮ ਮਾਛੀਵਾੜਾ ਤੇ ਅਮਰਜੀਤ ਸਰਸਾ ਵੀ ਕਈ ਦਾਅ ਪੇਚ ਮਾਰਨ ਤੋਂ ਬਾਅਦ ਵੀ ਬਰਾਬਰ ਤੇ ਰਹੇ । ਇਸ ਦੰਗਲ ਮੇਲੇ ਵਿੱਚ ਪਿੰਡ ਤੇ ਇਲਾਕਾ ਵਾਸੀਆਂ ਵੱਲੋਂ ਦੋ ਝੰਡੀ ਦੀਆਂ ਕੁਸ਼ਤੀਆਂ ਦੇ ਜੇਤੂਆਂ ਨੂੰ ਇੱਕੋ ਜਿਹੇ ਹੀਰੋ ਹੋਡੇ ਮੋਟਰ ਸਾਇਕਲ ਦੇ ਕੇ ਨਵਾਜਿਆ ਗਿਆ ਜਦਕਿ ਦੂਜੇ ਨੰਬਰ ਤੇ ਆਉਣ ਵਾਲੇ ਪਹਿਲਵਾਨਾਂ ਨੂੰ ਸੱਜਰ ਸੂਈਆਂ ਝੋਟੀਆਂ ਇਨਾਮ ਵੱਜੋ ਦਿੱਤੀਆਂ ਗਈਆਂ । ਇਸਤੋਂ ਇਲਾਵਾ ਤੀਜੇ, ਚੌਥੇ ਨੰਬਰ ਪਹਿਲਵਾਨਾਂ ਨੂੰ ਸੋਨੇ ਦੇ ਕੰਗਣ ਤੇ ਮੁੰਦਰੀਆਂ ਪਾ ਕੇ ਸਨਮਾਨਿਤ ਕੀਤਾ ਗਿਆ । ਇਸ ਮੌਕੇ ਐਸ.ਜੀ.ਪੀ.ਸੀ. ਮੈਂਬਰ ਕ੍ਰਿਪਾਲ ਸਿੰਘ ਖੀਰਨੀਆਂ, ਕੁਲਦੀਪ ਸਿੰਘ, ਬਲਾਕ ਸੰਮਤੀ ਮੈਂਬਰ ਅਰੁਣ ਲੂਥੜਾ, ਜਥੇਦਾਰ ਚੰਨਣ ਸਿੰਘ ਹਸਨਪੁਰੀ, ਅਗਰਵਾਲ ਸਭਾ ਦੇ ਪ੍ਰਧਾਨ ਸੁਰਿੰਦਰ ਬੰਸਲ ਵੀ ਵਿਸ਼ੇਸ਼ ਰੂਪ ਵਿੱਚ ਪਹੁੰਚੇ । ਦੰਗਲ ਕਮੇਟੀ ਪ੍ਰਬੰਧਕਾਂ ਚੋਂ ਸ਼ਮਸ਼ੇਰ ਸਿੰਘ ਮਨੀਮ, ਲਾਲਾ ਕਰਮਚੰਦ, ਹਰੀ ਸਿੰਘ ਸਾਬਕਾ ਸਰਪੰਚ , ਸੁਖਵਿੰਦਰ ਕੌਰ ਸਰਪੰਚ, ਅਮਰੀਕ ਸਿੰਘ ਪੰਚਾਇਤ ਸਕੱਤਰ, ਸੁਰਿੰਦਰ ਸਿੰਘ ਸਾਬਕਾ ਸਰਪੰਚ , ਪੰਚ ਅਮਰ ਸਿੰਘ , ਸੁਖਵਿੰਦਰ ਸਿੰਘ ਪੰਚਾਇਤ ਸਕੱਤਰ ਵੀ ਮੌਜੂਦ ਸਨ।

ਪੰਜਾਬੀ ਬੋਲੀ, ਭਾਸ਼ਾ ਤੇ ਲਿੱਪੀ ਲਈ ਇਤਿਹਾਸਕ ਦਿਨ
ਖ਼ਾਲਿਸਤਾਨ ਦੇ ਸ਼ਹੀਦ ਪ੍ਰਵਾਰਾਂ ਵੱਲੋਂ ਸਮੁੱਚੇ ਖ਼ਾਲਸਾ ਪੰਥ ਤੇ ਪੰਜਾਬੀਆਂ ਨੂੰ ਮੁਬਾਰਕ

ਸੈਨ ਫ਼ਰਾਂਸਿਸਕੋ : ਅੱਜ ਦਾ ਦਿਨ ਪੰਜਾਬੀ ਬੋਲੀ-ਗੁਰਮੁਖੀ ਲਿੱਪੀ ਲਈ ਇਤਿਹਾਸਕ ਦਿਨ ਹੋ ਨਿਬੜਿਆ ਜਦੋਂ ਪੰਜਾਬ ਵਿਧਾਨ ਸਭਾ ਨੇ ਸਰਬਸੰਮਤੀ ਨਾਲ ਪੰਜਾਬੀ ਸੰਬਧੀ ਦੋ ਕਾਨੂੰਨ ਪਾਸ ਕਰ ਦਿਤੇ। ਪੰਜਾਬੀਆਂ ਦੀ 61 ਵਰ੍ਹੇ ਪੁਰਾਣੀ ਮੰਗ ਅੱਜ ਪੂਰੀ ਹੋਈ ਹੈ। ਪੰਜਾਬੀ ਸਬੰਧੀ ਲਾਗੂ ਹੋਏ ਬੇਹੱਦ ਜ਼ਰੂਰੀ ਕਾਨੂੰਨ ਨੂੰ ਪਾਸ ਕਰਾਉਣ ਲਈ ਲੇਖਕਾਂ ਨੇ ਬੇਹੱਦ ਘਾਲਣਾ ਘਾਲੀ। ਮੁਜ਼ਾਹਰੇ ਕੀਤੇ, ਭੁੱਖ ਹੜਤਾਲਾਂ ਰਖੀਆਂ। ਸਿੱਖ ਨੇਸ਼ਨ ਨੂੰ ਬੇਹੱਦ ਪੀੜ ਵਿਚੋਂ ਗੁਜ਼ਰਨਾ ਪਿਆ। ਬ੍ਰਾਹਮਣਵਾਦੀ ਲਾਣੇ ਨੇ ਪਹਿਲਾਂ ਪੰਜਾਬੀ ਸੂਬਾ ਲਾਗੂ ਕਰਨ ਵਿਚ ਅੜਚਣਾਂ ਡਾਹੀਆਂ ਤੇ ਫ਼ਿਰ ਪੰਜਾਬ ਵਿਚੋਂ ਹੀ ਪੰਜਾਬੀ ਨੂੰ ਮਾਰਨ ਲਈ ਪੂਰਾ ਜ਼ੋਰ ਲਾਇਆ। ਪਰ ਬੁਨਿਆਦੀ ਤੌਰ ਤੇ ਸਿੱਖਾਂ ਨੇ ਪੰਜਾਬੀ-ਗੁਰਮੁਖੀ ਲਈ ਮੈਦਾਨ ਵਿਚ ਨਿੱਤਰਦਿਆਂ ਆਪਣੀ ਗੁਰੂ ਬੋਲੀ ਨੂੰ ਬਚਾਉਣ ਲਈ ਪੂਰੀ ਤਾਕਤ ਝੋਕ ਦਿਤੀ। ਪੰਜਾਬ ਦੀਆਂ ਦੁਸ਼ਮਣ ਸ਼ਕਤੀਆਂ ਵਿਚੋਂ ਮੁੱਖ ਆਰੀਆ ਸਮਾਜ, ਕਾਂਗਰਸ, ਆਰ.ਐਸ.ਐਸ, ਸ਼ਿਵ ਸੈਨਾ, ਭਾਜਪਾ ਆਦਿ ਨੇ ਪਿਛਲੇ 61 ਸਾਲਾਂ ਤੋਂ ਹੀ ਉਸ ਥਾਲੀ ਵਿਚ ਮੋਰੀਆਂ ਕੀਤੀਆਂ ਜਿਸ ਥਾਲੀ ਨੇ ਉਨ੍ਹਾਂ ਦਾ ਢਿੱਡ ਭਰਿਆ।ਅਕਾਲੀਆਂ ਨੇ ਵੀ ਪੰਜਾਬੀ ਨੂੰ ਲਾਗੂ ਕਰਨ ਵਿਚ ਕਦੇ ਸੁਹਿਰਦਤਾ ਨਹੀਂ ਵਿਖਾਈ, ਕਦੇ ਯਤਨ ਨਹੀਂ ਕੀਤਾ। ਹਾਲਤ ਇਥੋਂ ਤੱਕ ਕਿ ਵਿਗੜ ਗਏ ਕਿਪੰਜਾਬ ਦੇ ਸਿੱਖ ਵਿਰੋਧੀ ਲਾਲਾ ਜਗਤ ਨਾਰਾਇਣ ਦੇ ਜ਼ਹਿਰੀਲੇ ਪ੍ਰਚਾਰ ਦਾ ਸ਼ਿਕਾਰ ਹੋ ਕੇ ਪੰਜਾਬ ਦੇ ਹਿੰਦੂ, ਪੰਜਾਬੀ ਮਾਂ ਬੋਲੀ ਤੋਂ ਹੀ ਮੁਨਕਰ ਹੋ ਗਏ। ਲਾਲੇ ਨੇ ਆਪਣੀਆਂ ਜ਼ਹਿਰ ਉਗਲਦੀਆਂ ਅਖ਼ਬਾਰਾਂ ਪੰਜਾਬ ਕੇਸਰੀ ਤੇ ਜਗਬਾਣੀ ਵਿਚ ਪੰਜਾਬੀ ਵਿਰੁੱਧ ਰੱਜ ਕੇ ਪ੍ਰਚਾਰ ਕੀਤਾ। ਪਰ ਅਜੀਤ ਦੇ ਡਾ: ਸਾਧੂ ਸਿੰਘ ਹਮਦਰਦ ਨੇ ਲਾਲੇ ਦੀ ਹਰ ਗ਼ਲਤ ਗੱਲ ਦਾ ਠੋਕ ਵਜਾ ਕੇ ਉਤਰ ਦਿਤਾ ਤੇ ਪੰਜਾਬੀ ਬੋਲੀ ਦੀ ਪੁੱਜ ਕੇ ਵਕਾਲਤ ਕੀਤੀ।
ਸਮਾਂ ਆਪਣੀ ਤੋਰੇ ਤੁਰਦਾ ਰਿਹਾ। ਹੁਣ ਜਾਕੇ ਕਿਤੇ ਅਕਾਲੀਆਂ ਨੂੰ ਥੋਹੜੀ ਜਿਹੀ ਅਕਲ ਆਈ ਹੈ ਕਿ ਪੰਜਾਬੀ ਬੋਲੀ, ਪੰਜਾਬੀ ਭਾਸ਼ਾ ਤੇ ਪੰਜਾਬੀ ਲਿੱਪੀ ਨੂੰ ਜੇ ਖ਼ਤਮ ਹੋਣ ਦਿਤਾ ਗਿਆ ਤਾਂ ਇਸਦੇ ਨਤੀਜੇ ਬਹੁਤ ਮਾਰੂ ਨਿਕਲਣਗੇ। ਸਿੱਖਾਂ ਦਾ ਸ੍ਰੀ ਗੁਰੂ ਗਰੰਥ ਸਾਹਿਬ ਨਾਲੋਂ ਸੰਬਧ ਟੁੱਟ ਜਾਏਗਾ। ਸਯੁੰਕਤ ਰਾਸ਼ਟਰ ਸੰਘ ਵੱਲੋਂ ਪੰਜਾਬੀ ਬਾਰੇ ਆਏ ਇਕ ਗੰਭੀਰ ਸਰਵੇਖਣ ਨੇ ਵੀ ਸਿੱਖ ਕੌਮ ਨੂੰ ਸੋਚਣ ਲਈ ਮਜਬੂਰ ਕਰ ਦਿਤਾ।ਕਈ ਗੱਲਾਂ ਇਕਠੀਆਂ ਹੋ ਗਈਆਂ ਤੇ ਅੰਤ ਇਕਾਹਠ ਸਾਲ ਪੁਰਾਣੀ ਮੰਗ ਅੱਜ ਮਨਜ਼ੂਰ ਕੀਤੀ ਗਈ। ਦੇਰ ਆਏ ਦਰੁਸਤ ਆਏ ਵਾਂਗ ਬਾਦਲ ਸਰਕਾਰ ਦੇ ਬੰਦੇ ਘੱਟੋ ਘੱਟ ਇਹ ਕਹਿਣ ਜੋਗੇ ਹੋ ਗਏ ਹਨ ਕਿ ਪੰਜਾਬੀ ਲਈ ਉਨ੍ਹਾਂ ਸੁਹਿਰਦ ਯਤਨ ਕੀਤੇ। ਮਰਨ ਕਿਨਾਰੇ ਆਈ ਇਹ ਪੰਜਾਬ ਮਿੱਠੀ ਬੋਲੀ ਨੂੰ ਹੁਣ ਨਵੀਂ ਜ਼ਿੰਦਗੀ ਹਾਸਲ ਹੋਈ ਹੈ। ਖ਼ਤਮ ਤਾਂ ਨਹੀਂ ਸੀ ਹੋਣੀ ਸਿਰਫ਼ ਰੁਲ ਰਹੀ ਸੀ ਤੇ ਉਹ ਵੀ ਸਿੱਖਾਂ ਦੇ ਕਾਰਨ ਹੀ। ਪਰ ਹੁਣ ਕੁਦਰਤ ਨੇ ਆਪਣਾ ਜਲਵਾ ਵਿਖਾਇਆ ਹੈ। ਖ਼ਾਲਿਸਤਾਨ ਦੇ ਸ਼ਹੀਦ ਪ੍ਰਵਾਰਾਂ ਵੱਲੋਂ ਸਮੂੰਹ ਖ਼ਾਲਸਾ ਪੰਥ ਨੂੰ ਵਧਾਈ ਦੇਂਦਿਆਂ, ਬਲਵਿੰਦਰਪਾਲ ਸਿੰਘ ਖ਼ਾਲਸਾ ਨੇ ਬਿਆਨ ਜਾਰੀ ਕਰਦਿਆਂ ਕਿਹਾ ਕਿ ਇਹ ਦਿਨ ਖ਼ੁਸ਼ੀਆਂ ਭਰਿਆ ਹੈ। ਸਾਡੀ ਮਾਂ ਬੋਲੀ ਦੀ ਤਰੱਕੀ ਹੁਣ ਅਗਾਂਹ ਤੋਂ ਅਗਾਂਹ ਜਾਏਗੀ ਤੇ ਸੰਸਾਰ ਦੀਆਂ ਦੂਜੀਆਂ ਬੋਲੀਆਂ ਦੇ ਬਰਾਬਰ ਮਾਣ ਨਾਲ ਖਲੋ ਸਕੇਗੀ। ਹਰ ਸਿੱਖ ਨੂੰ ਆਪਣੇ ਬੱਚਿਆਂ ਨੂੰ ਹਰ ਹਾਲਤ ਵਿਚ ਪੰਜਾਬੀ ਗੁਰਮੁਖੀ ਦੀ ਪੜ੍ਹਾਈ ਕਰਵਾਉਣੀ ਚਾਹੀਦੀ ਹੈ। ਖ਼ਾਲਿਸਤਾਨ ਦੀ ਕਾਇਮੀ ਲਈ ਕੁਰਬਾਨ ਹੋਏ ਸਿੱਖਾਂ ਅੰਦਰ ਪੰਜਾਬੀ ਗੁਰਮੁਖੀ ਲਈ ਅਥਾਹ ਮੁਹਬੱਤ ਸੀ ਤੇ ਉਹ ਮਾਖ਼ਿਓਂ ਮਿੱਠੀ ਬੋਲੀ ਤੇ ਲਿੱਪੀ ਨੂੰ ਇਸਦਾ ਬਣਦਾ ਹੱਕ ਦੁਆਉਣਾ ਚਾਹੁੰਦੇ ਸਨ। ਅੱਜ ਉਨ੍ਹਾਂ ਦੀਆਂ ਮੁੱਖ ਮੰਗਾਂ ਵਿਚੋਂ ਪੰਜਾਬੀ ਦੀ ਮੰਗ ਪੂਰੀ ਹੋਈ ਹੈ ਪਰ ਖ਼ਾਲਿਸਤਾਨ ਦੀ ਸਥਾਪਤੀ ਦੀ ਮੰਗ ਜਿਉਂ ਦੀ ਤਿਉਂ ਕਾਇਮ ਹੈ ਤੇ ਇਸ ਦੀ ਪੂਰਤੀ ਲਈ ਅਮਨਮਈ ਲੋਕਤਾਂਤਰਿਕ ਜਦੋਜਹਿਦ ਜਾਰੀ ਹੈ।

ਪੰਜਾਬੀ ਭਾਸ਼ਾ ਤੇ ਲਿੱਪੀ ਪੂਰੇ ਪੰਜਾਬ ਦੇ ਸਾਰੇ ਸਕੂਲਾਂ, ਦਫਤਰਾਂ ਤੇ ਅਦਾਲਤਾਂ ਵਿਚ ਲਾਗੂ ਪੰਜਾਬ ਵਿਧਾਨ ਸਭਾ ‘ਚ ਦੋ ਬਿੱਲ ਪਾਸ

ਚੰਡੀਗੜ : ਪੰਜਾਬ ਦੀ ਰਾਜ ਭਾਸ਼ਾ ਨੂੰ ਹੁਣ ਸਰਕਾਰੀ ਦਫ਼ਤਰਾਂ ਅਤੇ ਅੰਗਰੇਜ਼ੀ ਸਕੂਲਾਂ ਵਿੱਚ ਵੀ ਮਾਣ ਸਨਮਾਨ ਮਿਲਣ ਲੱਗ ਪਵੇਗਾ। ਇੰਨਾ ਹੀ ਨਹੀਂ, ਪੰਜਾਬੀ ਨੂੰ ਨਜ਼ਰਅੰਦਾਜ਼ ਕਰਨ ਵਾਲਿਆਂ ਖਿਲਾਫ਼ ਸਖ਼ਤੀ ਵੀ ਹੋਵੇਗੀ। ਇਤਿਹਾਸਕ ਕਦਮ ਰਾਹੀਂ ਸੂਬੇ ਦੇ ਸਾਰੇ ਸਕੂਲਾਂ ਵਿੱਚ 10ਵੀਂ ਤੱਕ ਪੰਜਾਬੀ ਦੀ ਪੜ੍ਹਾਈ ਲਾਜ਼ਮੀ ਕਰਵਾਉਣ ਅਤੇ ਸਰਕਾਰੀ ਦਫ਼ਤਰਾਂ ਵਿੱਚ ਕੰਮਕਾਰ ਪੰਜਾਬੀ ‘ਚ ਯਕੀਨੀ ਬਣਾਉਣ ਲਈ ਪੰਜਾਬ ਵਿਧਾਨ ਸਭਾ ਵਿੱਚ ਅੱਜ ਦੋ ਬਿੱਲ ਪਾਸ ਕਰ ਦਿੱਤੇ ਗਏ। ਇਹ ਦੋਵੇਂ ਬਿੱਲ ਸਿੱਖਿਆ ਮੰਤਰੀ ਉਪਿੰਦਰਜੀਤ ਕੌਰ ਨੇ ਪੇਸ਼ ਕੀਤੇ। ਸਕੂਲਾਂ ਵਿੱਚ ਅੰਗਰੇਜ਼ੀ ਤੇ ਹਿੰਦੀ ਨੂੰ ਪੜ੍ਹਾਉਣਾ ਵੀ ਯਕੀਨੀ ਬਣਾਇਆ ਜਾਵੇਗਾ। ਇਸ ਸਬੰਧੀ ਪਾਸ ਕੀਤਾ ਗਿਆ ਬਿੱਲ 'ਪੰਜਾਬ ਵਿੱਚ ਪੰਜਾਬੀ ਅਤੇ ਹੋਰ ਭਾਸ਼ਾਵਾਂ ਨੂੰ ਪੜ੍ਹਾਉਣਾ ਬਿੱਲ 2008‘ ਅਗਲੇ ਸਾਲ ਅਪ੍ਰੈਲ ਤੋਂ ਸ਼ੁਰੂ ਹੋ ਰਹੇ ਅਕਾਦਮਿਕ ਸੈਸ਼ਨ ਤੋਂ ਲਾਗੂ ਕੀਤਾ ਜਾਵੇਗਾ ਅਤੇ ਇਸ ਦੇ ਤਹਿਤ ਪਹਿਲੀ ਕਲਾਸ ਤੋਂ ਦਸਵੀਂ ਕਲਾਸ ਵਿੱਚ ਪੜ੍ਹ ਰਹੇ ਸਾਰੇ ਵਿਦਿਆਰਥੀਆਂ ਲਈ ਪੰਜਾਬੀ ਵਿਸ਼ਾ ਲਾਜ਼ਮੀ ਬਣਾਇਆ ਜਾਵੇਗਾ। ਵਿਦਿਆਰਥੀ ਨੂੰ ਦਸਵੀਂ ਦਾ ਸਰਟੀਫਿਕੇਟ ਉਦੋਂ ਤੱਕ ਨਹੀਂ ਦਿੱਤਾ ਜਾਵੇਗਾ ਜਦ ਤੱਕ ਉਹ ਲਾਜ਼ਮੀ ਪੰਜਾਬੀ ਵਿਸ਼ੇ ਦੀ ਸ਼ਰਤ ਪੂਰੀ ਨਹੀਂ ਕਰ ਲੈਂਦਾ। ਇਸ ਬਿੱਲ ਅਨੁਸਾਰ ਤੀਜੀ ਜਮਾਤ ਤੋਂ ਅੱਠਵੀਂ ਜਮਾਤ ਤੱਕ ਹਿੰਦੀ ਨੂੰ ਇੱਕ ਲਾਜ਼ਮੀ ਵਿਸ਼ੇ ਵਜੋਂ ਪੜ੍ਹਾਇਆ ਜਾਵੇਗਾ, ਕਿਸੇ ਵੀ ਸਕੂਲ ਵਿੱਚ ਅੰਗਰੇਜ਼ੀ ਪੜ੍ਹਾਉਣ ‘ਤੇ ਕੋਈ ਪਾਬੰਦੀ ਨਹੀਂ ਹੋਵੇਗੀ। ਇਸ ਬਿੱਲ ਵਿੱਚ ਰਾਜ ਸਰਕਾਰ ਨੂੰ ਇਸ ਐਕਟ ਦੇ ਸਾਰੇ ਜਾਂ ਕਿਸੇ ਵੀ ਉਪਬੰਧਾਂ ਤੋਂ ਕਿਸੇ ਵਰਗ ਜਾਂ ਸ਼੍ਰੇਣੀ ਨੂੰ ਛੋਟ ਦੇਣ ਦਾ ਅਧਿਕਾਰ ਹੋਵੇਗਾ। ਜੇ ਕੋਈ ਸਕੂਲ ਇਸ ਐਕਟ ਦੇ ਉਪਬੰਧਾਂ ਜਾਂ ਇਸਦੇ ਅਧੀਨ ਬਣਾਏ ਗਏ ਨਿਯਮਾਂ ਦੀ ਇੱਕ ਮਹੀਨੇ ਲਈ ਉਲੰਘਣਾ ਕਰਦਾ ਹੈ ਤਾਂ ਪਹਿਲੀ ਵਾਰ ਉਸ ‘ਤੇ 25 ਹਜ਼ਾਰ ਰੁਪਏ ਦਾ ਜੁਰਮਾਨਾ ਕਰਨ ਦੀ ਤਜਵੀਜ਼ ਹੈ ਜੇ ਦੂਜੇ ਮਹੀਨੇ ਵੀ ਇਹੀ ਉਲੰਘਣਾ ਕੀਤੀ ਜਾਂਦੀ ਹੈ ਤਾਂ ਇਹ ਜ਼ੁਰਮਾਨਾ 50 ਹਜ਼ਾਰ ਰੁਪਏ ਹੋ ਸਕਦਾ ਹੈ ਅਤੇ ਤੀਜੀ ਵਾਰ ਉਲੰਘਣਾ ਕਰਨ ‘ਤੇ ਇਹ ਜੁਰਮਾਨਾ 1 ਲੱਖ ਰੁਪਏ ਹੋਵੇਗਾ। ਜੇਕਰ ਕੋਈ ਸਕੂਲ ਇਸ ਦੀ ਇੱਕ ਸਾਲ ਤੋਂ ਵੱਧ ਸਮੇਂ ਲਈ ਉਲੰਘਣਾ ਕਰਦਾ ਹੈ ਤਾਂ ਸਰਕਾਰ ਉਸ ਸਕੂਲ ਨੂੰ ਬੰਦ ਕਰਨ ਦੀ ਹਦਾਇਤ ਜਾਰੀ ਕਰਨ ਲਈ ਅਧਿਕਾਰਤ ਹੋਵੇਗੀ। ਇਸ ਐਕਟ ਅਧੀਨ ਲਗਾਇਆ ਗਿਆ ਜੁਰਮਾਨਾ ਮਾਲੀਏ ਦੇ ਬਕਾਏ ਵਜੋਂ ਵਸੂਲ ਕੀਤਾ ਜਾਵੇਗਾ। ਪੰਜਾਬ ਦਫ਼ਤਰੀ ਭਾਸ਼ਾ ਐਕਟ 1967 (ਸੋਧ) ਬਿੱਲ 2008 ਅਨੁਸਾਰ ਪੰਜਾਬੀ ਨੂੰ ਰਾਜ ਦੀ ਦਫ਼ਤਰੀ ਭਾਸ਼ਾ ਵਜੋਂ ਪੂਰਨ ਤਰੀਕੇ ਨਾਲ ਲਾਗੂ ਕਰ ਦਿੱਤਾ ਗਿਆ ਹੈ। ਜੇਕਰ ਕੋਈ ਅਧਿਕਾਰੀ ਜਾਂ ਕਰਮਚਾਰੀ ਕੋਈ ਕੁਤਾਹੀ ਕਰੇਗਾ ਤਾਂ ਉਸਦੇ ਵਿਰੁੱਧ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ। ਇਸ ਬਿੱਲ ਨੂੰ ਲਾਗੂ ਕਰਨ ਲਈ ਸੂਬਾ ਅਤੇ ਜ਼ਿਲ੍ਹਾ ਪੱਧਰ ‘ਤੇ ਕਮੇਟੀਆਂ ਬਣਾਈਆਂ ਜਾਣਗੀਆਂ। ਸੂਬਾ ਪੱਧਰੀ ਕਮੇਟੀ ਵਿੱਚ ਐਡਵੋਕੇਟ ਜਨਰਲ ਜਾਂ ਉਸਦਾ ਨੁਮਾਇੰਦਾ ਸਾਹਿਤ ਸਭਾਵਾਂ ਦੇ ਦੋ ਮੈਂਬਰ ਅਤੇ ਮੀਡੀਆ ਦੇ ਤਿੰਨ ਨੁਮਾਇੰਦਿਆਂ ਨੂੰ ਵੀ ਨਾਮਜ਼ਦ ਕੀਤਾ ਜਾਵੇਗਾ। ਇਸ ਕਮੇਟੀ ਦੀ ਪ੍ਰਧਾਨਗੀ ਸਿੱਖਿਆ ਮੰਤਰੀ ਕਰਨਗੇ ਅਤੇ ਬਾਕੀ ਮੈਂਬਰਾਂ ਵਿੱਚ ਮੁੱਖ ਮੰਤਰੀ ਦਾ ਮੀਡੀਆ ਸਲਾਹਕਾਰ ਜਾਂ ਉਨ੍ਹਾਂ ਵੱਲੋਂ ਨਾਮਜ਼ਦ ਕੀਤਾ ਨੁਮਾਇੰਦਾ, ਸਿੱਖਿਆ ਸਕੱਤਰ, ਉਚੇਰੀ ਸਿੱਖਿਆ ਸਕੱਤਰ ਅਤੇ ਡਾਇਰੈਕਟਰ ਭਾਸ਼ਾ ਵਿਭਾਗ ਸ਼ਾਮਲ ਹੋਣਗੇ। ਇਸੇ ਤਰ੍ਹਾਂ ਜ਼ਿਲ੍ਹਾ ਪੱਧਰ ਦੀਆਂ ਕਮੇਟੀਆਂ ਵਿੱਚ ਦੋ ਮੈਂਬਰ ਸਾਹਿਤ ਸਭਾਵਾਂ ਅਤੇ ਤਿੰਨ ਮੈਂਬਰ ਮੀਡੀਆ ਵਿੱਚੋਂ ਲਏ ਜਾਣਗੇ। ਜ਼ਿਲ੍ਹਾ ਪੱਧਰ ਦੀ ਕਮੇਟੀ ਦਾ ਚੇਅਰਮੈਨ ਮੁੱਖ ਮੰਤਰੀ ਵੱਲੋਂ ਨਾਮਜ਼ਦ ਸਬੰਧਤ ਜ਼ਿਲ੍ਹੇ ਦਾ ਵਿਧਾਇਕ ਜਾਂ ਮੰਤਰੀ ਹੋਵੇਗਾ। ਇਸ ਬਿੱਲ ਦਾ ਮਹੱਤਵਪੂਰਨ ਪਹਿਲੂ ਇਹ ਹੈ ਕਿ ਇਸ ਦੇ ਅਧੀਨ ਪੰਜਾਬ ਤੇ ਹਰਿਆਣਾ ਹਾਈ ਕੋਰਟ ਤਹਿਤ ਸਾਰੀਆਂ ਦੀਵਾਨੀ ਅਤੇ ਸਾਰੀਆਂ ਫੌਜਦਾਰੀ ਅਦਾਲਤਾਂ, ਸਾਰੀਆਂ ਮਾਲੀ ਅਦਾਲਤਾਂ ਅਤੇ ਕਿਰਾਇਆ ਟ੍ਰਿਬਿਊਨਲਾਂ ਜਾਂ ਪੰਜਾਬ ਸਰਕਾਰ ਵੱਲੋਂ ਗਠਿਤ ਕੀਤੀਆਂ ਹੋਰ ਸਾਰੀਆਂ ਅਦਾਲਤਾਂ ਜਾਂ ਟ੍ਰਿਬਿਊਨਲਾਂ ਵਿੱਚ ਕੰਮਕਾਰ ਪੰਜਾਬੀ ਵਿੱਚ ਕੀਤਾ ਜਾਵੇਗਾ। ਇਸ ਬਿੱਲ ਨੂੰ 6 ਮਹੀਨਿਆਂ ਦੇ ਅੰਦਰ-ਅੰਦਰ ਲਾਗੂ ਕਰਵਾਉਣਾ ਯਕੀਨੀ ਬਣਾਇਆ ਜਾਵੇਗਾ। ਸੂਬਾ ਸਰਕਾਰ ਦੇ ਸਾਰੇ ਦਫ਼ਤਰਾਂ, ਸਰਕਾਰੀ ਖੇਤਰ ਦੇ ਅਦਾਰਿਆਂ, ਬੋਰਡਾਂ ਅਤੇ ਸਥਾਨਕ ਸੰਸਥਾਵਾਂ ਅਤੇ ਰਾਜ ਦੇ ਸਕੂਲਾਂ, ਕਾਲਜਾਂ ਅਤੇ ਯੂਨੀਵਰਸਿਟੀਆਂ ਦੇ ਦਫ਼ਤਰਾਂ ਵਿੱਚ ਸਾਰਾ ਕੰਮਕਾਜ਼ ਪੰਜਾਬੀ ਵਿੱਚ ਕੀਤਾ ਜਾਵੇਗਾ।

ਦੁਨੀਆਂ ਦਾ ਮਹਾਂ ਪ੍ਰਯੋਗ ਸ਼ੁਰੂ ਹੋਇਆ

ਤਿੰਨ ਸਾਲਾਂ ਦੀ ਤਿਆਰੀ ਅਤੇ ਅਨੇਕਾਂ ਮੁਸ਼ਕਿਲਾਂ ਨੂੰ ਪਾਰ ਕਰਦੇ ਹੋਏ ਫਰਾਂਸ ਅਤੇ ਸਵੀਟਜਰਲੈਂਡ ਦੀ ਸੀਮਾਂ ’ਤੇ ਸਭ ਤੋਂ ਵੱਡਾ ਵਿਗਿਆਨਕ ਪ੍ਰਯੋਗ ਸ਼ੁਰੂ ਹੋ ਗਿਆ 27 ਕਿਲੋਮੀਟਰ ਲੰਬੀ ਸੁਰੰਗ ’ਚ ਪਹਿਲੀ ਵਾਰ ਅਣੂਆਂ ਨੂੰ ਛੱੜਿਆ ਗਿਆ ਹੈ ਅਤੇ ਉਹ ਵਿਰੋਧੀ ਦਿਸ਼ਾਵਾਂ ’ਚ ਬਹੁਤ ਤੇਜ਼ੀ ਨਾਲ ਇੱਕ ਦੂਸਰੇ ਨਾਲ ਟਕਰਾਏ, ਉਨ੍ਹਾਂ ਤੋਂ ਮਿਲਣ ਵਾਲੇ ਜਾਣਕਾਰੀ ਧਰਤੀ ਦੀ ਖੋਜ਼ ‘ਬਿਗ ਬੈਂਗ’ ਥਿਓਰੀ ਨੂੰ ਸਮਝਣ ’ਚ ਮਦਦ ਮਿਲੇਗੀ। ਲਾਰਜ ਹੇਡ੍ਰੋਨ ਕੋਲਾਇਡਰ ਮਤਲਬ ਐਲ. ਐਚ. ਸੀ. ਨਾਲ ਜੁੜੇ ਵਿਗਿਆਨਕਾਂ ਨੇ ਤਾੜੀਆਂ ਮਾਰ ਕੇ ਕਣਾਂ ਨੂੰ ਸੁਰੰਗ ’ਚ ਸਫ਼ਲਤਾਪੂਰਵਕ ਛੱਡੇ ਜਾਣ ’ਚ ਖੁਸ਼ੀ ਜ਼ਾਹਿਰ ਕੀਤੀ। ਵਿਗਿਆਨਕਾਂ ਦਾ ਕਹਿਣਾ ਹੈ ਕਿ ਇਸ ਪ੍ਰਯੋਗ ਤੋਂ ਮਿਲਣ ਵਾਲੇ ਅੰਕੜਿਆਂ ਦਾ ਅਧਿਐਨ ਵੀ ਅੱਗੇ ਹਜ਼ਾਰਾਂ ਸਾਲਾਂ ਤੱਕ ਚੱਲਦਾ ਰਹੇਗਾ। ਇਸ ਪ੍ਰਯੋਗ ਬਾਰੇ ਦੁਨੀਆਂ ’ਚ ਕਈ ਜਗ੍ਹਾ ਅਟਕਲਾਂ ਲਾਇਆ ਜਾ ਰਹੀਆਂ ਸਨ ਕਿ ਇਸ ਤੋਂ ‘ਬਲੈਕ ਹੋਲ’ ਦਾ ਨਿਰਮਾਣ ਹੋਵੇਗਾ ਅਤੇ ਜਿਸ ਜਿਸ ਤੋਂ ਧਰਤੀ ਨੂੰ ਖ਼ਤਰਾ ਹੋ ਸਕਦਾ ਹੈ, ਹਾਲਾਂਕਿ ਇਸ ਨਾਲ ਜੁੜੇ ਵਿਗਿਆਨਕਾ ਨੇ ਕਿਹਾ ਕਿ ਸੀ ਕਿ ਇਹ ਪ੍ਰਯੋਗ ਪੂਰੀ ਤਰ੍ਹਾਂ ਨਾਲ ਸੁਰੱਖਿਅਤ ਹੈ। ਇਸ ਪ੍ਰਯੋਗ ਦੇ ਪਹਿਲੇ ਹਿੱਸੇ ਦੌਰਾਨ ਅਣੂਆਂ ਦੇ ਇੱਕ ਸੂਖਮ ਕਣ-ਪ੍ਰੋਟਾਨ ਦਾ ਇਸਤੇਮਾਲ ਕੀਤਾ ਜਾ ਰਿਹਾ ਹੈ। ਫਿਲਹਾਲ ਪ੍ਰੋਟਾਨ ਦੀਆਂ ਪਹਿਲੀਆਂ ਕਿਰਨਾਂ ਨੂੰ 27 ਕਿਲੋਮੀਟਰ ਦੀ ਸੁਰੰਗ ’ਚ ਛੱਡਿਆ ਗਿਆ ਹੈ। ਇਸ ਤੋਂ ਬਾਅਦ ਪ੍ਰੋਟਾਨ ਨੂੰ ਗੋਲਾਕਾਰ ਸੁਰੰਗ ’ਚ ਪਹਿਲੀ ਕਿਰਨਾਂ ਦੇ ਵਿਰੁੱਧ ਦਿਸ਼ਾਵਾਂ ’ਚ ਭੇਜਿਅ ਜਾਵੇਗਾ ਅਤੇ ਕੁਝ ਵਿਸ਼ੇਸ਼ ਸਥਾਨਾਂ ’ਤੇ ਆਪਸ ’ਚ ਟਕਰਾਇਅ ਜਾਵੇਗਾ ਅਤੇ ਫਿਰ ਜਾਣਕਾਰੀ ਇਕੱਠ ਕੀਤੀ ਜਾਵੇਗੀ।
ਇਸ ਅਨੋਖੇ ਪ੍ਰਯੋਗ ’ਤੇ ਪੂਰੀ ਦੁਨੀਆਂ ਦੀ ਨਜ਼ਰ ਲੱਗੀ ਹੋਈ ਹੈ। ਸਵੀਟਰਜ਼ਲੈਂਡ ਅਤੇ ਫਰਾਂਸ ਦੀ ਸੀਮਾ ’ਤੇ ਸਥਾਪਿਤ ਕੀਤਾ ਗਿਆ ਹੈ। ਧਰਤੀ ਨੂੰ ਦੇਖਕੇ ਕੁਝ ਅਨੁਮਾਨ ਨਹੀਂ ਲੱਗਦਾ, ਕਿਉਂਕਿ ਇਹ ਜ਼ਮੀਨ ਤੋਂ 100 ਮੀਟਰ ਥੱਲ੍ਹੇ ਸਥਿਤ ਹੈ। ਇਸ ’ਚ 27 ਕਿਲੋਮੀਟਰ ¦ਬੀ ਇੱਕ ਸੁਰੰਗ ਤਿਆਰ ਕੀਤੀ ਗਈ ਹੈ। ਜਿਸ ’ਚ ਬਹੁਤ ਵੱਡੀ ਪਾਇਪ ਲਾਇਨ ਲਗਾਈ ਗਈ ਹੈ, ਸੈਂਕੜੇ ¦ਬੀ ਮੀਟਰ ¦ਬੀਆਂ ਤਾਰਾਂ ਲੱਗਿਆ ਹਨ। ਇਸ ’ਚ ਇੱਕ ਹਜ਼ਾਰ ਤੋਂ ਜ਼ਿਆਦਾਰ ਬੇਲਨਾਕਾਰ ਚੁੰਬਕਾਂ ਨੂੰ ਜੋੜਿਆ ਗਿਆ ਹੈ। ਇੱਥੇ ਪੂਰਾ ਢਾਂਚਾ ਤਿੰਨ ਅਲੱਗ ਅਲੱਗ ਅਕਾਰ ਦੇ ਗੋਲਾਂ ਨਾਲ ਬਣਾਇਆ ਗਿਆ ਹੈ। ਇਸ ਦਰਮਿਆਨ ਲਾਰਜ ਹੈਡ੍ਰਾਨ ਕੋਲਾਇਡਰ (ਐਲ. ਐਚ. ਸੀ.) ਲਗਾਈ ਗਈ ਹੈ। ਜਿਸ ਤੋਂ ਅਲੱਗ-ਅਲੱਗ ਹਿੱਸੇ ਪ੍ਰਯੋਗਾਂ ਲਈ ਅਲੱਗ-ਅਲੱਗ ਪਰੀਣਾਮ ਦਾ ਵਿਸ਼ਲੇਸ਼ਣ ਕੀਤਾ ਜਾਵੇਗਾ। ਪ੍ਰਯੋਗ ਦੇ ਦੌਰਾਨ ਘੱਟ ਰਹੀ ਭੌਤਿਕ ਘਟਨਾਵਾਂ ਨੂੰ ਦਰਜ ਕਰਨ ਲਈ ਵੱਡੇ ਕੰਪਿਊਟਰ ਢਾਂਚਾ ਤਿਆਰ ਕੀਤਾ ਗਿਆ ਹੈ ਅਤੇ ਇੱਕ ਨਵੇਂ ਨੈਟਵਰਕ ਨਾਲ ਇਸ ਪੂਰੀ ਦੁਨੀਆਂ ਲਈ ਅਲੱਗ ਅਲੱਗ ਹਿੱਸੇ ਕੰਪਿਊਟਰ ਨਾਲ ਜੋੜੇ ਗਏ ਹਨ।
ਕਿਸ ਤਰ੍ਹਾਂ ਦਾ ਹੋਵੇਗਾ ਪ੍ਰਯੋਗ
ਇਸ ਪ੍ਰਯੋਗ ਲਈ ਪ੍ਰੋਟਾਨ ਨੂੰ ਇਸ ਗੋਲਾਕਾਰ ਸੁਰੰਗਾ ’ਚ ਦੋ ਵਿਰੁੱਧ ਦਿਸ਼ਾਵਾਂ ’ਚ ਭੇਜਿਆ ਜਾਵੇਗਾ ਇਨ੍ਹਾਂ ਦੀ ਗਤੀ ਪ੍ਰਕਾਸ਼ ਦੀ ਗਤੀ ਦੇ ਲਗਭਗ ਬਰਾਬਰ ਹੈ ਵਿਗਿਆਨਕ ਦੱਸ ਰਹੇ ਹਨ ਕਿ ਪ੍ਰੋਟਾਨ ਇੱਕ ਸੈਕਿੰਡ ’ਚ 11,000 ਤੋਂ ਵੀ ਜ਼ਿਆਦਾ ਵਾਰ ਘੁੰਮ ਰਹੇ ਹਨ। ਇਸ ਪ੍ਰੀਕ੍ਰਿਆ ਦੇ ਦੌਰਾਨ ਪ੍ਰੋਟਾਨ ਕੁਝ ਵਿਸ਼ੇਸ਼ ਸਥਾਨਾਂ ’ਤੇ ਆਪਸ ’ਚ ਟਕਰਇਆ, ਅਨੁਮਾਲ ਲਾਇਆ ਗਿਆ ਹੈ ਕਿ ਪ੍ਰੋਟਾਨ ਦੇ ਟਕਰਾਉਣ ਦੀ 60 ਕਰੋੜ ਤੋਂ ਵੀ ਜ਼ਿਆਦਾ ਘਟਨਾਵਾਂ ਹੋਣਗੀਆਂ ਅਤੇ ਇਨ੍ਹਾਂ ਘਟਨਾਵਾਂ ਦੇ ਐਲ. ਐਚ. ਸੀ. ਦੇ ਵੱਖਰੇ ਹਿੱਸੇ ’ਚ ਦਰਜ ਕੀਤਾ ਜਾਵੇਗਾ। ਵਿਗਿਆਨਕਾਂ ਦਾ ਕਹਿਣਾ ਹੈਕਿ ਇਸ ਦੌਰਾਨ ਪ੍ਰਤੀ ਸੈਕਿੰਡ ਮੈਗਾਬਾਇਟ ਤੋਂ ਵੀ ਜ਼ਿਆਦਾ ਅੰਕੜੇ ਇਕੱਠੇ ਕੀਤਾ ਜਾ ਸਕਣਗੇ। ਉਨ੍ਹਾਂ ਦਾ ਕਹਿਣਾ ਹੈਕਿ ਪ੍ਰੋਟਾਨ ਦੇ ਟਕਰਾਉਣ ਦੀ ਘਟਨਾ ਸਭ ਤੋਂ ਦਿਲਚਸਪ ਘਟਨਾ ਹੋਵੇਗੀ ਅਤੇ ਇਸ ਤੋਂ ਬ੍ਰਹਿਮੰਡ ਦੇ ਬਣਨ ਦੇ ਕਈ ਅਹਿਮ ਸੁਰਾਗ ਹਾਸਲ ਹੋਣ ਦਾ ਅਨੁਮਾਨ ਲਾਇਆ ਜਾ ਰਿਹਾ ਹੈ।
ਲੰਬੀ ਤਿਆਰੀ
ਇਸ ਲਾਰਜ ਹੈਡਰਨ ਕੋਲਾਈਡ ਦੀ ਕਲਪਨਾ 1980 ਵਿੱਚ ਕੀਤੀ ਗਈ ਸੀ ਅਤੇ ਸਾਲ 1996 ਵਿੱਚ ਇਸ ਪ੍ਰਯੋਜਨਾ ਨੂੰ ਮਨਜ਼ੂਰੀ ਮਿਲ ਗਈ ਸੀ। ਉਦੋਂ ਇਸ ਦੀ ਲਾਗਤ 2.6 ਅਰਬ ਯੂਰੋ ਹੋਣ ਦਾ ਅਨੁਮਾਨ ਲਗਾਇਆ ਗਿਆ ਸੀ। ਬਾਅਦ ਵਿੱਚ ਪਤਾ ਲੱਗਾ ਕਿ ਸਰਨ ਨੇ ਗਲਤ ਅਨੁਮਾਨ ਲਗਾਇਆ ਸੀ ਅਤੇ ਐਲ.ਐਚ.ਸੀ. ਨੂੰ ਪੂਰਾ ਕਰਨ ਲਈ ਬੈਂਕਾਂ ਤੋਂ ਕਰਜ਼ ਵੀ ਲੈਣਾ ਪਿਆ ਸੀ। ਪ੍ਰਯੋਜਨਾ ਨੂੰ ਪੂਰਾ ਕਰਨ ਵਿੱਚ ਸ਼ੁਰੂਆਤੀ ਅੰਦਾਜ਼ੇ ਦੀ ਤੁਲਨਾ ਵਿੱਚ 4 ਗੁਣਾ ਵਧੇਰੇ ਪੈਸਾ ਲੱਗ ਗਿਆ। ਇਸ ਦੇ ਨਿਰਮਾਣ ਦੌਰਾਨ ਅਨੇਕਾਂ ਪੁਰਜ਼ਿਆਂ ਨੇ ਧੋਖਾ ਦਿੱਤਾ। ਨਿਰਮਾਣ ਦੀਆਂ ਸਮੱਸਿਆਵਾਂ ਸਾਹਮਣੇ ਆਈਆਂ ਅਤੇ ਨਤੀਜਾ ਇਹ ਹੋਇਆ ਕਿ ਪ੍ਰਯੋਜਨਾ ਵਿੱਚ ਦੋ ਸਾਲ ਦੀ ਦੇਰੀ ਹੋ ਗਈ। ਭਾਰਤੀ ਵਿਗਿਆਨਕ ਅਰਚਨਾ ਸ਼ਰਮਾ ਨੇ ਦੱਸਿਆ ਕਿ ਇਸ ਪ੍ਰਯੋਜਨਾ ਵਿੱਚ ਮੁੱਖ ਰੂਪ ਵਿੱਚ ਯੂਰਪੀ ਸੰਘ ਦੇ 20 ਦੇਸ਼ ਅਤੇ 6 ਗੈਰ ਮੈਂਬਰ ਦੇਸ਼ ਮਿਲ ਕੇ ਕੰਮ ਕਰ ਰਹੇ ਹਨ। ਉਂਜ ਇਸ ਪੂਰੇ ਤਜ਼ਰਬੇ ਨਾਲ ਕੋਈ 100 ਤੋਂ ਵੱਧ ਦੇਸ਼ਾਂ ਦੇ ਹਜ਼ਾਰਾਂ ਵਿਗਿਆਨਕ ਜੁੜੇ ਹੋਏ ਹਨ।

ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਵਿਧਾਨ ਸਭਾ ‘ਚੋਂ ਬਰਖਾਸਤ

ਚੰਡੀਗੜ੍ਹ, 10 ਸਤੰਬਰ 2008 - ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੂੰ ਅੱਜ ਵਿਧਾਨ ਸਭਾ ਚੋਂ ਬਰਖਾਸਤ ਕਰ ਦਿੱਤਾ ਗਿਆ ਅਤੇ ਉਨ੍ਹਾਂ ਦੀ ਸੀਟ ਖਾਲੀ ਐਲਾਨ ਦਿੱਤੀ ਗਈ। ਇਸ ਸਬੰਧੀ ਇਕ ਪਸਤਾਵ ਹਾਕਮ ਪਾਰਟੀ ਸ੍ਰੋਮਣੀ ਅਕਾਲੀ ਦਲ ਦੇ ਵਿਧਾਇਕ ਹਰੀਸ਼ ਰਾਏ ਨੇ ਪੇਸ਼ ਕੀਤਾ ਜਿਸ ਨੂੰ ਕਾਂਗਰਸੀ ਮੈਂਬਰਾਂ ਦੀ ਨਾਅਰੇਬਾਜ਼ੀ ਅਤੇ ਵਿਰੋਧ ਪ੍ਰਦਰਸ਼ਨ ਦੇ ਦੌਰਾਨ ਪਾਸ ਕਰ ਦਿੱਤਾ ਗਿਆ। ਕਾਂਗਰਸੀ ਮੈਂਬਰਾਂ ਨੇ ਵਿਧਾਨ ਸਭਾ ਦੀ ਕਾਰਵਾਈ ਦਾ ਬਾਈਕਾਟ ਕੀਤਾ। ਪਸਤਾਵ ਦੇ ਅਨੁਸਾਰ ਚੋਣ ਕਮਿਸ਼ਨ ਨੂੰ ਉਪ ਚੋਣ ਕਰਵਾਉਣ ਦੀ ਅਪੀਲ ਕੀਤੀ ਜਾਵੇਗੀ ਅਤੇ ਵਿਜੀਲੈਂਸ ਬਿਊਰੋ ਨੂੰ ਅੰਮ੍ਰਿਤਸਰ ਜ਼ਮੀਨ ਘੁਟਾਲੇ ਦੀ ਜਾਂਚ ਕਰਨ ਲਈ ਕਿਹਾ ਜਾਵੇਗਾ। ਇਸ ਸਬੰਧ ਵਿਚ ਜਾਂਚ ਲਈ ਕੇਵਲ ਦੋ ਮਹੀਨੇ ਦਿੱਤੇ ਜਾਣਗੇ। ਇਸ ਮਾਮਲੇ ਵਿਚ ਅਮਰਿੰਦਰ ਸਿੰਘ ਨੂੰ ਦੋਸ਼ੀ ਠਹਿਰਾਇਆ ਗਿਆ ਸੀ। ਪਟਿਆਲਾ ਤੋਂ ਪ੍ਰਤੀਨਿਧਤਾ ਕਰਨ ਵਾਲੇ 66 ਸਾਲਾ ਕਾਂਗਰਸੀ ਨੇਤਾ ਨੂੰ ਵਿਧਾਨ ਸਭਾ ਦੀ ਇਕ ਵਿਸ਼ੇਸ਼ ਕਮੇਟੀ ਨੇ ਉਨ੍ਹਾਂ ਦੇ ਮੁੱਖ ਮੰਤਰੀ ਸ਼ਾਸਨ ਕਾਲ ਵਿਚ ਅੰਮ੍ਰਿਤਸਰ ਵਿਚ ਨਿੱਜੀ ਵਿਕਾਸ ਲਈ 32.10 ਏਕੜ ਜ਼ਮੀਨ ਮੁਕਤ ਵਿਚ ਬੇਨਿਯਮੀਆਂ ਨੂੰ ਲੈ ਕੇ ਦੋਸ਼ੀ ਠਹਿਰਾਇਆ ਸੀ। ਹਾਕਮ ਪਾਰਟੀ ਸ੍ਰੋਮਣੀ ਅਕਾਲੀ ਦਲ ਨੇ ਆਪਣੇ ਵਿਧਾਇਕਾਂ ਨੂੰ ਵਿਪ ਜਾਰੀ ਕਰਕੇ ਵਿਧਾਨ ਸਭਾ ਵਿਚ ਹੋਣ ਵਾਲੀ ਚਰਚਾ ਦੇ ਦੌਰਾਨ ਮੌਜੂਦ ਰਹਿਣ ਲਈ ਕਿਹਾ ਸੀ। 117 ਮੈਂਬਰੀ ਵਿਧਾਨ ਸਭਾ ਵਿਚ ਸ੍ਰੋਮਣੀ ਅਕਾਲੀ ਦਲ ਦੇ 49, ਇਸਦੇ ਭਾਈਵਾਲ ਭਾਜਪਾ ਦੇ 19 ਅਤੇ ਮੁੱਖ ਵਿਰੋਧੀ ਪਾਰਟੀ ਕਾਂਗਰਸ ਦੇ 44 ਮੈਂਬਰ ਹਨ।ਬਾਕੀ ਪੰਜ ਆਜ਼ਾਦ ਵਿਧਾਇਕ ਹਨ। ਉੱਧਰ ਬਾਦਲ ਸਰਕਾਰ ‘ਤੇ ਬਦਲੇ ਦੀ ਭਾਵਨਾ ਤਹਿਤ ਕਾਰਵਾਈ ਕਰਨ ਦਾ ਦੋਸ਼ ਲਗਾਉਂਦੇ ਹੋਏ ਅਮਰਿੰਦਰ ਸਿੰਘ ਨੇ ਕਿਹਾ ਕਿ ਉਨ੍ਹਾਂ ਦੀ ਗ੍ਰਿਫਤਾਰੀ ਦੀ ਸੰਭਾਵਨਾ ਹੈ ਪਰ ਉਹ ਪੇਸ਼ਗੀ ਜ਼ਮਾਨਤ ਨਹੀਂ ਲੈਣਗੇ।

ਮਹਾਰਾਣੀ ਪ੍ਰਨੀਤ ਕੌਰ ਵੀ ਅੱਜ ਹਾਜ਼ਰ ਸਨ ਵਿਧਾਨ ਸਭਾ ਦਰਸ਼ਕ ਗੈਲਰੀ ’ਚ

-ਪੰਜਾਬ ਵਿਧਾਨ ਸਭਾ ਦੇ ਇਤਿਹਾਸਕ ਦਿਨ ਦਾ ਨਜ਼ਾਰਾ ਦੇਖਣ ਲਈ ਅੱਜ ਜਿਥੇ ਦਰਸ਼ਕ ਗੈਲਰੀਆਂ ਭਰੀਆਂ ਹੋਈਆਂ ਸਨ ਉਥੇ ਸਪੀਕਰ ਗੈਲਰੀ ਵਿਚ ਮਹਾਰਾਣੀ ਪ੍ਰਨੀਤ ਕੌਰ ਮੈਂਬਰ ਪਾਰਲੀਮੈਂਟ ਪਤਨੀ ਕੈਪਟਨ ਅਮਰਿੰਦਰ ਸਿੰਘ ਸਾਬਕਾ ਮੁੱਖ ਮੰਤਰੀ ਪੰਜਾਬ, ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਮਹਿੰਦਰ ਸਿੰਘ ਕੇ.ਪੀ., ਮੁੱਖ ਮੰਤਰੀ ਦੇ ਸਲਾਹਕਾਰ ਡਾ. ਦਲਜੀਤ ਸਿੰਘ ਚੀਮਾ, ਸਾਬਕਾ ਮੰਤਰੀ ਗੁਰਦੇਵ ਸਿੰਘ ਬਾਦਲ ਤੇ ਹੋਰ ਬਿਰਾਜਮਾਨ ਸਨ, ਜਦਕਿ ਅਧਿਕਾਰੀਆਂ ਦੇ ਬੈਂਚ ਵਿਚ ਵੀ ਬੈਠਣ ਨੂੰ ਥਾਂ ਹੀਂ ਸੀ। ਮੁੱਖ ਸਕੱਤਰ ਰਮੇਸ਼ ਇੰਦਰ ਸਿੰਘ ਸਮੇਤ ਭਾਰੀ ਗਿਣਤੀ ਵਿਚ ਸੀਨੀਅਰ ਅਧਿਕਾਰੀ ਹਾਜ਼ਰ ਸਨ। ਇਨ੍ਹਾਂ ਤੋਂ ਇਲਾਵਾ ਮੁੱਖ ਮੰਤਰੀ ਸ. ਪ੍ਰਕਾਸ਼ ਸਿੰਘ ਬਾਦਲ ਦੀ ਸੀਟ ਪਿੱਛੇ ਪੰਜਾਬ ਦੇ ਐਡਵੋਕੇਟ ਜਨਰਲ ਹਰਦੇਵ ਸਿੰਘ ਮੱਤੇਵਾਲ ਵੀ ਸਦਨ ਵਿਚ ਹਾਜ਼ਰ ਸਨ। ਪ੍ਰੈ¤ਸ ਵਾਲੇ ਵੀ ਭਾਰੀ ਗਿਣਤੀ ਵਿਚ ਹਾਜ਼ਰ ਸਨ।

ਅਮਰਿੰਦਰ ਖਿਲਾਫ਼ ਫੈਸਲਾ ਇਕਤਰਫਾ, ਗੈਰ ਕਾਨੂੰਨੀ-ਕੇ.ਪੀ.

ਚੰਡੀਗੜ੍ਹ, (ਹਰੀਸ਼ ਚੰਦਰ ਬਾਗਾਂਵਾਲਾ)-ਪੰਜਾਬ ਪ੍ਰਦੇਸ਼ ਕਾਂਗਰਸ ਕਮੇਟੀ ਦੇ ਪ੍ਰਧਾਨ ਮਹਿੰਦਰ ਸਿੰਘ ਕੇ.ਪੀ. ਨੇ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦੀ ਵਿਧਾਨ ਸਭਾ ਦੀ ਮੈਂਬਰੀ ਖ਼ਤਮ ਕਰਨ ਦੇ ਫੈਸਲੇ ’ਤੇ ਟਿਪਣੀ ਕਰਦਿਆਂ ਕਿਹਾ ਕਿ ਇਹ ਇਕਤਰਫਾ ਤੇ ਗੈਰ ਕਾਨੂੰਨੀ ਫੈਸਲਾ ਹੈ। ਉਨ੍ਹਾਂ ਵਿਧਾਨ ਸਭਾ ਦੀ ਵਿਸ਼ੇਸ਼ ਕਮੇਟੀ ’ਤੇ ਹੀ ਸੁਆਲੀਆ ਨਿਸ਼ਾਨ ਲਾਉਂਦਆਂ ਕਿਹਾ ਕਿ ਹੈਦਰਾਬਾਦ ਵਿਚ ਹੋਈ ਅਸੈਂਬਲੀ ਕਾਨਕਲੇਵ ਦੇ 9ਵੇਂ ਚੈਪਟਰ ਵਿਚ ਇਹ ਫੈਸਲਾ ਲਿਆ ਗਿਆ ਸੀ ਕਿ ਪਿਛਲੀ ਵਿਧਾਨ ਸਭਾ ਦਾ ਕੋਈ ਵੀ ਮਾਮਲਾ ਅਗਲੀ ਵਿਧਾਨ ਸਭਾ ਵਿਚ ਨਹੀਂ ਲਿਆਂਦਾ ਜਾ ਸਕਦਾ। ਇਸ ਦੇ ਨਾਲ ਹੀ ਵਿਸ਼ੇਸ਼ ਕਮੇਟੀ ਦਾ ਮੁਖੀ ਮੰਤਰੀ ਜਾਂ ਪਾਰਲੀਮਾਨੀ ਸਕੱਤਰ ਨਹੀਂ ਹੋ ਸਕਦਾ। ਉਨ੍ਹਾਂ ਕਿਹਾ ਕਿ ਪਿਛਲੀ ਵਿਧਾਨ ਸਭਾ ਵਿਚ ਇਹ ਮਾਮਲਾ ਬੀਰਦਵਿੰਦਰ ਸਿੰਘ ਨੇ ਉਦੋਂ ਦੇ ਸਥਾਨਕ ਸਰਕਾਰਾਂ ਬਾਰੇ ਮੰਤਰੀ ਚੌਧਰੀ ਜਗਜੀਤ ਸਿੰਘ ਖਿਲਾਫ਼ ਉਠਾਇਆ ਸੀ ਨਾ ਕਿ ਕੈਪਟਨ ਅਮਰਿੰਦਰ ਸਿੰਘ ਖਿਲਾਫ਼। ਸ੍ਰੀ ਕੇ.ਪੀ. ਜੋ ਕਿ ਅੱਜ ਸਾਰਾ ਸਮਾਂ ਵਿਧਾਨ ਸਭਾ ਵਿਚ ਬੈਠੇ ਰਹੇ, ਨੇ ਬਾਅਦ ਵਿਚ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ ਇਸ ਸਬੰਧ ਵਿਚ ਪਾਰਟੀ ਕੀ ਰੁਖ਼ ਅਪਣਾਏਗੀ ਇੲ ਬਾਰੇ ਛੇਤੀ ਹੀ ਫੈਸਲਾ ਲੈ ਲਿਆ ਜਾਵੇਗਾ। ਉਨ੍ਹਾਂ ਕਿਹਾ ਕਿ ਸਮੁੱਚੀ ਪਾਰਟੀ ਕੈਪਟਨ ਅਮਰਿੰਦਰ ਸਿੰਘ ਦੇ ਨਾਲ ਹੈ।

ਜੰਮੂ-ਕਸ਼ਮੀਰ ਵਿੱਚ ਸਥਾਈ ਅਮਨ ਕਾਇਮ ਕਰਨ ਲਈ ਦੋਵਾਂ ਕਸ਼ਮੀਰਾਂ ਨੂੰ ਯੂ.ਐੱਨ.ਓ ਦੇ ਸਪੁਰਦ ਕੀਤਾ ਜਾਵੇ : ਮਾਨ

ਸ਼੍ਰੀਨਗਰ, 10 ਸਤੰਬਰ (ਗੁਰਜੰਟ ਸਿੰਘ ਕੱਟੂ) :- ਹਿੰਦੋਸਤਾਨ ਅਤੇ ਪਾਕਿਸਤਾਨ ਵਿਚਲੇ ਕਸ਼ਮੀਰ ਖਿੱਤਿਆਂ ਨੂੰ ਯੂ.ਐਨ.ਓ ਦੀ ਟਰੱਸਟੀ ਕੌਂਸਿਲ ਦਾ ਹਿੱਸਾ ਐਲਾਨ ਕੇ ਇਸਦਾ ਸਿੱਧਾ ਪ੍ਰਬੰਧ ਯੂ.ਐਨ.ਓ ਨੂੰ ਦਿੱਤਾ ਜਾਵੇ ਅਤੇ ਅੰਤਰ ਰਾਸ਼ਟਰੀ ਕਾਨੂੰਨ ਅਨੁਸਾਰ ਇਹਨਾ ਦੋਨਾਂ ਖਿੱਤਿਆਂ ਦੀ ਰਾਇਸੁਮਾਰੀ ਕਰਵਾ ਕੇ ਇੱਥੋ ਦੇ ਲੋਕਾਂ ਨੂੰ ਬਣਦਾ ਹੱਕ ਦਿੱਤਾ ਜਾਵੇ। ਇਹ ਵਿਚਾਰ ਸ: ਸਿਮਰਨਜੀਤ ਸਿੰਘ ਮਾਨ, ਪ੍ਰਧਾਨ, ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਨੇ ਹੁਰੀਅਤ ਆਗੂ ਸ਼ਬੀਰ ਸ਼ਾਹ ਦੇ ਗ੍ਰਹਿ ਨਿਵਾਸ ਵਿਖੇ ਹੁਰੀਅਤ ਨੇਤਾਵਾਂ ਦੇ ਭਰਵੇਂ ਇਕੱਠ ਨੂੰ ਸੰਬੋਧਨ ਕਰਦਿਆਂ ਇੱਕ ਪ੍ਰੈਸ ਕਾਨਫਰੰਸ ਦੌਰਾਨ ਕਹੇ।
ਸ: ਸਿਮਰਨਜੀਤ ਸਿੰਘ ਮਾਨ ਨੇ ਕਿਹਾ ਕਿ ਜੰਮੂ ਕਸ਼ਮੀਰ ਵਿੱਚ ਸਥਾਈ ਅਮਨ ਅਮਾਨ ਨੂੰ ਬਹਾਲ ਕਰਨ ਲਈ ਅਜਿਹਾ ਕਰਨਾ ਬਹੁਤ ਜ਼ਰੂਰੀ ਹੈ ਤਾਂ ਜੋ ਇਹ ਸੂਬਾ ਮੁੜ ਵਿਕਾਸ ਦੀਆਂ ਲੀਹਾਂ ਤੇ ਆ ਸਕੇ। ਸ: ਮਾਨ ਨੇ ਕਿਹਾ ਕਿ ਹਿੰਦੋਸਤਾਨ ਦੀ ਹਕੂਮਤ ਲੰਮੇ ਸਮੇਂ ਤੋ ਕਸ਼ਮੀਰੀ ਆਵਾਮ ਨੂੰ ਮਿਲਟਰੀ ਤਾਕਤ ਦੇ ਜ਼ੋਰ ਨਾਲ ਦਬਾ ਕੇ ਉੱਥੋ ਦੇ ਸੱਭਿਆਚਾਰ ਤੇ ਇਤਿਹਾਸ ਨੂੰ ਤਹਿਸ ਮਹਿਸ ਕਰਨ ਤੇ ਲੱਗੀ ਹੋਈ ਹੈ, ਜੋ ਕਿ ਯੁਨੀਵਰਸਲ ਰਾਈਟਸ ਡੈਮੋਕਰੇਟਿਕ ਨਾਲ ਸਬੰਧਿਤ ਅੰਤਰ ਰਾਸ਼ਟਰੀ ਸੰਸਥਾ ਦੀ ਸਿੱਧੀ ਉਲੰਘਣਾ ਹੈ ਕਿ ਹਿੰਦ ਹਕੂਮਤ ਸਰਾਇਨ ਬੋਰਡ ਬਣਾ ਕੇ ਹਿੰਦੂ ਧਰਮ ਅਸਥਾਨਾਂ ਦਾ ਪ੍ਰਬੰਧ ਚਲਾਉਣ ਲਈ ਸਰਕਾਰੀ ਤੌਰ ਤੇ ਇਹਨਾ ਟਰੱਸਟਾਂ ਨੂੰ ਪ੍ਰਬੰਧਕ ਲਗਾ ਕੇ ਹਿੰਦੋਸਤਾਨ ਦੇ ਮੂਲ ਸਿਧਾਂਤ ਧਰਮ ਨਿਰਪੱਖਤਾ ਦੀਆਂ ਧੱਜੀਆਂ ਉਡਾ ਰਹੀ ਹੈ ਜਦੋ ਕਿ ਹਿੰਦੋਸਤਾਨ ਦਾ ਸਿਧਾਂਤ ਕਿਸੇ ਧਰਮ ਨੂੰ ਬੜਾਵਾ ਦੇਣ ਲਈ ਸਰਕਾਰੀ ਸਾਧਨਾਂ ਦੀ ਵਰਤੋਂ ਕਰਨ ਦੀ ਇਜ਼ਾਜਤ ਨਹੀਂ ਦਿੰਦਾ। ਪਰ ਜੰਮੂ ਕਸ਼ਮੀਰ ਵਿੱਚ ਇੱਥੋ ਦੇ ਗਵਰਨਰ ਸ਼੍ਰੀ ਸਿਨਹਾ ਨੇ ਅਜਿਹਾ ਕਰਕੇ ਹਿੰਦੋਸਤਾਨ ਦੇ ਧਰਮ ਨਿਰਪੱਖਤਾ ਦੇ ਸਿਧਾਂਤ ਨੂੰ ਚੈਲੰਜ ਕੀਤਾ ਹੈ। ਇਸ ਮੁਤੱਸਵੀ ਸੋਚ ਦੇ ਗਵਰਨਰ ਨੂੰ ਕਾਨੂੰਨੀ ਦਾਇਰੇ ਹੇਠ ਬਣਦੀ ਸਜ਼ਾ ਦੇਣੀ ਚਾਹੀਦੀ ਹੈ। ਸ: ਮਾਨ ਨੇ ਕਿਹਾ ਕਿ ਹਿੰਦੋਸਤਾਨ ਦੀ ਹਕੂਮਤ ਘੱਟ ਗਿਣਤੀਆਂ ਨੂੰ ਹਿੰਦੂਤਵ ਵਿੱਚ ਜ਼ਜਬ ਕਰਕੇ ਇੱਥੇ ਹਿੰਦੂ ਰਾਜ ਕਾਇਮ ਕਰਨਾ ਚਾਹੁੰਦੀ ਹੈ। ਇਸੇ ਵਜ਼ਾ ਕਰਕੇ ਇੱਥੇ ਵਸਣ ਵਾਲੀਆਂ ਘੱਟ ਗਿਣਤੀ ਕੌਮਾਂ ਆਪਣੀ ਹੋਂਦ ਬਚਾਉਣ ਲਈ ਜੱਦੋ ਜਹਿਦ ਕਰ ਹਰੀਆਂ ਹਨ। ਇਸੇ ਨੀਤੀ ਤਹਿਤ ਹਿੰਦ ਹਕੂਮਤ ਨੇ ਕਸ਼ਮੀਰੀ ਆਗੂ ਜਨਾਬ ਅਜ਼ੀਜ ਤੇ ਹੋਰ ਹੁਰੀਅਤ ਆਗੂਆਂ ਨੂੰ ਸ਼ਹੀਦ ਕਰ ਦਿੱਤਾ ਹੈ ਤੇ ਸ਼ਬੀਰ ਸਾਹਿਬ ਵਰਗੇ ਪ੍ਰਮੁੱਖ ਨੇਤਾਵਾਂ ਨੂੰ ਜੇ਼ਲਾਂ ਵਿੱਚ ਬੰਦ ਕਰਕੇ ਕਸ਼ਮੀਰੀ ਆਵਾਮ ਨੂੰ ਦਬਾ ਰਹੀ ਹੈ।
ਇਸ ਪ੍ਰੈੱਸ ਨੂੰ ਸੰਬੋਧਨ ਕਰਨ ਤੋਂ ਬਾਅਦ ਸ: ਮਾਨ ਹੁਰੀਅਤ ਆਗੂਆਂ ਦੇ ਨਾਲ ਜਨਾਬ ਅਬਦੁੱਲ ਅਜੀਜ਼ ਦੀ ਕਬਰ ਤੇ ਦੁਸ਼ਾਲਾ ਭੇਂਟ ਕਰਕੇ ਉਸਦੀ ਆਤਮਿਕ ਸ਼ਾਤੀ ਲਈ ਤੇ ਕਸ਼ਮੀਰੀ ਭਾਈਚਾਰੇ ਦੀ ਚੜ੍ਹਦੀ ਕਲਾ ਲਈ ਅਰਦਾਸ ਕੀਤੀ। ਇਸ ਮੌਕੇ ਜਨਾਬ ਕਲਾਮ ਫਰੂਕੀ, ਮੁਹੰਮਦ ਅਬਦੁੱਲ ਤਾਹਿਰ ਅਤੇ ਹੋਰ ਹੁਰੀਅਤ ਆਗੂਆਂ ਨੇ ਸਿੱਖ ਮੁਸਲਿਮ ਏਕਤਾ ਦਾ ਸਵਾਗਤ ਕਰਦਿਆਂ ਸ: ਮਾਨ ਨੂੰ ਭਰੋਸਾ ਦਿਵਾਇਆ ਕਿ ਕਸ਼ਮੀਰੀ ਸਿੱਖਾਂ ਦੇ ਹਿੱਤਾਂ ਦੀ ਰੱਖਿਆ ਨੂੰ ਯਕੀਨੀ ਬਣਾਉਣ ਲਈ ਉਹ ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਦਾ ਹਰ ਤਰਾਂ ਨਾਲ ਸਹਿਯੋਗ ਦੇਣਗੇ। ਇਸ ਮੌਕੇ ਹੋਰਨਾ ਤੋਂ ਇਲਾਵਾ ਐਡਵੋਕੇਟ ਮੁਹੰਮਦ ਆਮੀਨ, ਪਾਰਟੀ ਦੇ ਜਨਰਲ ਸਕੱਤਰ ਜਸਕਰਨ ਸਿੰਘ ਕਾਹਨ ਸਿੰਘ ਵਾਲਾ, ਪਾਰਟੀ ਦੇ ਮੀਤ ਪ੍ਰਧਾਨ ਜਸਪਾਲ ਸਿੰਘ, ਗੁਰਸੇਵਕ ਸਿੰਘ ਜਵਾਹਰਕੇ, ਸਰਪੰਚ ਰਜਿੰਦਰ ਸਿੰਘ ਜਵਾਹਰਕੇ, ਯੂਥ ਆਗੂ ਗੁਰਪ੍ਰੀਤ ਸਿੰਘ ਝੱਬਰ, ਮਨੁੱਖੀ ਅਧਿਕਾਰਾਂ ਦੇ ਆਗੂ ਐਡਵੋਕੇਟ ਸਿਮਰਨਜੀਤ ਸਿੰਘ, ਐਡਵੋਕੇਟ ਕਰਨਰਾਜ ਸਿੰਘ ਚਾਹਲ, ਹੁਰੀਅਤ ਆਗੂ ਨਰਿੰਦਰ ਪਾਲ ਸਿੰਘ, ਸੁਖਜੀਵਨ ਸਿੰਘ ਕੁੱਸਾ, ਪਰਮਜੀਤ ਸਿੰਘ ਤੇ ਪ੍ਰਗਟ ਸਿੰਘ ਆਦਿ ਆਗੂ ਮੌਜੂਦ ਸਨ।

ਤੇਲ ਦੀ ਕੀੰਮਤ ਧੜੰਮ ਹੇਠਾਂ

ਲੰਡਨ-ਤੇਲ ਦੀ ਇੱਕ ਦਮ ਡਿਗੀ ਕੀੰਮਤ ਨੇ ਓਪਿਕ ਦੇਸ਼ਾਂ ਨੂੰ ਤੇਲ ਦੇ ਉਤਪਾਦਨ ਵਿੱਚ ਕਟੌਤੀ ਕਰਣ ਲਈ ਸੋਚਣ ਤੇ ਮਜਬੂਰ ਕਰ ਦਿੱਤਾ ਹੈ। ਅਸਟਰੀਆਂ ਦੀ ਰਾਜਧਾਨੀ ਵਿਆਨਾ ਵਿੱਚ ਮੀਟੰਗ ਕਰਕੇ ਓਪਿਕ ਦੇਸਾਂ ਦੇ ਸੰਗਠਨ ਦੇ ਪ੍ਰਧਾਨ ਮਿਸਟਰ ਖਲੀਲ ਨੇ ਕਿਹਾ ਹੈ ਕਿ 40 ਦਿਨ ਦੇ ਅੰਦਰ ਤੇਲ ਪੈਦਾ ਕਰਨ ਵਿੱਚ ਪੰਜ ਲੱਖ ਵੀਹ ਹਜਾਰ ਬੈਰਲ ਪ੍ਰਤੀ ਦਿਨ ਦੀ ਕਟੌਤੀ ਕੀਤੀ ਜਾਵੇਗੀ।ਅਪ੍ਰੈਲ ਤੋਂ ਲੈ ਕੇ ਹੁਣ ਤੱਕ ਤੇਲ ਦੀ ਕੀਮਤ ਡਿੱਗਣ ਵਿੱਚ ਇਹ ਸਭ ਤੋਂ ਵੱਡੀ ਮਾਤਰਾ ਹੈ ਜਿਸ ਨਾਲ ਬੈਰਲ ਦਾ ਭਾਅ100 ਡਾਲਰ ਤੋਂ ਹੇਠਾਂ ਹੋ ਗਿਆ ਹੈ।ਤੇਲ ਦੀ ਕੀਮਤ ਦਾ ਇਸ ਤਰਾਂ ਡਿਗਣਾ ਪਹਿਲੀ ਵਾਰ ਹੋਇਆ ਹੈ ਜਦੋਂ ਕਿ ਕੀਮਤ ਇੱਕ ਵਾਰ ਸਾਰੇ ਰਿਕਾਰਡ ਮਾਤ ਪਾ ਕੇ 147 ਡਾਲਰ ਪ੍ਰਤੀ ਬੈਰਲ ਪਹੁੰਚ ਗਈ ਸੀ।ਕੀਮਤ ਡਿਗਣ ਦਾ ਇੱਕ ਕਾਰਣ ਇਹ ਹੈ ਕਿ ਸਾਰੇ ਸੰਸਾਰ ਦੀ ਅਕਾਨਮੀ ਮੰਦੀ ਹੋਣ ਕਰਕੇ ਤੇਲ ਦੀ ਮੰਗ ਵਿੱਚ ਵੀ ਘਾਟ ਆਈ ਹੈ।ਤੇਲ ਉਤਪਾਦਿਕ ਦੇਸ਼ਾਂ ਵਲੋਂ ਸਪਲਾਈ ਵਿੱਚ ਵਾਧਾ ਕੀਤਾ ਗਿਆ ਸੀ।ਪਰ ਇਸ ਦੇ ਨਾਲ ਇਹ ਵੀ ਜਿਕਰਯੋਗ ਹੈ ਕਿ ਤੇਲ ਦੇ ਵੱਡੀ ਮਾਤਰਾ ਵਿੱਚ ਭੰਡਾਰ ਰੱਖਣ ਵਾਲਾ ਦੇਸ਼ ਮਲੇਸ਼ੀਆ ਓਪਿਕ ਤੋਂ ਬਾਹਰ ਹੋ ਗਿਆ ਹੈ।

ਮੁੰਬਈ ‘ਚ ਸਾਰੇ ਨਾਗਰਿਕਾਂ ਨੂੰ ਸਨਮਾਨ ਦੇ ਨਾਲ ਰਹਿਣ ਦਾ ਅਧਿਕਾਰ ਹੈ- ਮੁੰਬਈ ਪੁਲਿਸ

ਮੁੰਬਈ, 10 ਸਤੰਬਰ 2008 - ਰਾਜ ਠਾਕਰੇ ਅਤੇ ਬਾਲੀਵੁੱਡ ਵਿਵਾਦ ਗਰਮਾਉਂਦਾ ਹੀ ਜਾ ਰਿਹਾ ਹੈ। ਰਾਜ ਠਾਕਰੇ ਅਤੇ ਅਮਿਤਾਬ ਬੱਚਨ ਦੇ ਪਰਿਵਾਰ ਦੇ ਵਿਚਾਲੇ ਚਲ ਰਹੇ ਵਿਵਾਦ ਦੌਰਾਨ ਬੁੱਧਵਾਰ ਨੂੰ ਮੁੰਬਈ ਦੇ ਜੁਆਇੰਟ ਪੁਲਿਸ ਕਮਿਸ਼ਨਰ ਕੇ.ਐਲ. ਪ੍ਰਸਾਦ ਨੇ ਕਿਹਾ ਕਿ ਮੁੰਬਈ ਕਿਸੇ ਦੇ ਬਾਪ ਦੀ ਨਹੀਂ ਹੈ। ਇੱਥੇ ਦੇਸ਼ ਦੇ ਸਾਰੇ ਨਾਗਰਿਕਾਂ ਨੂੰ ਸਨਮਾਨ ਦੇ ਨਾਲ ਰਹਿਣ ਦਾ ਅਧਿਕਾਰ ਹੈ। ਇਸ ਤੋਂ ਪਹਿਲਾਂ ਅਮਿਤਾਬ ਬੱਚਨ ਨੇ ਕਿਹਾ ਕਿ ਜਯਾ ਦੇ ਬਿਆਨ ਵਿਚ ਕੁਝ ਵੀ ਗਲਤ ਨਹੀਂ ਹੈ। ਮੈਨੂੰ ਅਤੇ ਮੇਰੇ ਪਰਿਵਾਰ ਨੂੰ ਇਸ ਲਈ ਨਿਸ਼ਾਨਾ ਬਣਾਇਆ ਜਾ ਰਿਹਾ ਹੈ ਕਿਉਂਕਿ ਮੇਰਾ ਪਰਿਵਾਰ ਮਸ਼ਹੂਰ ਹੈ। ਗੌਰਤਲਬ ਹੈ ਕਿ ਆਪਣੇ ਬਲਾਗ ‘ਤੇ ਅਮਿਤਾਬ ਬੱਚਨ ਨੇ ਭਾਰਤੀ ਹੋਣ ‘ਤੇ ਮਾਣ ਜਤਾਉਂਦੇ ਹੋਏ ਲਿਖਾ ਸੀ ਕਿ ਅੱਜ ਉਨ੍ਹਾਂ ਦੇ ਪਰਿਵਾਰ ਦੇ ਕੋਲ ਜੋ ਕੁਝ ਵੀ ਹੈ, ਉਹ ਮਹਾਰਾਸ਼ਟਰ ਅਤੇ ਮੁੰਬਈ ਦੀ ਦੇਣ ਹੈ। ਉਨ੍ਹਾਂ ਨੇ ਕਿਹਾ ਕਿ ਉਨ੍ਹਾਂ ਨੇ ਅਤੇ ਉਨ੍ਹਾਂ ਦੇ ਪਰਿਵਾਰ ਨੇ ਮਹਾਰਾਸ਼ਟਰ ਦਾ ਅਪਮਾਨ ਨਹੀਂ ਕੀਤਾ ਹੈ। ਇਕ ਟੀਵੀ ਚੈਨਲ ਨੂੰ ਇੰਟਰਵਿਊ ਵਿਚ ਉਨ੍ਹਾਂ ਨੇ ਕਿਹਾ ਕਿ ਜੇਕਰ ਜਯਾ ਦੇ ਬਿਆਨ ਨਾਲ ਕਿਸੇ ਦੀ ਵੀ ਭਾਵਨਾ ਨੂੰ ਠੇਸ ਪਹੁੰਚੀ ਹੈ ਤਾਂ ਉਹ ਹੱਥ ਜੋੜ ਕੇ ਮੁਆਫੀ ਮੰਗਦੇ ਹਨ।

ਦੁਨੀਆਂ ਖਤਮ ਹੋਣ ਦੇ ਡਰ ਤੋਂ ਲੜਕੀ ਨੇ ਜਾਨ ਦਿੱਤੀ

ਇੰਦੌਰ, 10 ਸਤੰਬਰ 2008 -ਮੱਧ ਪ੍ਰਦੇਸ਼ ਦੇ ਰਾਜਗੜ੍ਹ ਜ਼ਿਲ੍ਹੇ ਵਿਚ ਇਕ ਲੜਕੀ ਨੇ ਕਥਿਤ ਤੌਰ ‘ਤੇ ਦੁਨੀਆਂ ਖਤਮ ਹੋਣ ਦੀ ਦਹਿਸ਼ਤ ਵਿਚ ਰਾਤ ਨੂੰ ਜ਼ਹਿਰ ਖਾ ਲਿਆ। ਉਸਦੀ ਅੱਜ ਇੰਦੌਰ ਦੇ ਇਕ ਹਸਪਤਾਲ ਵਿਚ ਮੌਤ ਹੋ ਗਈ। ਪੁਲਿਸ ਸੂਤਰਾਂ ਨੇ ਦੱਸਿਆ ਕਿ ਲੜਕੀ ਦੀ ਪਛਾਣ ਛਾਇਆ ਦੇ ਰੂਪ ਵਿਚ ਹੋਈ ਹੈ। ਉਹ ਰਾਜਗੜ੍ਹ ਜ਼ਿਲ੍ਹੇ ਦੇ ਸਾਰੰਗਪੁਰ ਨਾਲ ਸਬੰਧ ਰੱਖਦੀ ਹੈ। ਮ੍ਰਿਤਕਾਂ ਦੇ ਪਰਿਵਾਰਕ ਮੈਂਬਰਾਂ ਨੇ ਦੱਸਿਆ ਕਿ ਛਾਇਆ ਪਿਛਲੇ ਦੋ ਦਿਨ ਤੋਂ ਟੀਵੀ ‘ਤੇ ਜਿਨੀਵਾ ਵਿਚ ਅੱਜ ਹੋ ਰਹੇ ਵਿਗਿਆਨਕ ਮਹਾਂਪ੍ਰਯੋਗ ਨਾਲ ਜੁੜੀਆਂ ਖਬਰਾਂ ਦੇਖ ਰਹੀ ਸੀ। ਗੌਰਤਲਬ ਹੈ ਕਿ ਕੁਝ ਨਿਊਜ਼ ਚੈਨਲ ਮਹਾਂਪ੍ਰਯੋਗ ਦੌਰਾਨ ਦੁਨੀਆਂ ਖਤਮ ਹੋਣ ਦੇ ਖਤਰੇ ‘ਤੇ ਕੇਂਦਰਿਤ ਖਬਰਾਂ ਦਾ ਲਗਾਤਾਰ ਪ੍ਰਸਾਰਨ ਦੇਖ ਰਹੀ ਸੀ। ਵਿਸ਼ਵ ਦਾ ਵਿਗਿਆਨਕ ਭਾਈਚਾਰਾ ਮਹਾਂਪ੍ਰਯੋਗ ਦੇ ਜ਼ਰੀਏ ਬ੍ਰਹਿਮੰਡ ਵਿਚ ਮੌਜੂਦ ਰਹੱਸ ਜਾਣਨ ਲਈ ਕੋਸ਼ਿਸ਼ ਕਰ ਰਿਹਾ ਹੈ। ਛਾਇਆ ਦੇ ਪਰਿਵਾਰਕ ਮੈਂਬਰਾਂ ਦੀ ਮੰਨੀਏ ਤਾਂ ਉਹ ਇਨ੍ਹਾਂ ਖਬਰਾਂ ਨੂੰ ਦੇਖਣ ਦੇ ਬਾਅਦ ਇਸ ਹੱਦ ਤੱਕ ਘਬਰਾ ਗਈ ਕਿ ਉਸਨੇ ਸਲਫਾਸ ਦੀਆਂ ਗੋਲੀਆਂ ਖਾ ਲਈਆਂ। ਕਿਸ਼ੋਰੀ ਨੂੰ ਗੰਭੀਰ ਹਾਲਤ ਵਿਚ ਇੰਦੌਰ ਦੇ ਇਕ ਹਸਪਤਾਲ ਵਿਚ ਭਰਤੀ ਕਰਵਾਇਆ ਗਿਆ ਪਰ ਉਸਦੀ ਜਾਨ ਨਹੀਂ ਬਚਾਈ ਜਾ ਸਕੀ। ਪੁਲਿਸ ਨੇ ਇਸ ਸਿਲਸਿਲੇ ਵਿਚ ਮਾਮਲਾ ਦਰਜ ਕਰ ਲਿਆ ਗਿਆ ਹੈ।

ਨਵਨਿਰਮਾਣ ਸੈਨਾ ਦੇ ਹਮਲੇ ਦੇ ਬਾਅਦ ਅਮਿਤਾਬ ਬੱਚਨ ਦੀ ਫਿਲਮ ਦਾ ਪ੍ਰੀਮੀਅਰ ਰੱਦ

ਚੰਡੀਗੜ੍ਹ, 10 ਸਤੰਬਰ 2008 -ਮਹਾਰਾਸ਼ਟਰ ਨਵਨਿਰਮਾਣ ਸੈਨਾ ਦੇ ਕਾਰਕੁੰਨਾਂ ਦੇ ਇਕ ਮਲਟੀਪਲੇਕਸ ਵਿਚ ਹਮਲੇ ਦੇ ਬਾਅਦ ਅੱਜ ਅਮਿਤਾਬ ਬੱਚਨ ਦੀ ਫਿਲਮ ਦ ਲਾਸਟ ਲੀਅਰ ਦਾ ਪ੍ਰੀਮੀਅਰ ਰੱਦ ਕਰ ਦਿੱਤਾ ਗਿਆ। ਫਿਲਮ ਦੇ ਡਾਇਰੈਕਟਰ ਪਲਾਨਮਾਨ ਮੋਸ਼ਨ ਪਿਕਚਰਸ ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ ਸ਼ੁਭੋ ਸ਼ੇਖਰ ਭੱਟਾਚਾਰੀਆ ਨੇ ਦੱਸਿਆ ਕਿ ਸੁਰੱਖਿਆ ਕਾਰਨਾਂ ਦੇ ਚਲਦੇ ਹੋਏ ਫਿਲਮ ਦਾ ਪ੍ਰੀਮੀਅਰ ਰੱਦ ਕਰ ਦਿੱਤਾ ਗਿਆ ਹੈ। ਅੱਜ ਸਵੇਰੇ ਮਲਟੀਪਲੇਕਸ ‘ਤੇ ਇਕ ਗਰੁੱਪ ਦੁਆਰਾ ਕੀਤੇ ਗਏ ਹਮਲੇ ਨੂੰ ਦੇਖਦੇ ਹੋਏ ਇਹ ਫੈਸਲਾ ਕੀਤਾ ਗਿਆ ਹੈ। ਇਸ ਮਲਟੀਪਲੇਕਸ ਵਿਚ ਇਹ ਪ੍ਰੀਮੀਅਰ ਹੋਣਾ ਸੀ। ਉਨ੍ਹਾਂ ਨੇ ਦੱਸਿਆ ਕਿ ਅਸੀਂ ਨਹੀਂ ਚਾਹੁੰਦੇ ਕਿ ਸਾਡੇ ਮਹਿਮਾਨ ਕਿਸੇ ਵੀ ਤਰ੍ਹਾਂ ਦੀ ਮੁਸੀਬਤ ਵਿਚ ਫਸਣ। ਅਸੀਂ ਕੱਲ ਦਿੱਲੀ ਜਾਵਾਂਗੇ ਅਤੇ ਉੱਥੇ ਹੀ ਪ੍ਰੀਮੀਅਰ ਕਰਾਂਗੇ। ਜਦੋਂ ਉਨ੍ਹਾਂ ਨੂੰ 12 ਸਤੰਬਰ ਨੂੰ ਫਿਲਮ ਰਿਲੀਜ਼ ਹੋਣ ‘ਤੇ ਕਿਸੇ ਸੰਕਟ ਬਾਰੇ ਪੁੱਛਿਆ ਗਿਆ ਤਾਂ ਉਨ੍ਹਾਂ ਨੇ ਕਿਹਾ ਕਿ ਨਿਰਮਾਤਾਵਾਂ ਨੂੰ ਉਮੀਦ ਹੈ ਕਿ ਸਥਿਤੀ ਉਦੋਂ ਤੱਕ ਆਮ ਹੋ ਜਾਵੇਗੀ।

ਨਗਰ ਕੌਸਲ ’ਚ ਹੋ ਰਹੀ ਹੈ ਪੰਜਾਬੀ ਭਾਸ਼ਾ ਦੀ ਬੇਕਦਰੀ

ਮਾਛੀਵਾੜਾ 10 ਸਤੰਬਰ (ਸੁਸ਼ੀਲ ਸ਼ਰਮਾ) ਨਗਰ ਕੌਸਲ ਦੇ ਦਫ਼ਤਰ ਵਿੱਚ ਕੁਰਸੀਆਂ ਤੇ ਵਿਰਾਜਮਾਨ ਦਫ਼ਤਰ ਅਧਿਕਾਰੀ ਰਾਜ ਭਾਸ਼ਾ ਪੰਜਾਬੀ ਦੀ ਬੇਕਦਰੀ ਕਰਨ ਵਿੱਚ ਪਹਿਲੇ ਨੰਬਰ ਤੇ ਹਨ । ਸੂਬੇ ਵਿੱਚ ਪੰਜਾਬੀ ਭਾਸ਼ਾ ਲਾਗੂ ਕਰਨ ਦੇ ਪੰਜਾਬ ਸਰਕਾਰ ਦੇ ਹੁਕਮਾਂ ਨੂੰ ਇਹ ਅਫ਼ਸਰ ਸ਼ਾਇਦ ਟਿੱਚ ਸਮਝਦੇ ਹਨ, ਕੁੱਝ ਅਜਿਹੀ ਹੀ ਮਿਸਾਲ ਦਫ਼ਤਰ ਨਗਰ ਕੌਸਲ ਮਾਛੀਵਾੜਾ ਵਿੱਚ ਦੇਖਣ ਨੂੰ ਮਿਲਿਆ ਹੈ। ਇਨ੍ਹਾਂ ਦਫ਼ਤਰਾਂ ਦੇ ਬਾਹਰ ਲੱਗੀਆਂ ਨਾਵਾਂ ਦਾ ਪਲੇਟਾ ਅੰਗਰੇਜ਼ੀ ਭਾਸ਼ਾ ਵਿੱਚ ਲਿਖੀਆਂ ਹੋਈਆਂ ਹਨ। ਦਫ਼ਤਰ ਦੇ ਕਾਰਜ ਸਾਧਕ ਅਫਸਰ ਹਰਦੀਪ ਸਿੰਘ ਤੇ ਨਗਰ ਕੌਸਲ ਦੇ ਪ੍ਰਧਾਨ ਉਜਾਗਰ ਸਿੰਘ ਬੈਨੀਪਾਲ ਦੋਵੇ ਅਧਿਕਾਰੀਆਂ ਦੇ ਨਾਮ ਅੰਗਰੇਜੀ ਭਾਸ਼ਾ ਦੇ ਵੱਡੇ ਅੱਖਰਾਂ ਵਿੱਚ ਦਫ਼ਤਰ ਦੇ ਅਧਿਕਾਰੀਆਂ ਦੇ ਕਮਰੇ ਅੱਗੇ ਲਿਖੇ ਹੋਏ ਹਨ । ਇਸ ਸਬੰਧੀ ਕਾਰਜ ਸਾਧਕ ਅਫ਼ਸਰ ਹਰਦੀਪ ਸਿੰਘ ਨਾਲ ਗੱਲ ਕਰਨ ਤੇ ਉਨ੍ਹਾਂ ਕਿਹਾ ਕਿ ਇਹ ਨਾਮ ਪਲੇਟਾਂ ਪਿਛਲੇ ਸਮੇਂ ਦੀਆਂ ਲੱਗੀਆਂ ਹਨ ਪਰ ਹੁਣ ਨਗਰ ਪੰਚਾਇਤ ਤੋਂ ਨਗਰ ਕੌਸਲ ਵਿੱਚ ਤਬਦੀਲ ਹੋ ਗਈ ਹੈ, ਅੱਜ ਹੀ ਇਹ ਪਲੇਟਾਂ ਪੰਜਾਬੀ ਭਾਸ਼ਾ ਵਿੱਚ ਲਿੱਖ ਕੇ ਲਗਾ ਦਿੱਤੀਆਂ ਜਾਣਗੀਆਂ ।