ਭਾਈ ਅਮਰੀਕ ਸਿੰਘ ਦੀ ਗ੍ਰਿਫਤਾਰੀ ਦੀ ਸ਼੍ਰੋਮਣੀ ਅਕਾਲੀ ਦਲ ਅੰਮ੍ਰਿਤਸਰ ਯੂਥ ਵਿੰਗ ਜਰਮਨੀ ਵਲੋਂ ਕਰੜੇ ਸ਼ਬਦਾਂ ਚ ਨਿਖੇਧੀ
ਹਰਨਾਮ ਸਿੰਘ ਧੁੰਮਾ ਟਕਸਾਲ ਲਈ ਇਕ ਵੱਡਾ ਖਤਰਾ

ਪਿਛਲੇ ਦਿਨੀ ਭਾਈ ਹਰਜਿੰਦਰ ਸਿੰਘ ਜਿੰਦਾ ਅਤੇ ਭਾਈ ਸੁਖਦੇਵ ਸਿੰਘ ਸੁੱਖਾ ਦੀ ਬਰਸੀ ਵਿੱਚ ਸ਼ਾਮੁਲੀਅਤ ਕਰਨ ਜਾ ਰਹੇ ਭਾਈ ਅਮਰੀਕ ਸਿੰਘ ਅਜਨਾਲਾ ਨੂੰ ਪੁਲਿਸ ਵਲੋਂ ਗ੍ਰਿਫਤਾਰ ਕਰ ਝੂਠੇ ਕੇਸਾਂ ਦੀ ਬਦੌਲਤ ਜੇਲ ਭੇਜਣ ਦੀ ਮੰਦਭਾਗੀ ਘਟਨਾ ਦੀ ਸ਼੍ਰੋਮਣੀ ਅਕਾਲੀ ਦਲ ਅੰਮ੍ਰਿਤਸਰ ਯੂਥ ਵਿੰਗ ਜਰਮਨੀ, ਅਮਰੀਕਾ ਅਤੇ ਯੂ.ਕੇ ਵਲੋਂ ਤਿੱਖੇ ਸ਼ਬਦਾਂ ਚ ਨਿਖੇਧੀ ਕੀਤੀ ਗਈ।ਯੂਥ ਵਿੰਗ ਜਰਮਨੀ ਦੇ ਪ੍ਰਧਾਨ ਭਾਈ ਭੁਪਿੰਦਰ ਸਿੰਘ, ਯੂਥ ਵਿੰਗ ਜਰਮਨੀ ਦੇ ਜਨਰਲ ਸਕੱਤਰ ਭਾਈ ਸੁਖਪ੍ਰੀਤ ਸਿੰਘ, ਅਮਰੀਕਾ ਤੋਂ ਭਾਈ ਹਰਮਿੰਦਰਪਾਲ ਸਿੰਘ, ਯੂ.ਕੇ ਤੋਂ ਯੂਥ ਵਿੰਗ ਪ੍ਰਧਾਨ ਭਾਈ ਕੁਲਵੰਤ ਸਿੰਘ ਮਠੱਡਾ, ਜਨਰਲ ਸਕੱਤਰ ਭਾਈ ਸਤਿੰਦਰਪਾਲ ਸਿੰਘ ਮੰਗੁਵਾਲ ਨੇ ਕਿਹਾ ਕਿ ਪੰਜਾਬ ਅਤੇ ਭਾਰਤ ਸਰਕਾਰ ਦੀਆਂ ਕੂੜ ਨੀਤੀਆਂ ਦਾ ਇਸ ਤੋਂ ਵੱਡਾ ਸਬੂਤ ਹੋਰ ਕੀ ਹੋ ਸਕਦਾ ਹੈ ਕਿ ਹਰ ਉਹ ਗੁਰਸਿੱਖ ਜੋ ਕੌਮ ਦੇ ਹੱਕ ਦੀ ਅਵਾਜ ਬੁਲੰਦ ਕਰਦਾ ਹੈ, ਨੂੰ ਝੂਠੇ ਕੇਸ਼ਾਂ ਚ ਉਲਝਾ ਜੇਲ ਭੇਜ ਦਿੱਤਾ ਜਾਂਦਾ ਹੈ।ਇਸ ਮੰਦਭਾਂਗੀ ਘਟਨਾ ਨੂੰ ਹਿੰਦੁਵਾਦੀ ਸਰਕਾਰ ਦਾ ਸਿਂਖ ਵਿਰੋਧੀ ਪੈਂਤੜਾ ਦੱਸਦਿਆਂ ਉਹਨਾ ਕਿਹਾ ਕਿ ਮੌਜੂਦਾ ਸਰਕਾਰ ਨੂੰ ਆਉਣ ਵਾਲੀਆਂ ਚੋਣਾ ਵਿੱਚ ਸਿੱਖੀ ਸਿਧਾਂਤਾਂ ਤੇ ਪਹਿਰਾ ਦੇ ਰਹੀ ਹਰ ਉਸ ਸਖਸ਼ੀਅਤ ਤੋਂ ਖਤਰਾ ਮਹਿਸੂਸ ਹੋ ਰਿਹਾ ਹੈ, ਜਿਸ ਕਰਕੇ ਸਰਕਾਰ ਇਹੋ ਜਿਹੀਆਂ ਹਰਕਤਾਂ ਨੂੰ ਹੜਬੜਾਹਟ ਵਿੱਚ ਅੰਜਾਮ ਦੇ ਰਹੀ ਹੈ ਅਤੇ ਇਹੋ ਜਿਹੇ ਕੂੜ ਕਾਰਨਾਮਿਆਂ ਨੂੰ ਸਰਕਾਰ ਆਪਣੇ ਹਰਨਾਮ ਸਿੰਘ ਧੁੰਮੇ ਵਰਗੇ ਕਾਰਕੁੰਨਾ ਦੀ ਮਦਦ ਨਾਲ ਨੇਪਰੇ ਚ੍ਹਾੜ ਰਹੀ ਹੈ।ਭਾਰਤ ਸਰਕਾਰ ਦੀ ਅੱਖਾਂ ਚ ਰੜਕ ਰਹੀ ਮਹਾਨ ਟਕਸਾਲ ਹੁਣ ਸਰਕਾਰ ਦੀ ਹਿੱਟ ਲਿਸਟ ਤੇ ਪਹਿਲੇ ਸਥਾਨ ਤੇ ਜਾਪਦੀ ਹੈ ਇਹੀ ਕਾਰਨ ਹੈ ਕਿ ਟਕਸਾਲ ਵਿੱਚ ਘੁਸਪੈਠ ਕਰ ਟਕਸਾਲ ਨੂੰ ਮੁਢੋਂ ਖਤਮ ਕਰਨਾ ਭਾਰਤ ਸਰਕਾਰ ਦਾ ਮੁੱਖ ਏਜੰਡਾ ਹੈ ਅਤੇ ਇਸ ਵਿੱਚ ਮੌਜੂਦਾ ਟਕਸਾਲੀ ਅਹੁਦੇਦਾਰਾਂ ਦੀ ਸ਼ਾਮੁਲੀਅਤ ਨੂੰ ਨਜਰਅੰਦਾਜ ਨਹੀ ਕੀਤਾ ਜਾ ਸਕਦਾ।
ਟਕਸਾਲ ਦੀ ਮਹੱਤਤਾ ਨੂੰ ਮੁੱਖ ਰੱਖਦਿਆਂ ਅਤੇ ਟਕਸਾਲ ਦੇ ਪਾਏ ਪੂਰਨਿਆਂ ਤੇ ਚੱਲਣ ਵਾਲੀ ਇੱਕੋ ਇੱਕ ਨਿਡਰ ਅਤੇ ਨਿਧੱੜਕ ਸਖਸ਼ੀਅਤ ਭਾਈ ਅਮਰੀਕ ਸਿੰਘ ਜੀ ਅਜਨਾਲਾ ਨੂੰ ਗ੍ਰਿਫਤਾਰ ਕਰ ਬਾਦਲ ਸਰਕਾਰ ਵਲੋਂ ਟਕਸਾਲ ਦੀ ਮਰਿਯਾਦਾ ਨੂੰ ਢਾਹ ਲਾਉਣ ਦੀ ਬੇਤੁਕੀ ਕੋਸ਼ਿਸ਼ ਨੂੰ ਅਸਫਲ ਬਣਾਉਣਾ ਹਰ ਇੱਕ ਗੁਰਸਿਂਖ ਦਾ ਜੋ ਸਿਂਖੀ ਸਿਧਾਂਤਾਂ ਨਾਲ ਜੁੜਿਆ ਹੈ, ਹਰ ਉਸ ਨੌਜਵਾਨ ਦਾ ਜੋ ਪੰਥਕ ਦਰਦੀ ਹੈ, ਦਾ ਮੁਢਲਾ ਫਰਜ ਹੈ।ਟਕਸਾਲ ਕਿਸੇ ਦੀ ਨਿੱਝੀ ਜਗੀਰ ਨਹੀ ਪਰ ਇਸੇ ਭੁਲੇਖੇ ਵਿੱਚ ਮੌਜੂਦਾ ਅਹੁਦੇਦਾਰ ਆਪਣੀਆਂ ਵਿਕਾਉ ਨੀਤੀਆਂ ਨਾਲ ਟਕਸਾਲ ਦੀ ਮਹਾਨ ਛਵੀ ਨੂੰ ਦਾਗਦਾਰ ਕਰਨ ਦੀ ਕੋਈ ਕਸਰ ਨਹੀ ਛੱਡ ਰਹੇ।ਸਮੇਂ ਦੀ ਮੰਗ ਹੈ ਕਿ ਮੌਜੂਦਾ ਟਕਸਾਲ ਦੇ ਅਹੁਦੇਦਾਰਾਂ ਨੂੰ ਸੇਵਾ ਮੁਕਤ ਕਰ ਭਾਈ ਅਮਰੀਕ ਸਿੰਘ ਵਰਗੀ ਢੁਕਵੀਂ ਸਖਸ਼ੀਅਤ ਨੂੰ ਇਸ ਮਹਾਨ ਟਕਸਾਲ ਦੀ ਵਾਗਡੋਰ ਸੰਭਾਲੀ ਜਾਵੇ ਤਾਂ ਜੋ ਸ੍ਰੀ ਗੁਰੂ ਗੋਬਿੰਦ ਸਿੰਘ ਜੀ ਵਲੋਂ ਸਥਾਪਤਿ ਕੀਤੀ ਗਈ ਇਸ ਮਹਾਨ ਅਤੇ ਪਵਿੱਤਰ ਟਕਸਾਲ ਨੂੰ ਹਿੰਦੁਵਾਦੀ ਘੁਸਪੈਠ ਤੋਂ ਬਚਾਇਆ ਜਾ ਸਕੇ।

ਡੇਰਾ ਸੌਦਾ ਮੁਖੀ ਦੀ ਅਗਲੀ ਪੇਸ਼ੀ 7 ਨਵੰਬਰ ਨੂੰ

ਡੇਰਾ ਸੌਦਾ ਸਿਰਸਾ ਦੇ ਮੁਖੀ ਗੁਰਮੀਤ ਰਾਮ ਰਹੀਮ ਦੀ ਅੰਬਾਲਾ ਦੀ ਸੀਬੀਆਈ ਅਦਾਲਤ ਵਿਚ ਪੇਸ਼ੀ ਸਿਰਸਾ ਦੀ ਅਦਾਲਤ ਵਿਚ ਵੀਡੀਓ ਕਾਨਫਰੰਸਿੰਗ ਰਾਹੀਂ ਹੋਈ। ਇਸ ਮੌਕੇ ਜ਼ਿਲ੍ਹਾ ਪੁਲਿਸ ਵੱਲੋਂ ਸਖ਼ਤ ਸੁਰੱਖਿਆ ਪ੍ਰਬੰਧ ਕੀਤੇ ਗਏ ਸਨ। ਅਦਾਲਤ ਨੇ ਇਸ ਮਾਮਲੇ ਦੀ ਅਗਲੀ ਪੇਸ਼ੀ 7 ਨਵੰਬਰ ਮੁਕੱਰਰ ਕਰ ਦਿੱਤੀ ਹੈ। ਡੇਰਾ ਮੁਖੀ ਅੱਜ ਅਦਾਲਤ ਵਿਚ ਪੇਸ਼ ਹੋ ਕੇ ਵੀਡੀਓ ਕਾਨਫਰੰਸਿੰਗ ਰਾਹੀਂ ਅੰਬਾਲਾ ਦੀ ਸੀਬੀਆਈ ਅਦਾਲਤ ਵਿਚ ਚੱਲ ਰਹੇ ਪੱਤਰਕਾਰ ਰਾਮ ਚੰਦਰ ਛੱਤਰਪਤੀ ਕਤਲ ਕਾਂਡ ਕੇਸ ਵਿਚ ਪੇਸ਼ ਹੋਇਆ। ਡੇਰਾ ਮੁਖੀ ਅੱਜ ਅਦਾਲਤ ਵਿਚ ਸਵੇਰੇ ਲਗਭਗ 10 ਵਜ ਕੇ 40 ਮਿੰਟ ‘ਤੇ ਪਹੁੰਚਾ ਅਤੇ ਸਵਾ ਤਿੰਨ ਵਜੇ ਤੱਕ ਅਦਾਲਤ ਵਿਚ ਰਹੇ। ਇਸ ਮੌਕੇ ਉਸ ਦੇ ਨਾਲ ਜ਼ੈੱਡ ਸੁਰੱਖਿਆ ਦੇ ਜਵਾਨਾਂ ਤੋਂ ਇਲਾਵਾ ਆਪਣੇ ਨਿੱਜੀ ਸੁਰੱਖਿਆ ਕਰਮੀ ਵੀ ਸਨ। ਇਸ ਮੌਕੇ ਡੇਰਾ ਮੁਖੀ ਦੀ ਸੁਰੱਖਿਆ ਲਈ ਜ਼ਿਲ੍ਹਾ ਪੁਲਿਸ ਵੱਲੋਂ ਵੱਡੀ ਗਿਣਤੀ ਵਿਚ ਪੁਲਿਸ ਅਦਾਲਤ ਕੰਪਲੈਕਸ ਦੇ ਆਲੇ-ਦੁਆਲੇ ਤਾਇਨਾਤ ਕੀਤੀ ਗਈ ਸੀ। ਡੇਰਾ ਮੁਖੀ ਦੇ ਸ਼ਰਧਾਲੂ ਵੀ ਡੇਰਾ ਸੱਚਾ ਸੌਦਾ ਤੋਂ ਲੈ ਕੇ ਅਦਾਲਤ ਕੰਪਲੈਕਸ ਤੱਕ ਸੜਕ ਦੇ ਦੋਵਾਂ ਪਾਸਿਆਂ ‘ਤੇ ਤਾਇਨਾਤ ਸਨ।
ਚੇਤੇ ਰਹੇ ਕਿ ਸੀਬੀਆਈ ਦੀ ਅੰਬਾਲਾ ਅਦਾਲਤ ਵਿਚ ਡੇਰਾ ਮੁਖੀ ਦੇ ਖਿਲਾਫ਼ ਸਿਰਸਾ ਦੇ ਪੱਤਰਕਾਰ ਰਾਮ ਚੰਦਰ ਛੱਤਰਪਤੀ ਤੋਂ ਇਲਾਵਾ ਡੇਰੇ ਦੇ ਇਕ ਸ਼ਰਧਾਲੂ ਰਣਜੀਤ ਸਿੰਘ ਨੂੰ ਕਤਲ ਕਰਨ ਅਤੇ ਡੇਰੇ ਦੀਆਂ ਸਾਧਵੀਆਂ ਨਾਲ ਬਲਾਤਕਾਰ ਕਰਨ ਦੇ ਕੇਸ ਚੱਲ ਰਹੇ ਹਨ। ਇਨ੍ਹਾਂ ਕੇਸਾਂ ਵਿਚ ਡੇਰਾ ਮੁਖੀ ਪਹਿਲਾਂ ਅੰਬਾਲਾ ਦੀ ਅਦਾਲਤ ਵਿਚ ਪੇਸ਼ੀ ਲਈ ਜਾਂਦਾ ਸੀ ਪਰ ਉਸ ਦੀ ਸੁਰੱਖਿਆ ਦੇ ਮੱਦੇਨਜ਼ਰ ਹੁਣ ਉਸਦੀ ਪੇਸ਼ੀ ਸਿਰਸਾ ਦੀ ਅਦਾਲਤ ਵਿਚ ਬਣੇ ਵੀਡੀਓ ਕਾਨਫਰੰਸਿੰਗ ਸਿਸਟਮ ਰਾਹੀਂ ਹੁੰਦੀ ਹੈ।

ਅਮਰੀਕੀ ਫੌਜ ‘ਚ ਸਿੱਖ ਨੂੰ ਪਗੜੀ ਬੰਨਣ ਤੇ ਵਾਲ ਰੱਖਣ ਦੀ ਇਜਾਜ਼ਤ

ਅਮਰੀਕੀ ਫੌਜ ਨੇ ਪਹਿਲੀ ਵਾਰ ਕਿਸੇ ਅਜਿਹੇ ਸਿੱਖ ਨੂੰ ਫੌਜ ਵਿੱਚ ਭਰਤੀ ਹੋਣ ਦੀ ਆਗਿਆ ਦਿੱਤੀ ਹੈ, ਜਿਸ ਨੇ ਪਗੜੀ ਬੰਨਣ ਤੇ ਵਾਲ ਕਟਵਾਉਣ ਦੀ ਭਰਤੀ ਸ਼ਰਤ ਨੂੰ ਪੂਰਾ ਕਰਨ ਤੋਂ ਇਨਕਾਰ ਕਰ ਦਿੱਤਾ ਸੀ। ਭਾਵੇਂ ਅਮਰੀਕੀ ਫੌਜ ਵੱਲੋਂ ਇਹ ਫੈਸਲਾ ਕੈਪਟਨ ਕੰਵਲਜੀਤ ਸਿੰਘ ਕਲਸੀ ਨਾਂ ਦੇ ਇੱਕ ਸਿੱਖ ਵਿਅਕਤੀ ਦੇ ਕੇਸ ਵਿੱਚ ਹੀ ਲਿਆ ਗਿਆ ਹੈ ਪਰ ਇਸ ਫੈਸਲੇ ਕਾਰਨ ਸਿੱਖ ਭਾਈਚਾਰੇ ਵਿੱਚ ਵੱਡੀ ਖੁਸ਼ੀ ਦੀ ਲਹਿਰ ਪਾਈ ਜਾ ਰਹੀ ਹੈ।
ਜ਼ਿਕਰਯੋਗ ਹੈ ਕਿ ਕੈਪਟਨ ਕੰਵਲਜੀਤ ਸਿੰਘ ਕਲਸੀ ਤੇ ਤੇਜਦੀਪ ਸਿੰਘ ਰਤਨ ਨਾਂ ਦੇ ਦੋ ਸਿੱਖ ਵਿਅਕਤੀ ਸਿਹਤ ਪ੍ਰੋਫੈਸ਼ਨਜ਼ ਸਕਾਲਰਸ਼ਿਪ ਯੋਜਨਾ ਤਹਿਤ ਕਈ ਸਾਲ ਪਹਿਲਾਂ ਫੌਜ ‘ਚ ਭਰਤੀ ਹੋਏ ਸਨ। ਦੋਹਾਂ ਨੇ ਪਗੜੀ ਦੇ ਨਾਲ ਹੀ ਚਾਰ ਸਾਲ ਦੀ ਸਿਖਲਾਈ ਲਈ ਸੀ ਤੇ ਉਨ੍ਹਾਂ ਫੌਜੀ ਸਿਹਤ ਵਿਭਾਗ ‘ਚ ਕੰਮ ਕੀਤਾ ਸੀ।
ਸਿਖਲਾਈ ਤੋਂ ਬਾਅਦ ਪੱਕੀ ਭਰਤੀ ਲਈ ਉਨ੍ਹਾਂ ਨੂੰ ਪਗੜੀ ਉਤਾਰਨ ਤੇ ਵਾਲ ਕਟਾਉਣ ਲਈ ਕਿਹਾ ਗਿਆ ਸੀ ਪਰ ਉਨ੍ਹਾਂ ਧਾਰਮਿਕ ਪਹਿਚਾਣ ਦਾ ਹਵਾਲਾ ਦੇ ਕੇ ਇਹ ਹੁਕਮ ਠੁਕਰਾ ਦਿੱਤਾ ਸੀ।
ਇਸ ਤੋਂ ਬਾਅਦ ਇਨ੍ਹਾਂ ਦੋਹਾਂ ਨੇ ਪਗੜੀ ਬੰਨ੍ਹਣ ਤੇ ਵਾਲ ਰੱਖਣ ਲਈ ਇੱਕ ਅਪੀਲ ਪਾਈ ਸੀ। ਇਸ ਅਪੀਲ ਦੀ ਸੁਣਵਾਈ ਕਰਦਿਆਂ ਜਿੱਥੇ ਕੈਪਟਨ ਕਲਸੀ ਨੂੰ ਪਗੜੀ ਤੇ ਵਾਲਾਂ ਸਮੇਤ ਫੌਜ ‘ਚ ਰਹਿਣ ਦੀ ਮਨਜ਼ੂਰੀ ਦੇ ਦਿੱਤੀ ਗਈ ਉਥੇ ਕੈਪਟਨ ਰਤਨ ਦੀ ਡਿਗਰੀ ਪੂਰੀ ਨਾ ਹੋਣ ਦਾ ਹਵਾਲਾ ਦਿੰਦਿਆਂ ਫੌਜ ਨੇ ਉਨ੍ਹਾਂ ਦੀ ਅਰਜ਼ੀ ਖਾਰਜ ਕਰ ਦਿੱਤੀ।

ਸਿੱਖ ਕਤਲੇਆਮ ’ਚ ਮਾਰੇ ਗਏ ਸਿੱਖਾਂ ਨੂੰ ਸ਼ਰਧਾਂਜਲੀ ਦੇਣ ਲਈ ਦਲ ਖ਼ਾਲਸਾ ਵਲੋਂ ਪੰਜਾਬ ਬੰਦ ਦਾ ਸੱਦਾ

ਅੰਮ੍ਰਿਤਸਰ, 23 ਅਕਤੂਬਰ (ਚਰਨਜੀਤ ਸਿੰਘ): ਨਵੰਬਰ 1984 ਵਿਚ ਹੋਏ ਸਿੱਖ ਕਤਲੇਆਮ ਦੀ 25ਵੀਂ ਯਾਦ ਨੂੰ ਮਨਾਉਣ ਲਈ ਦਲ ਖ਼ਾਲਸਾ ਵਲੋਂ ਖ਼ਾਲਸਾ ਐਕਸ਼ਨ ਕਮੇਟੀ ਦੇ ਸਹਿਯੋਗ ਨਾਲ 3 ਨਵੰਬਰ ਨੂੰ ਪੰਜਾਬ ਬੰਦ ਦਾ ਸੱਦਾ ਦਿੰਦਿਆਂ ਸਮੂਹ ਪੰਜਾਬ ਵਾਸੀਆਂ ਨੂੰ ਇਸ ਸਾਕੇ ਵਿਚ ਮਾਰੇ ਗਏ ਬੇਦੋਸ਼ੇ ਸਿੱਖਾਂ ਨੂੰ ਸ਼ਰਧਾਂਜਲੀ ਦੇਣ ਲਈ, ਬੰਦ ਨੂੰ ਭਰਵਾਂ ਹੁੰਗਾਰਾ ਦੇਣ ਦੀ ਅਪੀਲ ਕੀਤੀ। ਦਲ ਖ਼ਾਲਸਾ ਦੇ ਦਫ਼ਤਰ ਆਜ਼ਾਦ ਭਵਨ ਵਿਖੇ ਪੱਤਰਕਾਰਾਂ ਨੂੰ ਸੰਬੋਧਨ ਕਰਦਿਆਂ ਪ੍ਰਧਾਨ ਚਰਨਜੀਤ ਸਿੰਘ ਧਾਮੀ ਤੇ ਬੁਲਾਰੇ ਕੰਵਰਪਾਲ ਸਿੰਘ ਨੇ ਦਸਿਆ ਕਿ 25 ਸਾਲ ਪਹਿਲਾਂ ਸਿੱਖਾਂ ਦੀ ਨਸਲਕੁਸ਼ੀ ਕਾਂਗਰਸ ਦੀ ਪੁਸ਼ਤਪਨਾਹੀ ਹੇਠ ਕੀਤੀ ਗਈ। 25 ਸਾਲ ਬਾਅਦ ਵੀ ਸਿੱਖਾਂ ਨੂੰ ਇਨਸਾਫ਼ ਨਹੀਂ ਮਿਲਿਆ। ਉਨ੍ਹਾਂ ਕਤਲੇਆਮ ਦੇ ਪੀੜਤਾਂ ਨੂੰ ਸਲਾਹ ਦਿਤੀ ਕਿ ਉਹ ਅਪਣੇ ਕੇਸ ਕੌਮਾਂਤਰੀ ਅਦਾਲਤ ਜਾਂ ਯੂ.ਐਨ.ਓ ਵਿਚ ਲੈ ਕੇ ਜਾਣ। ਉਨ੍ਹਾਂ ਦਸਿਆ ਕਿ ਇਸ ਸਬੰਧੀ ਨਵੰਬਰ ਦੇ ਪਹਿਲੇ ਹਫ਼ਤੇ ਯੂ.ਐਨ.ਓ ਦੇ ਦਿੱਲੀ ਦਫ਼ਤਰ ਵਿਚ ਦਲ ਖ਼ਾਲਸਾ ਵਲੋਂ ਮੰਗ ਪੱਤਰ ਦਿਤਾ ਜਾਵੇਗਾ। ਸ. ਕੰਵਰਪਾਲ ਸਿੰਘ ਨੇ ਕਿਹਾ ਕਿ ਇਸ ਤੋਂ ਵੱਧ ਤਰਾਸਦੀ ਹੋਰ ਕੀ ਹੋਵੇਗੀ ਕਿ ਕਤਲੇਆਮ ਦੇ ਦੋਸ਼ੀਆਂ ਨੂੰ ਸੰਵਿਧਾਨਕ ਅਹੁਦੇ ਦੇ ਕੇ ਨਿਵਾਜਿਆ ਜਾ ਰਿਹਾ ਹੈ? ਖ਼ਾਲਸਾ ਐਕਸ਼ਨ ਕਮੇਟੀ ਦੇ ਕਨਵੀਨਰ ਮੋਹਕਮ ਸਿੰਘ ਨੇ ਕਿਹਾ ਕਿ ਇਸ ਬੰਦ ਤੋਂ ਜ਼ਰੂਰੀ ਸੇਵਾਵਾਂ ਨੂੰ ਪਾਸੇ ਰਖਿਆ ਜਾਵੇਗਾ ।

ਯੂ. ਕੇ ਵਿੱਚ ਸ਼੍ਰੋਮਣੀ ਅਕਾਲੀ ਦਲ ਅੰਮ੍ਰਿਤਸਰ ਦੀ ਯੂਥ ਵਿੰਗ ਦੀ ਇਕਾਈ ਕਾਇਮ
ਖਾਲਿਸਤਾਨ ਪੱਖੀ ਸੋਚ ਤੇ ਪਹਿਰਾ ਦੇਣ ਦਾ ਕੀਤਾ ਪ੍ਰਣ

ਸ਼੍ਰੋਮਣੀ ਅਕਾਲੀ ਦਲ ਅੰਮ੍ਰਿਤਸਰ ਨੂੰ ਜਰਮਨੀ ਵਿੱਚ ਯੂਥ ਵਿੰਗ ਦੀ ਇਕਾਈ ਸਥਾਪਿਤ ਕਰਨ ਉਪਰੰਤ ਮਿਲੀ ਭਾਰੀ ਸਫਲਤਾ ਤੋਂ ਬਾਅਦ ਯੂ. ਕੇ ਵਿੱਚ ਦਲ ਵਂਲੋਂ ਅਰੰਭੇ ਇਸ ਉਪਰਾਲੇ ਨੂੰ ਭਰਵਾਂ ਹੁੰਗਾਰਾ ਮਿਲਿਆ ਹੈ। ਬੀਤੇ ਦਿਨੀ ਯੂ.ਕੇ ਵਿੱਚ ਹੋਈ ਦਲ ਦੀ ਇੱਕ ਹੰਗਾਮੀ ਮੀਟਿੰਗ ਦੌਰਾਨ ਯੂ.ਕੇ ਵਿੱਚ ਸ਼੍ਰੋਮਣੀ ਅਕਾਲੀ ਦਲ ਅੰਮ੍ਰਿਤਸਰ ਯੂਥ ਵਿੰਗ ਦੀ ਇਕਾਈ ਸਥਾਪਿਤ ਕੀਤੀ ਗਈ ਜਿਸ ਦੀ ਅਗਵਾਈ, ਭਾਈ ਕੁਲਵੰਤ ਸਿੰਘ ਮੁਠੱਡਾ ਪ੍ਰਧਾਨ ਯੂਥ ਵਿੰਗ ਯੂ.ਕੇ, ਭਾਈ ਸਤਿੰਦਰਪਾਲ ਸਿੰਘ ਮੰਗੂਵਾਲ ਜਨਰਲ ਸਕੱਤਰ, ਭਾਈ ਤੇਜਵੀਰ ਸਿੰਘ ਅੰਮ੍ਰਿਤਸਰ ਸੀ.ਮੀਤ ਪ੍ਰਧਾਨ, ਭਾਈ ਸੁਖਦੇਵ ਸਿੰਘ ਕਿਰਤੋਵਾਲ ਮੀਤ ਪ੍ਰਧਾਨ, ਭਾਈ ਮਲਕੀਤ ਸਿੰਘ ਬਾਬਾ ਬਕਾਲਾ ਖਜਾਨਚੀ ਨੂੰ ਸੌਂਪੀ ਗਈ।ਇਸੇ ਦੌਰਾਨ ਭਾਈ ਹਰਚਰਨ ਸਿੰਘ ਨਿੱਝਰ ਨੂੰ ਨਿਉਕੈਸਲ ਬ੍ਰਾਂਚ ਅਤੇ ਭਾਈ ਵਰਿੰਦਰ ਸਿੰਘ ਬਾਜਵਾ ਨੂੰ ਨੌਟਿੰਗਮ ਬ੍ਰਾਂਚ ਦਾ ਪ੍ਰਧਾਨ ਨਿਯੁਕਤ ਕੀਤਾ ਗਿਆ।ਭਾਈ ਪ੍ਰਮਿੰਦਰ ਸਿੰਘ ਅਤੇ ਭਾਈ ਜਗਪ੍ਰੀਤ ਸਿੰਘ ਚਾਹਲ ਬਾਲਸਰ ਨੂੰ ਸਪੈਸ਼ਲ ਅਗਜੈਕਟਿਵ ਮੈਂਬਰ ਦੇ ਅਹੁਦਿਆਂ ਤੇ ਨਾਮਜ਼ਦ ਕੀਤਾ ਗਿਆ।ਇਸ ਮੌਕੇ ਦਲ ਦੇ ਯੂ.ਕੇ ਤੋਂ ਸੀਨੀਅਰ ਆਗੂਆਂ ਜਿਹਨਾਂ ਵਿੱਚ ਮਾ.ਅਵਤਾਰ ਸਿੰਘ ਪ੍ਰਧਾਨ, ਭਾਈ ਜਗਤਾਰ ਸਿੰਘ ਵਿਰਕ, ਭਾਈ ਤਜਿੰਦਰ ਸਿੰਘ ਸੰਧੂ, ਭਾਈ ਸਰਬਜੀਤ ਅਤੇ ਕੌਂਸਲਰ ਭਾਈ ਗੁਰਦਿਆਲ ਸਿੰਘ ਅਟਵਾਲ ਨੇ ਸਮੂਹ ਯੂਥ ਵਿੰਗ ਨੂੰ ਵਧਾਈ ਦੇ ਪਾਤਰ ਦੱਸਦਿਆਂ ਦਲ ਵਿੱਚ ਸ਼ਾਮਿਲ ਹੋਣ ਤੇ ਨਿੱਘਾ ਸਵਾਗਤ ਕੀਤਾ ਅਤੇ ਪੂਰੀ ਤਨਦੇਹੀ ਨਾਲ ਸਾਥ ਦੇਣ ਦਾ ਪ੍ਰਣ ਕੀਤਾ।ਇਸ ਮਹਾਨ ਉਪਰਾਲੇ ਦੀ ਜਿੰਮੇਵਾਰੀ ਨਿਭਾਹ ਰਹੇ ਸ਼੍ਰੋਮਣੀ ਅਕਾਲੀ ਦਲ ਅੰਮ੍ਰਿਤਸਰ ਯੂਥ ਵਿੰਗ ਜਰਮਨੀ ਦੇ ਪ੍ਰਧਾਨ ਭਾਈ ਭੁਪਿੰਦਰ ਸਿੰਘ ਅਤੇ ਯੋਰਪ ਕਮੇਟੀ ਦੇ ਸੀਨੀਅਰ ਮੀਤ ਪ੍ਰਧਾਨ ਬਾਬਾ ਸੋਹਣ ਸਿੰਘ ਕੰਗ ਨੇ ਯੂ.ਕੇ ਯੂਥ ਵਿੰਗ ਨੂੰ ਵਧਾਈ ਦਿੰਦਿਆਂ ਕਿਹਾ ਕਿ ਇਹ ਨੌਜਵਾਨ ਪੀੜੀ ਹੀ ਕੌਮ ਅਤੇ ਦਲ ਦਾ ਭਵਿੱਖ ਹੈ ਅਤੇ ਨਾਲ ਹੀ ਪੂਰਨ ਸਮੱਰਥਨ ਦਾ ਭਰੋਸਾ ਵੀ ਦਿੱਤਾ।

ਸਕੂਲਾਂ ’ਚ ਬਾਪੂ ਦੀਆਂ ਕਿਤਾਬਾਂ ਪਾੜ੍ਹਾਉਣਾ ਪੰਜਾਬ ਨੂੰ ਅੱਗ ਦੇ ਭਾਂਬੜ ’ਚ ਪਾਉਣ ਦੇ ਬਰਾਬਰ

ਲੁਧਿਆਣਾ, 23 ਅਕਤੂਬਰ - ਗੁਰਦੁਆਰਾ ਗਊ ਘਾਟ ਦੇ ਪਤਸ਼ਾਹੀ ਪਹਿਲੀ ਲੁਧਿਆਣਾ ਦੇ ਪ੍ਰਧਾਨ ਹਰਜਿੰਦਰ ਸਿੰਘ ਨੇ ਪੱਤਰਕਾਰਾਂ ਨਾਲ ਗੱਲ ਕਰਦਿਆ ਕਿਹਾ ਕਿ ਸਰਕਾਰੀ ਸਕੂਲਾਂ ਵਿਚ ਆਸਾ ਰਾਮ ਦੀਆਂ ਲਿਖੀਆਂ ਕਿਤਾਬਾਂ ਨੂੰ ਪੜਾਉਣ ਵਾਸਤੇ ਹਦਾਇਤ ਜਾਰੀ ਕਰਨਾ ਪੰਜਾਬ ਦੇ ਮਹੌਲ ਨੂੰ ਅੱਗ ਵਿਚ ਧਕੇਲਣ ਦੀ ਕੌਸ਼ਿਸ ਕੀਤੀ ਜਾ ਰਹੀ ਹੈ। ਜਿਸ ਦਾ ਸਿੱਖ ਕੌਮ ਜਬਰਦਸਤ ਵਿਰੋਧ ਕਰਦੀ ਹੈ। ਪਹਿਲਾ ਹੀ ਇਹ ਨੂਮਹਲੀਏ, ਨਿਰੰਕਾਰੀਏ, ਭਨਿਆਰੇਵਾਲੇ , ਸਿਰਸੇ ਵਾਲੇ ਅਤੇ ਬਹੁਤ ਸਾਰੇ ਡੇਰੇ ਵਾਲਿਆਂ ਨੇ ਪੰਜਾਬ ਦੇ ਮਾਹੌਲ ਨੂੰ ਵਗਾੜ ਰੱਖਿਆ ਹੈ। ਰਹਿੰਦੇ ਖੂਦੀ ਕਸਰ ਬਾਬੂ ਆਸੇ ਨੂੰ ਸਕੂਲਾਂ ਵਿਚ ਆਪਣਾ ਪ੍ਰਚਾਰ ਦੀ ਖੁੱਲ ਦੇ ਕੇ ਪੰਜਾਬ ਦੇ ਸ਼ਾਤੀ ਭਰੇ ਮਾਹੌਲ ਨੂੰ ਖਰਾਬ ਕੀਤਾ ਜਾ ਰਿਹਾ ਹੈ। ਜਿਸ ਦਾ ਸਿੱਖ ਪੰਥ ਵਿਰੋਧ ਕਰਦਾ ਹੈ ਅਤੇ ਸਿੱਖਿਆ ਵਿਭਾਗ ਦੇ ਸਕੱਤਰ ਨੂੰ ਇਹ ਜੋ ਪੱਤਰ ਜਾਰੀ ਕੀਤਾ ਹੈ ਇਸ ਤੇ ਮੁੜ ਵਿਚਾਰ ਕਰਨਾ ਚਾਹੀਦਾ ਹੈ ਨਹੀ ਤਾਂ ਇਸ ਦੇ ਨਤੀਜਿਆ ਦਾ ਸਿੱਖਿਆ ਵਿਭਾਗ ਜਿੰਮੇਵਾਰ ਹੋਵੇਗਾ । ਪੰਜਾਬ ਦਾ ਮਾਹੌਲ ਜੋ ਪਿਛਲੇ ਸਮੇਂ ਦੋ ਦਹਾਕੇ ਤੋਂ ਸੰਤਾਪ ਆਪਣੇ ਪਿੰਡੇ ਤੇ ਹੰਡਾਇਆ ਉਹ ਅੱਜ ਤੱਕ ਭੁੱਲੇ ਨਹੀ ਹਨ। ਪੰਜਾਬ ਦੇ ਸਿੱਖ, ਸਿੱਖੀ ਸੋਚ ਤੇ ਪਹਿਰਾ ਦੇਣ ਵਾਲੇ ਪੰਜਾਬ ਨੂੰ ਮੁੜ ਦੁਆਰਾ ਅੱਗੇ ਦੇ ਵਿਚ ਨਹੀ ਝੁੱਖਿਆ ਦੇਖਣਾ ਚਾਹੁੰਦੇ ਜੇਕਰ ਮਜਬੂਰ ਕੀਤਾ ਗਿਆ ਤਾਂ ਪੰਥਕ ਹਿਤਾਇਸ਼ੀ ਡੱਟ ਕੇ ਵਿਰੋਧ ਕਰਨਗੇ। ਜੇਕਰ ਬੱਚਿਆਂ ਨੂੰ ਸਕੂਲ ਵਿਚ ਧਾਰਮਿਕ ਸਿੱਖਿਆਂ ਦੇਣੀ ਹੈ ਤਾਂ ਗੁਰੂ ਨਾਨਕ ਦੇਵ ਜੀ ਦੀ ਸਿੱਖਿਆ ਦਿੱਤੀ ਜਾਵੇ। ਜੋ ਸਭ ਧਰਮਾਂ ਨੂੰ ਸੇਧ ਦਿੰਦੀ ਹੈ ਬਾਪੂ ਦੇ ਡੇਰਿਆਂ ਤੇ ਬੱਚਿਆਂ ਦੇ ਕਤਲ ਹੋਏ ਹਨ। ਇਹ ਸਮਾਜ ਨੂੰ ਕੀ ਸੇਧ ਦੇ ਸਕਦਾ ਹੈ ਅਤੇ ਨਾ ਹੀ ਬਰਦਾਸ਼ਤ ਕੀਤਾ ਜਾ ਸਕਦਾ ਹੈ। ਇਸ ਲਈ ਬੇਨਤੀ ਕੀਤੀ ਜਾਂਦੀ ਹੈ ਕਿ ਪੰਥਕ ਝੁਝਾਰੂਆ ਦਾ ਇਮਤਿਹਾਨ ਨਾ ਲਿਆ ਜਾਵੇ ਅਤੇ ਉਹ ਪੰਜਾਬ ਦੇ ਸਰਮਾਏ ਬੱਚਿਆਂ ਨੂੰ ਸੰਭਾਲਣ ਅਤੇ ਸਿੱਖਿਅਤ ਕਰਨ ਵਿਚ ਸਮਰੱਥ ਹਨ। ਬਾਬੂ ਦੀ ਸਿੱਖਿਆ ਦੀ ਲੋੜ ਨਹੀ ਇਸ ਲਈ ਪੰਜਾਬ ਸਰਕਾਰ ਨੂੰ ਇਹ ਫੈਸਲੇ ਵਾਪਸ ਲੈਣੇ ਚਾਹੀਦੇ ਹਨ।
ਅੰਮ੍ਰਿਤਸਰ ਤੋਂ ਮੋਤਾ ਸਿੰਘ ਅਨੁਸਾਰ-ਪੰਜਾਬ ਸਰਕਾਰ ਵੱਲੋਂ ਸਿੱਖਿਆ ਵਿਭਾਗ ਦੇ ਸਕੂਲਾਂ ਵਿਚ ਹਰ ਰੋਜ਼ ਬਾਪੂ ਆਸਾ ਰਾਮ ਦੇ ਚੇਲਿਆਂ ਨੂੰ ਸੱਦ ਕੇ ਭੋਲੇ ਭਾਲੇ ਵਿਦਿਆਰਥੀਆਂ ਦੇ ਕਥਿਤ ਵਿਵੇਕ ਤੇ ਸ਼ਕਤੀ ਨੂੰ ਵਧਾਉਣ ਲਈ ਭਾਸ਼ਨ ਦੇਣ ਦੀ ਇਜਾਜ਼ਤ ਦੇਣ ਅਤੇ ਉਨ੍ਹਾਂ ਨੂੰ ਆਪਣਾ ਸਾਹਿਤ ਵਿਦਿਆਰਥੀਆਂ ਨੂੰ ਦੇਣ ਦੇ ਫੈਸਲੇ ਦਾ ਸਖਤ ਵਿਰੋਧ ਕਰਦਿਆਂ ਆਲਮੀ ਪੰਜਾਬੀ ਵਿਰਾਸਤ ਫਾਊਂਡੇਸ਼ਨ, ਜਮਹੂਰੀ ਅਧਿਕਾਰ ਸਭਾ, ਅਜ਼ਾਦੀ ਘੁਲਾਟੀਏ ਕਾ. ਹਰੀ ਸਿੰਘ ਬਾਗੀ ਯਾਦਗਾਰੀ ਮੰਚ ਤੇ ਕਿਸਾਨ ਸੰਘਰਸ਼ ਕਮੇਟੀ ਪੰਜਾਬ ਨੇ ਕਿਹਾ ਕਿ ਸਰਕਾਰ ਦੀ ਵਿਦਿਅਕਤ ਖੇਤਰ ਵਿੱਚ ਵਿੱਦਿਅਕ ਮਾਹਰਾਂ ਦੁਆਰਾ ਰਚਿਤ ਸਿਲੇਬਸ ਤੋਂ ਪਿੱਛੇ ਕਰਕੇ ਕਥਾ ਕਥਿਤ ਲੋਕਾਂ ਨੂੰ ਇਸ ਵੇਲੇ ਤੋਰਨਾ ਅਤੀ ਮੰਦਭਾਗਾ ਹੈ ਤੇ ਇਸ ਦੇ ਬਹੁਤ ਭੈੜੇ ਤੇ ਦੂਰਰਸ ਭਰੇ ਸਿੱਟੇ ਭਵਿੱਖ ਵਿੱਚ ਨਿਕਲਣਗੇ। ਪੰਜਾਬ ਵਿੱਚ ਨਿਕਲਣਗੇ, ਜੋ ਪੰਜਾਬ ਸਰਕਾਰ ਇੱਕ ਵੱਖਰੀ ਤਰ੍ਹਾਂ ਦੇ ਅਨਪੜ੍ਹਾਂ ਦੀ ਫੌਜ ਵਜੋਂ ਸਾਡੇ ਸਾਹਮਣੇ ਹੋਵੇਗੀ, ਜੋ ਲੱਗਭੱਗ ਤਾਲਿਬਾਨ ਨਾਲ ਰਲਦੀ ਮਿਲਦੀ ਹੋਵੇਗੀ। ਇਨ੍ਹਾਂ ਸੰਸਥਾਵਾਂ ਦੇ ਆਗੂ ਸਰਵਸ੍ਰੀ ਭੁਪਿੰਦਰ ਸਿੰਘ ਸੰਧੂ, ਡਾ. ਪ੍ਰਮਿੰਦਰ ਸਿੰਘ, ਆਰਟਿਸ ਸ਼ਿਵਦੇਵ ਸਿੰਘ, ਯਸ਼ਪਾਲ ਝਬਾਲ, ਐਡਵੋਕੇਟ, ਰਘਬੀਰ ਸਿੰਘ ਬਾਗੀ ਤੇ ਸ੍ਰ. ਕੰਵਲਜੀਤ ਸਿੰਘ ਪਨੂੰ ਨੇ ਕਿਹਾ ਕਿ ਵਿਦਿਅਕ ਸਿਲੇਬਸ ਵਿੱਚ ਹੋਰ ਸੇਧ ਕਰਨ ਦੀ ਜਾਗਰੂਕ ਹੋ ਸਕਦੀ ਹੈ, ਪਰ ਉਹ ਬਾਪੂ ਆਸਾ ਰਾਮ ਦੇ ਚੇਲਿਆਂ ਨੂੰ ਸਕੂਲਾਂ ਵਿੱਚ ਵੜਨ ਦੀ ਆਗਿਆ ਦੇਣਾ ਜਿਸਦੇ ਛੇ ਹਜ਼ਾ ਕਰੋੜ ਵਾਲੇ ਆਸ਼ਰਮ ਦੀਆਂ ਰਾਮ ਕਹਾਣੀਆਂ ਰੋਜ਼ ਟੀ.ਵੀ. ਚੈਨਲਾਂ ਤੇ ਅਖ਼ਬਾਰਾਂ ਦਾ ਸਿੰਗਾਰ ਬਣਦੀਆਂ ਹਨ। ਕਦੀ ਵੀ ਠੀਕ ਨਹੀਂ ਹਨ।

ਧਰਮ ਪ੍ਰਚਾਰ ਲਈ ਯੋਰਪ ਪੱਧਰੀ ਦੌਰੇ ਤੇ ਆਏ ਸੰਤ ਬਾਬਾ ਬਲਜੀਤ ਸਿੰਘ ਜੀ ਖਾਲਸਾ ਦਾਦੂ ਸਾਹਿਬ ਵਾਲਿਆਂ ਦਾ ਫਰੈਂਕਫੋਰਟ ਏਅਰਪੋਰਟ ਤੇ ਨਿੱਘਾ ਸਵਾਗਤ

ਦੇਹਧਾਰੀ ਗੁਰੂਡੰਮ ਦੇ ਖਿਲਾਫ ਲੰਮੇ ਸਮੇਂ ਤੋਂ ਸੰਘਰਸ਼ ਲੜ ਰਹੇ ਪ੍ਰਸਿੱਧ ਸਿੱਖ ਪ੍ਰਚਾਰਕ ਸੰਤ ਬਾਬਾ ਬਲਜੀਤ ਸਿੰਘ ਜੀ ਖਾਲਸਾ ਦਾਦੂ ਸਾਹਿਬ ਵਾਲੇ ਜਥੇ ਸਮੇਤ ਯੋਰਪ ਪੱਧਰ ਦੇ ਧਰਮ ਪ੍ਰਚਾਰ ਦੌਰੇ ਤੇ ਫਰੈਕਫਰਟ ਜਰਮਨੀ ਪੁੱਜੇ, ਏਅਰਪੋਰਟ ਪਹੁੰਚਣ ਤੇ ਉਹਨਾ ਦਾ ਪੰਥਕ ਜਥੇਬੰਦੀਆਂ ਅਤੇ ਸਿੱਖ ਸੰਗਤਾਂ ਵੱਲੋਂ ਨਿੱਘਾ ਸਵਾਗਤ ਕੀਤਾ ਗਿਆ, ਜ੍ਹਿਨਾਂ ਵਿੱਚ ਭਾਈ ਜਗਤਾਰ ਸਿੰਘ ਮਾਹਲ , ਭਾਈ ਭੁਪਿੰਦਰ ਸਿੰਘ, ਭਾਈ ਗੁਰਦਿਆਲ ਸਿੰਘ ਲਾਲੀ , ਭਾਈ ਹੀਰਾ ਸਿੰਘ ਮੱਤੇਵਾਲ, ਭਾਈ ਰਾਜ ਸਿੰਘ ਜਗਦੇੳ ਕਲਾਂ, ਭਾਈ ਸੁਖਪ੍ਰੀਤ ਸਿੰਘ ਜਿਕਰਯੋਗ ਹਨ।ਇਸ ਧਰਮ ਪ੍ਰਚਾਰ ਦੌਰੇ ਦੌਰਾਨ ਸੰਤ ਦਾਦੂ ਸਾਹਿਬ ਵਾਲੇ ਜਰਮਨ ਤੋਂ ਇਲਾਵਾ ਗਰੀਸ, ਸਪੇਨ ਅਤੇ ਇਟਲੀ ਵੀ ਵਿਸ਼ੇਸ਼ ਧਾਰਮਿਕ ਦੀਵਾਨ ਸਜਾਉਣਗੇ। ਸੰਤਾਂ ਦੇ ਇਸ ਧਰਮ ਪ੍ਰਚਾਰ ਦੌਰੇ ਦਾ ਸੰਗਤਾਂ ਵਿੱਚ ਭਾਰੀ ਉਤਸ਼ਾਹ ਪਾਇਆ ਜਾ ਰਿਹਾ ਹੈ।

ਸ਼੍ਰੋਮਣੀ ਕਮੇਟੀ ਚੋਣਾਂ ਵਿੱਚ ਹਮਖਿਆਲੀ ਪਾਰਟੀਆਂ ਨਾਲ ਰੱਲ ਕੇ ਬਾਦਲਾਂ ਦੀ ਕੁਰੱਪਟ ਪ੍ਰਬਧਿਨੀ ਟੀਮ ਨੂੰ ਕਰਾਰੀ ਹਾਰ ਦੇਵਾਂਗੇ- ਭਾਈ ਬਿੱਟੂ

ਲੁਧਿਆਣਾ, 22 ਅਕਤੂਬਰ - ਆਉਣ ਵਾਲੀਆਂ ਸ੍ਰੋਮਣੀ ਗੁਰਦੁਆਰਾ ਪ੍ਰੰਬੰਧਕ ਕਮੇਟੀ ਚੋਣਾਂ ਲਈ ਹਮਖਿਆਲੀ ਪਾਰਟੀਆਂ ਨਾਲ ਸ਼੍ਰੋਮਣੀ ਅਕਾਲੀ ਦਲ ਪੰਚ ਪ੍ਰਣਾਲੀ ਦੇ ਸਕੱਤਰ ਜਨਰਲ ਹਰਪਾਲ ਸਿੰਘ ਚੀਮਾਂ ਦੀ ਅਗਵਾਈ ਵਿੱਚ ਗਲਬਾਤ ਜਾਰੀ ਹੈ ਤੇ ਪੰਜਾਬ ਦੀ ਸਿੱਖ ਕੌਮ ਇਸ ਵਾਰ ਸ੍ਰੋਮਣੀ ਕਮੇਟੀ ਦੇ ਮੌਜੂਦਾ ਪ੍ਰੰਬੰਧਕਾਂ ਤੋਂ ਨਾ ਖੁਸ਼ ਹੋਣ ਕਰਕੇ ਤਬਦੀਲੀ ਚਾਹੁੰਦੀ ਹੈ ਜਿਸ ਲਈ ਪੰਚ ਪ੍ਰਧਾਨੀ ਪਾਰਟੀ ਹਮਖਿਆਲੀ ਪਾਰਟੀਆਂ ਨਾਲ ਰੱਲ ਕੇ ਬਾਦਲਾਂ ਦੀ ਕੁਰੱਪਟ ਪ੍ਰਬਧਿਨੀ ਟੀਮ ਨੂੰ ਕਰਾਰੀ ਹਾਰ ਦੇਵੇਗੀ। ਇਹ ਬਿਆਨ ਅੱਜ ਪੰਚ ਪ੍ਰਧਾਨੀ ਦੇ ਚੇਅਰਮੈਨ ਭਾਈ ਦਲਜੀਤ ਸਿੰਘ ਬਿੱਟੂ ਨੇ ਇਥੇ ਨਵੀਂ ਕਚਹਿਰੀ ਵਿਖੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਦਿੱਤਾ। ਉਹ ਅੱਜ ਇਥੇ ਮਾਨਯੋਗ ਸੀ.ਜੇ.ਐਮ. ਮੈਡਮ ਜਤਿੰਦਰ ਕੌਰ ਦੀ ਅਦਾਲਤ ਵਿੱਚ ਤਾਰੀਕ ’ਤੇ ਪੇਸ਼ੀ ਸਬੰਧੀ ਆਏ ਸਨ। ਭਾਈ ਬਿੱਟੂ ਨੇ ਇਸ ਸਮੇਂ ਕਿਹਾ ਕਿ ਇਸ ਵਾਰ ਸਾਡੀ ਜਿੱਤ ਸ਼੍ਰੋਮਣੀ ਕਮੇਟੀ ’ਤੇ ਯਕੀਨੀ ਹੈ ਕਿਉਂਕਿ ਪੰਜਾਬ ਦੇ ਲੋਕ ਬਾਦਲ ਸਰਕਾਰ ਅਤੇ ਉਸ ਦੇ ਇਸ਼ਾਰਿਆਂ ਤੇ ਚੱਲ ਰਹੀ ਸ਼੍ਰੋਮਣੀ ਕਮੇਟੀ ਦੇ ਪ੍ਰਬੰਧਾਂ ਤਹਿਤ ਪੰਜਾਬ ਵਿੱਚ ਵਗ ਰਹੇ ਨਸ਼ਿਆਂ ਦੇ ਦਰਿਆ ਕਾਰਨ ਆਰਥਿਕ ਪੱਖੋਂ ਅਤੇ ਸ਼ਰੀਰਕ ਪੱਖੋਂ ਨਕਾਰਾ ਹੁੰਦੇ ਜਾ ਰਹੇ ਹਨ ਅਤੇ ਇਸ ਸੰਕਟ ਵਿੱਚੋਂ ਬਾਹਰ ਕੱਢਣ ਲਈ ਹੁਣ ਸਿੱਖ ਕੌਮ ਉਤਾਵਲੀ ਹੋ ਚੁੱਕੀ ਹੈ । ਉਨ੍ਹਾਂ ਕਿਹਾ ਕਿ ਬਾਦਲ ਸਰਕਾਰ ਦਾ ਹਰ ਵਿਭਾਗ ਤੇ ਪ੍ਰਸ਼ਾਸਨ ਭ੍ਰਿਸ਼ਟਾਚਾਰ ਵਿੱਚ ਲੁਪਤ ਹੈ ਜੋ ਪੰਜਾਬ ਦੀ ਜਨਤਾ ਨੂੰ ਕਮਜ਼ੋਰ ਕਰ ਰਿਹਾ ਹੈ. ਉਨ੍ਹਾਂ ਕਿਹਾ ਕਿ ਪੰਜਾਬ ਦੇ ਕਿਸਾਨਾਂ ਨੂੰ ਇਸ ਵਾਰ ਫਿਰ ਬਾਦਲ ਸਰਕਾਰ ਨੇ ਰਾਜ ਵਿੱਚ ਝੋਨੇ ਦੀ ਵੇਚ ਸਬੰਧੀ ਮੰਡੀਆਂ ਵਿੱਚ ਰੁਲਣਾਂ ਤਾਂ ਪੈ ਹੀ ਰਿਹਾ ਹੈ। ਤੇ ਨਾਲ ਹੀ ਇਸ ਵਾਰ 1121 ਬਾਸਮਤੀ ਦਾ ਜਿਹੜਾ ਭਾਅ ਪਿਛਲੇ ਸਾਲ 3400 ਰੁਪਏ ਕੁਵਿੰਟਲ ਸੀ ਹੁਣ ਉਹ ਬਾਸਮਤੀ ਜਿੰਮੀਦਾਰਾਂ ਤੋਂ 1700 ਰੁਪਏ ਕੁਵਿੰਟਲ ਖ੍ਰੀਦੀ ਜਾ ਰਹੀ ਹੈ ਜੋ ਸਰਾਸਰ ਲੁੱਟ ਹੈ ਜਦ ਕਿ ਬਾਸਮਤੀ ਚੋਲਾਂ ਦਾ ਰੇਟ ਬਾਜ਼ਾਰ ਵਿੱਚ 115 ਰੁਪਏ ਕਿਲੋ ਹੈ। ਉਨ੍ਹਾਂ ਇਸ ਸਮੇਂ ਕਿਸਾਨਾਂ ਨੂੰ ਅਪੀਲ ਕੀਤੀ ਕਿ ਉਹ ਆਪਣਾ ਬਾਸਮਤੀ ਝੋਨਾ ਹਾਲੇ ਮੰਡੀਆਂ ਵਿੱਚ ਨਾ ਸੁੱਟਣ। ਭਾਈ ਬਿੱਟੂ ਨੇ ਇਸ ਸਮੇਂ ਪੰਜਾਬ ਸਰਕਾਰ ਵੱਲੋਂ ਪਾਰਟੀ ਦੇ ਕਈ ਆਗੂਆਂ ਅਤੇ ਵਰਕਰਾਂ ਨੂੰ ਝੂਠੇ ਕੇਸਾਂ ਵਿਚ ਗ੍ਰਿਫਤਾਰ ਕੀਤੇ ਜਾਣ ਦੀ ਸਖ਼ਤ ਨਿਖੇਧੀ ਕਰਦਿਆਂ ਕਿਹਾ ਕਿ ਸਰਕਾਰ ਦੀ ਇਸ ਧੱਕੇਸ਼ਾਹੀ ਦੇ ਵਿਰੋਧ ਵਿੱਚ ਪਾਰਟੀ ਜ਼ਿਲ੍ਹਾ ਪੱਧਰ ਉੱਪਰ ਧਰਨੇ ਮੁਜਾਹਿਰੇ ਕਰ ਰਹੀ ਹੈ ਜਿਸ ਤਹਿਤ ਅੱਜ ਅੰਮ੍ਰਿਤਸਰ ਧਰਨਾ ਹੈ ਤੇ ਕੱਲ੍ਹ ਜਲੰਧਰ ਵਿਖੇ (23 ਅਕਤੂਬਰ) ਹੋਵੇਗਾ । ਉਨ੍ਹਾਂ ਕਿਹਾ ਕਿ ਬਾਕੀ ਥਾਵਾਂ ਲਈ ਅਗਲੀਆਂ ਤਰੀਕਾਂ ਦਾ ਐਲਾਨ ਵੀ ਕੀਤਾ ਜਾਵੇਗਾ ਕਿਉਂਕਿ ਲੋਕੀ ਝੋਨੇ ਦੀ ਕਟਾਈ ਵਿੱਚ ਲੱਗੇ ਹੋਏ ਹਨ। ਇਸ ਸਮੇਂ ਜਨਰਲ ਝੋਨੇ ਦੀ ਕਟਾਈ ਵਿੱਚ ਲੱਗੇ ਹੋਏ ਹਨ। ਇਸ ਸਮੇਂ ਜਨਰਲ ਸੱਕਤਰ ਅਮਰੀਕ ਸਿੰਘ ਈਸੜੂ, ਪਟਿਆਲਾ ਪ੍ਰਧਾਨ ਗੁਰਪ੍ਰੀਤ ਸਿੰਘ ਗੋਗਾ, ਯੂਥ ਵਿੰਗ ਪ੍ਰਧਾਨ ਸੁਜਾਨ ਸਿੰਘ, ਕਰਮਜੀਤ ਸਿੰਘ, ਜਸਬੀਰ ਸਿੰਘ ਖੰਡੂਰ, ਆਤਮਾ ਸਿੰਘ, ਰਤਨ ਸਿੰਘ, ਵਿੰਦਰ ਸਿੰਘ ਲੁਹਾਰ, ਬਲਦੇਲ ਸਿੰਘ ਬਹੋਮਾਜਰਾ, ਸੁਲਤਾਨ ਸਿੰਘ ਸੋਢੀ ਆਦਿ ਸਮੇਂ ਹੋਰ ਕਈ ਸਰਗਰਮ ਵਰਕਰ ਹਾਜ਼ਰ ਸਨ। ਭਾਈ ਬਿੱਟੂ ਦੀ ਅਗਲੀ ਪੇਸ਼ੀ 5 ਨਵੰਬਰ ਦੀ ਪਾਈ ਹੈ।

ਸੱਚ ਦਾ ਬੋਲਬਾਲਾ... ਬੁਰੀ ਨਜ਼ਰ ਵਾਲੇ ਦਾ ਮੂੰਹ ਕਾਲਾ
‘ਨਾਨਕਸ਼ਾਹੀ ਕੈਲੰਡਰ ਦੀ ਸਪਿਨ ਨੇ ਆਰ. ਐਸ. ਐਸ.ਏਜੰਟਾਂ ਨੂੰ ਮੂੰਹ ਪਰਨੇ ਸੁੱਟਿਆ’

ਭਾਵੇਂ ਆਰ. ਆਰ. ਐੱਸ. ਦਾ ਸਿੱਖਾਂ ਵਿਚਲਾ ‘ਵੱਡਾ ਏਜੰਟ’ ਰਾਸ਼ਟਰੀ ਸਿੱਖ ਸੰਗਤ ਦਾ ਮੁਖੀ ਰੁਲਦਾ ਸਿੰਗ, ਇਸ ਸੰਸਾਰ ਵਿਚਲੀ ਬਾਜ਼ੀ ਹਾਰ ਚੁੱਕਾ ਹੈ ਪਰ ਉਸ ਦੀ ਸਿੱਖਾਂ ਵਿੱਚ ਭਰਤੀ ਕੀਤੀ ‘ਸੈਨਾ’ ਦੀਆਂ ਕਾਰਵਾਈਆਂ, ਅਜੇ ਲੁਕਵੇਂ ਢੰਗ ਨਾਲ ਜਾਰੀ ਹਨ। ਇਸ ਦਾ ਇੱਕ ਪ੍ਰਤੱਖ ਸਬੂਤ, ਬੰਦੀ ਛੋੜ ਦਿਵਸ (17 ਅਕਤੂਬਰ) ਮੌਕੇ, ਪੰਥ ਪ੍ਰਵਾਣਿਤ ਨਾਨਕਸ਼ਾਹੀ ਕੈਲੰਡਰ ਨੂੰ ਨਕਾਰ ਕੇ, ਮੁੜ ‘ਹਿੰਦੂ ਕੈ¦ਡਰ’ ਲਾਗੂ ਕਰਨ ਦੀ ਸਾਜ਼ਿਸ਼ ਤੋਂ ਮਿਲਦਾ ਹੈ। ਇਸ ‘ਸਾਜ਼ਿਸ਼’ ਨੂੰ ਸਫਲ ਕਰਨ ਲਈ, ਪ੍ਰਕਾਸ਼ ਸਿੰਘ ਬਾਦਲ ਦੇ ‘ਵਿਸ਼ੇਸ਼ ਭੇਤੀ ਦੂਤ’ ਦਲਜੀਤ ਸਿੰਘ ਚੀਮਾ ਨੇ ਅੱਡੀਚ ੋਟੀ ਦਾ ਜ਼ੋਰ ਲਾਇਆ ਅਤੇ ਉਹ ਸ੍ਰੀ ਅਕਾਲ ਤਖਤ ਸਾਹਿਬ ’ਤੇ ਹੋਈ ਪੰਜਾਂ ਸਿੰਘ ਸਾਹਿਬਾਨਾਂ ਦੀ ਮੀਟਿੰਗ ਵਿੱਚ ਵੀ ਬੈਠਾ ਰਿਹਾ। ਇਸ ਦੌਰਾਨ ਉਸ ਦਾ ਲਗਾਤਾਰ ਸੰਪਰਕ ਸੁਖਬੀਰ ਸਿੰਘ ਬਾਦਲ ਦੇ ਸਾਲੇ ਬਿਕਰਮਜੀਤ ਸਿੰਘ ਮਜੀਠੀਏ ਨਾਲ (ਜਿਹੜਾ ਕਿ ਨਾਨਕਸਰੀ ਸੰਪਰਦਾ ਨਾਲ ਸਬੰਧਿਤ ਹੈ) ਅਤੇ ਮਹਿਤਾ ਫੈਡਰੇਸ਼ਨ ਦੇ ਪ੍ਰਮੁੱਖ ਆਗੂਆਂ ਨਾਲ ਵੀ ਬਣਿਆ ਹੋਇਆ ਸੀ। .................

ਪੰਜਾਬੀ ਪ੍ਰੈੱਸ ਕਲੱਬ ਪੌੜੀ ਦੇ ਅੱਗੇ ਟੰਬੇ ਤੇ ਚੜੀ
ਪ੍ਰੈੱਸ ਕਲੱਬ ਦੀਆਂ ਜੜਾਂ ਮਜਬੂਤ ਹੋਈਆਂ
ਪਾਠ ਕਰਨ ਵਾਲੀ ਹਰਲੀਨ ਇੱਕ ਦਿਨ ਕੈਨੇਡਾ ਦੀ ਪ੍ਰਧਾਨ ਮੰਤਰੀ ਵੀ ਬਣ ਸਕਦੀ ਹੈ. . . ਬੌਬ ਰੇਅ

ਬਰੈਂਪਟਨ/ਪੰਜਾਬੀ ਪ੍ਰੈੱਸ:- ਪੰਜਾਬੀ ਪ੍ਰੈੱਸ ਕਲੱਬ ਦੀ ਉਮਰ 8 ਸਾਲ ਦੀ ਹੋ ਗਈ ਹੈ ਅਤੇ ਇਸ ਦੀ ਜੁਆਨੀ ਵਿੱਚ ਪੈਰ ਰੱਖਣ ਵਾਲੀ ਘੜੀ ਨਜ਼ਦੀਕ ਆ ਗਈ ਹੈ। ਸੰਸਥਾਵਾਂ ਦਾ ਸਭ ਤੋਂ ਔਖਾ ਸਮ੍ਹਾਂ ਸੂਰੂਆਤ ‘ਚ ਹੀ ਮੰਨਿਆ ਜਾਂਦਾ ਹੈ। ਖਾਸ ਕਰਕੇ ਸਾਡੇ ਭਾਈਚਾਰਕ ਸੁਭਾਅ ਅਨੁਸਾਰ ਸੰਸਥਾਵਾਂ ਬਣਆਂ ਹਨ ਅਤੇ ਹਲਕੀਆਂ ਸੋਚਾਂ ਦਾ ਸਿ਼ਕਾਰ ਹੋ ਕੇ ਸਮਾਪਤ ਹੋ ਜਾਂਦਾ ਹੈ। ਇਹ ਗੱਲ ਸੱਚ ਹੈ ਕਿ ਸੰਸਥਾਵਾਂ ਹਮੇਸ਼ਾਂ ਉੱਚੇ ਨਿਸ਼ਾਨੇ ਮਿੱਥ ਕੇ ਹੀ ਸ਼ੁਰੂ ਹੁੰਦੀਆਂ ਹਨ। ਅਗਰ ਪੰਜਾਬੀ ਪ੍ਰੈੱਸ ਕਲੱਬ ਦੀ ਵੈਬਸਾਈਟ ਤੇ ਜਾ ਕੇ ਸੰਨ 2002 ਦੇ ਮਤਿਆਂ ਤੇ ਨਜ਼ਰ ਮਾਰੀ ਜਾਵੇ ਤਾਂ ਇਹ ਵਿਚਾਰ ਉਘੜ ਕੇ ਸਾਹਮਣੇ ਆਵੇਗਾ ਕਿ ਪੰਜਾਬੀ ਪ੍ਰੈੱਸ ਕਲੱਬ ਵੀ ਸਮਾਜ ਸੁਧਾਰ ਦੇ ਮੁੱਦਿਆਂ ਨੂੰ ਲੈ ਕੇ ਬਣਾਈ ਗਈ ਸੀ ਅਤੇ ਲੰਮਾ ਸਮ੍ਹਾਂ ਉਨਾਂ ਮੁੱਦਿਆਂ ਨੂੰ ਸਾਕਾਰ ਕਰਨ ਲਈ ਯੁੱਧਮਈ ਸੰਘਰਸ਼ ਕਰਦੀ ਰਹੀ। ਇਸਦੇ ਨਾਲ ਨਾਲ ਪੰਜਾਬੀ ਪ੍ਰੈੱਸ ਕਲੱਬ ਦੀ ਆਪਣੀ ਪਛਾਣ ਨੂੰ ਸਥਾਪਤ ਕਰਨ ਦਾ ਮੁੱਦਾ ਵੀ ਔਖਾ ਪੈਂਡਾ ਸੀ।
ਪੰਜਾਬੀ ਪ੍ਰੈੱਸ ਕਲੱਬ ਦੇ ਦੋ ਸਲਾਨਾ ਸਮਾਗਮ, ਕਾਨਫਰੰਸ ਤੇ ਗਾਲਾ ਨਾਈਟ ਇੱਸਦੇ ਇਤਹਾਸ ਵਿੱਚ ਅਨਿਖੜਵੇਂ ਹੋ ਨਿਬੜੇ ਹਨ। ਕਈ ਤਰ੍ਹਾਂ ਦੇ ਹਮਲਿਆਂ ਦਾ ਸਾਹਮਣਾ ਕਰਦੀ ਪ੍ਰੈੱਸ ਕਲੱਬ ਅੱਜ ਸਾਰੀਆਂ ਚੁਣੌਤੀਆਂ ਨੂੰ ਪਛਾੜਦੀ ਅੱਗੇ ਵੱਧ ਰਹੀ ਹੈ। ਪੰਜਾਬੀ ਪ੍ਰੈੱਸ ਕਲੱਬ ਦੀ 8ਵੀਂ ਗਾਲਾ ਨਾਈਟ ਠੀਕ 8 ਵਜ੍ਹੇ ਚਾਂਦਨੀ ਬੈਂਕੁਐਟ ਹਾਲ ਵਿੱਚ ਸ਼ੁਰੂ ਹੋਈ। ਇਸ ਵਿੱਚ ਡਾ. ਬਲਵਿੰਦਰ ਸਿੰਘ ਨੇ ਸਭ ਨੂੰ ਜੀ ਆਇਆਂ ਕਿਹਾ। ਸ਼ੁਰੂਆਤੀ ਆਈਟਮ ਬਦੇਸ਼ਾ ਗਾਇਕ ਦੀ ਗਾਇਕੀ ਨਾਲ ਸ਼ੁਰੂ ਹੋਈ। ਸਟੇਜ ਤੇ ਬੈਠ ਕੇ ਨਿਵੇਕਲ੍ਹੇ ਅੰਦਾਜ਼ ਵਿੱਚ ਬਦੇਸ਼ਾ ਜੱਟ ਨੇ ਕੁੱਝ ਗੀਤ ਗਾ ਕੇ ਗਾਲਾ ਦਾ ਆਨੰਦਮਈ ਮਹੌਲ ਸਿਰਜ ਦਿੱਤਾ। ਅਤੇ ਮਹਿਮਾਨਾਂ ਨੂੰ ਸਟੇਜ ਨਾਲ ਜੋੜ ਦਿੱਤਾ।
ਡਾ. ਰਨਵੀਰ ਸ਼ਾਰਦਾ ਨੇ ਸ਼ੁਰੂਆਤੀ ਭਾਸ਼ਨ ਵਿੱਚ ਪੰਜਾਬੀ ਪ੍ਰੈੱਸ ਕਲੱਬ ਦੇ ਸਮੂਹ ਮੈਂਬਰਾਂ ਦਾ ਧੰਨਵਾਦ ਕੀਤਾ ਅਤੇ ਜੋਗਿੰਦਰ ਸਿੰਘ ਗਰੇਵਾਲ ਅਤੇ ਬੌਬ ਦੁਸਾਂਝ ਦੀ ਪ੍ਰਸੰਸਾ ਕਰਦਿਆਂ ਉਨ੍ਹਾਂ ਕਿਹਾ ਕਿ ਇਨਾਂ ਨੇ ਪਿਛਲੇ ਸਾਲ ਦੌਰਾਨ ਚੰਗੀਆਂ ਸੇਵਾਵਾਂ ਨਿਭਾਈਆਂ।
ਅੱਜ ਦੇ ਪਹਿਲੇ ਬੁਲਾਰੇ, ਐਮ ਪੀ ਐਂਡਰੀਓ ਕੇਨੀਆ ਨੇ ਪੰਜਾਬੀ ਪ੍ਰੈੱਸ ਕਲੱਬ ਦੀ ਪ੍ਰਸੰਸਾ ਕਰਦਿਆਂ ਕਿਹਾ ਕਿ ਜਦੋਂ ਜੁਲਾਈ 2009 ਵਿੱਚ ਵਰਲਡ ਪੰਜਾਬੀ ਕਾਨਫਰੰਸ ਹੋਈ ਸੀ ਤਾਂ ਬਹੁਤੇ ਸਕਾਲਰਾਂ ਨੂੰ ਕੰਸਰਵਟਿਵ ਸਰਕਾਰ ਨੇ ਵੀਜ਼ੇ ਨਹੀਂ ਸਨ ਦਿੱਤੇ। ਜਿਸ ਦੀ ਨਿਖੇਧੀ ਕਰਨੀ ਬਣਦੀ ਹੈ। ਉਂਨਾਂ ਕਿਹਾ ਕਿ ਮੈਨੂੰ ਇਸ ਗੱਲ ਦਾ ਮਾਣ ਹੈ ਕਿ ਪੰਜਾਬੀ ਪ੍ਰੈੱਸ ਕਲੱਬ ਕਮਿਊਨਟੀ ਪ੍ਰਤੀ ਸੇਵਾਵਾਂ ਚੰਗੀਆਂ ਸੇਵਾਵਾਂ ਨਿਭਾ ਰਹੀ ਹੈ।
ਇਸ ਤੋਂ ਅੱਗੇ ਮਿਸੀਸਾਗਾ ਬਰੈਂਪਟਨ ਸਾਊਥ ਦੀ ਐਮ ਪੀ ਪੀ ਅੰਮ੍ਰਿਤ ਮਾਂਗਟ ਨੇ ਪੰਜਾਬੀ ਪ੍ਰੈੱਸ ਕਲੱਬ ਦੀਆਂ ਸੇਵਾਵਾਂ ਦੀ ਸ਼ਲਾਘਾ ਕੀਤੀ ਅਤੇ ਯਾਦ ਕੀਤਾ ਕਿ ਪਿਛਲੇ ਸਾਲ ਵੀ ਉਹ ਇਸ ਸ਼ਾਮ ਵਿੱਚ ਸ਼ਾਮਲ ਹੋਏ ਸੀ। ਉਨਾਂ ਕਿਹਾ ਕਿ ਮੀਡੀਆ ਸਮਾਜ ਵਿੱਚ ਆਰਥਿਕ ਅਤੇ ਸਮਾਜਿਕ ਮੁੱਦਿਆਂ ਨੂੰ ਉਭਾਰਦਾ ਹੈ। ਮੀਡੀਆ ਹਮੇਸ਼ਾਂ ਸਾਕਾਰਾਤਾਮਿਕ ਅਤੇ ਸੰਤੁਲਿਤ ਹੋਣਾ ਚਾਹੀਦਾ ਹੈ। ਉਨਾਂ ਇੱਛਾ ਜ਼ਾਹਿਰ ਕੀਤੀ ਕਿ ਅਗਲੇ ਸਾਲ ਵੀ ਉਹ ਇਸ ਗਾਲਾ ਨਾਈਟ ਵਿੱਚ ਸ਼ਾਮਲ ਹੋਣਾ ਚਾਹੁਣਗੇ।
ਬਰੈਂਪਟਨ ਵੈਸਟ ਤੋਂ ਕੰਸਰਵਟਿਵ ਦੇ ਫੇਡਰਲ ਉਮੀਦਵਾਰ ਕਾਇਲ ਸੀਬੈਕ ਨੇ ਇਸ ਮੌਕੇ ਕਿਹਾ ਕਿ ਸੰਤੁਲਿਤ ਮੀਡੀਆ ਦੇ ਰੋਲ ਦੇ ਮਹੱਤਵ ਨੂੰ ਸਮਝਿਆ ਜਾਣਾ ਚਾਹੀਦਾ ਹੈ। ਉਨ੍ਹਾਂ ਕਿਹਾ ਕਿ ਮੈਨੂੰ ਪਤਾ ਹੈ ਕਿ ਪੰਜਾਬੀ ਪ੍ਰੈੱਸ ਕਲੱਬ ਕਦੋਂ ਅਤੇ ਕਿੰਨਾਂ ਹਾਲਾਤਾਂ ਵਿੱਚ ਬਣਾਈ ਗਈ ਸੀ। ਮੈਨੂੰ ਮਾਣ ਵੀ ਹੈ ਕਿ ਮੇਰੇ ਹਲਕੇ ਵਿੱਚ ਬਹੁਤ ਸਾਰਾ ਐਥਨਿਕ ਮੀਡੀਆ ਮੌਜੂਦ ਹੈ ਜੋ ਸਾਡੇ ਸਮਾਜ ਨੂੰ ਰਾਜਨੀਤਕ ਅਤੇ ਸਮਾਜਿਕ ਗਤੀਆਂ ਵਿਧੀਆਂ ਤੋਂ ਸੁਚੇਤ ਕਰਦਾ ਰਹਿੰਦਾ ਹੈ।
ਹੈਮਿਲਟਨ ਇਲਾਕੇ ਦੈ ਐਮ ਪੀ ਵੇਨ ਮਾਰਸ਼ਨ, ਜੋ ਆਪਣੀ ਪਤਨੀ ਨਾਲ ਇਸ ਸਮਾਗਮ ਵਿੱਚ ਸ਼ਾਮਲ ਹੋਏ ਸਨ ਅਤੇ ਹਰ ਸਾਲ ਹੈਮਿਟਲਨ ਦੇ ਨਗਰ ਕੀਰਤਨ ਵਿੱਚ ਸੰਗਤ ਨਾਲਾ ਸਾਰਾ ਰੂਟ ਪੈਦਲ ਚੱਲਦੇ ਹਨ, ਨੇ ਕਿਹਾ ਕਿ ਉਹ ਪੰਜਾਬੀ ਮਿਊਜ਼ਕ ਨੂੰ ਬੇਹੱਦ ਪਸੰਦ ਕਰਦੇ ਹਨ। ਉਨ੍ਹਾਂ ਬਦੇਸ਼ਾਂ ਜੱਟ ਦੀ ਗਾਇਕੀ ਦੀ ਪ੍ਰਸੰਸਾ ਕਰਦਿਆਂ ਕਿਹਾ ਕਿ ਭਾਵੇਂ ਮੈਂ ਇੱਕ ਲਫਜ਼ ਵੀ ਨਹੀਂ ਸਮਝ ਸਕਿਆ ਪਰ ਮੈਂ ਇਸ ਗਾਇਕੀ ਨੂੰ ਮਾਣਿਆ ਹੈ। ਵੇਨ ਨੇ ਪੰਜਾਬੀ ਪ੍ਰੈੱਸ ਕਲੱਬ ਦੀ ਪ੍ਰਸੰਸਾ ਕਰਦਿਆ ਕਿਹਾ ਕਿ ਇਹ ਬਹੁਤ ਗੰਭੀਰ ਸੰਸਥਾ ਹੈ ਜਿਸਦਾ ਸਹਿਯੋਗ ਦੇਣ ਦੀ ਲੋੜ ਹੈ।
ਸੀਨੀਅਰਜ਼ ਅਤੇ ਪੈਂਸ਼ਨਰਜ਼ ਮੰਤਰਾਲੇ ਦੀ ਕ੍ਰਿਟਿਕ, ਐਮ ਪੀ ਜੂਡੀ ਸਗਰੋ ਨੇ ਇਸ ਮੌਕੇ ਪੰਜਾਬੀ ਪ੍ਰੈੱਸ ਕਲੱਬ ਦੇ ਰੋਲ ਦੀ ਸ਼ਲਾਘਾ ਕੀਤੀ ਅਤੇ ਕਿਹਾ ਕਿ ਇਹ ਉਹ ਮੀਡੀਆ ਹੈ ਜਿਹੜਾਂ ਰਾਜਨੀਤਕ ਗਤੀਆਂ ਵਿਧੀਆਂ ਨੂੰ ਲੋਕਾਂ ਤੱਕ ਪਹੁੰਚਾਉਂਦਾ ਹੈ। ਉਨ੍ਹਾਂ ਕਿਹਾ ਕਿ ਸਰਕਾਰਾਂ ਤਾਂ ਕੰਮ ਹੀ ਕਰ ਸਕਦੀਆਂ ਹਨ ਪਰ ਇਨਾਂ ਦੀ ਜਾਣਕਾਰੀ ਲੋਕਾਂ ਤੱਕ ਪਹੁੰਚਾਉਣ ਲਈ ਮੀਡੀਆ ਕਾਰਗਰ ਹੁੰਦਾ ਹੈ। ਪੰਜਾਬੀ ਪ੍ਰੈੱਸ ਕਲੱਬ ਜਿਹੜੀਆਂ ਸੇਵਾਵਾਂ ਦੇ ਰਹੀ ਹੈ ਉਹ ਅਹਿਮ ਅਤੇ ਲੋਕਤੰਤਰਤਾ ਦਾ ਅਨਿੱਖੜਵਾਂ ਅੰਗ ਹੈ। ਜੋਗਿੰਦਰ ਸਿੰਘ ਗਰੇਵਾਲ ਨੇ ਇਸ ਮੌਕੇ ਪਿਛਲੇ ਸਾਲ ਦੀ ਕਾਰਗੁਜ਼ਾਰੀ ਬਾਰੇ ਚਾਨਣਾ ਪਾਇਆ, ਉਨ੍ਹਾਂ ਨੇ ਦੱਸਿਆ ਕਿ ਵਿੱਕੀ ਢਿਲੋਂ ਦੇ ਸਹਿਯੋਗ ਨਾਲ ਅਸੀਂ ਡੋਡਿਆਂ ਨੂੰ ਨੱਥ ਪਾਈ ਹੈ। ਉਨ੍ਹਾਂ ਦੱਸਿਆ ਕਿ ਜਿਹੜਾ ਮੈਂਬਰ ਸਮਾਜਿਕ ਬੁਰਾਈਆਂ ਵਾਲੀਆਂ ਐਡਾਂ ਪ੍ਰਕਾਸ਼ਤ ਕਰਦਾ ਹਾਂ, ਉਹ ਪੰਜਾਬੀ ਪ੍ਰੈੱਸ ਕਲੱਬ ਦਾ ਮੈਂਬਰ ਨਹੀਂ ਬਣ ਸਕਦਾ। ਇਸ ਤੋਂ ਇਲਾਵਾ ਹੋਰ ਅਨੇਕਾਂ ਕਾਰਜਾਂ ਦਾ ਜਿ਼ਕਰ ਕਰਦਿਆਂ ਜੋਗਿੰਦਰ ਸਿੰਘ ਗਰੇਵਾਲ ਨੇ ਲੰਬੀ ਤਕਰੀਰ ਦਿੱਤੀ। ਉਂ੍ਹਾਂ ਜਿ਼ਕਰ ਕੀਤਾ ਕਿ ਪਿਛਲੀਆਂ ਫੇਡਰਲ ਚੋਣਾਂ ਦਰਮਿਆਨ ਪ੍ਰੈੱਸ ਕਲੱਬ ਨੇ ਜਬਰਦਸਤ ਕਾਰਜ ਕੀਤਾ ਅਤੇ ਪੰਜਾਬੀ ਵੋਟਰਾਂ ਨਾਲ ਪ੍ਰਭਾਵਿਤ ਹਲਕਿਆਂ ਵਿੱਚ ਡੀਬੇਟਾਂ ਕਰਵਾਈਆਂ। ਐਥੋਂ ਤੱਕ ਕਿ ਬਰੈਂਪਟਨ ਸਪਰਿੰਗਡੇਲ ਦੀ ਡੀਬੇਟ ਵੇਲੇ ਲੋਕਾਂ ਨੂੰ ਖਦਸ਼ਾ ਸੀ ਕਿ ਪ੍ਰੈੱਸ ਕਲੱਬ ਦੇ ਮੈਂਬਰ ਪੱਖਪਾਤ ਕਰਨਗੇ ਪਰ ਇਸ ਡੀਬੇਟ ਵਿੱਚ ਪ੍ਰੈੱਸ ਕਲੱਬ ਵਲੋਂ ਲਾਗੂ ਜਾਬਤੇ ਨੇ ਇਸ ਡੀਬੇਟ ਨੂੰ ਲੋਕਾਂ ਲਈ ਜਾਣਕਾਰੀ ਭਰਪੂਰ ਬਣਾ ਦਿੱਤਾ ਅਤੇ ਹਰ ਉਮੀਦਵਾਰ ਨੇ ਇਸ ਡੀਬੇਟ ਬਾਰੇ ਪ੍ਰੈੱਸ ਕਲੱਬ ਦੇ ਮੈਂਬਰਾਂ ਦੀ ਸ਼ਲਾਘਾ ਕੀਤੀ। ਸ੍ਰ. ਗਰੇਵਾਲ ੇਨ ਦੱਸਿਆ ਕਿ ਇਸ ਤੋਂ ਇਲਾਵਾ ਜਦੋਂ ਕੈਨੇਡਾ ਦੀ ਫੇਡਰਲ ਸਰਕਾਰ ਇੰਮੀਗ੍ਰੇਸ਼ਨ ਬਿੱਲ ਸੀ-50 ਵਿੱਚ ਕੁੱਝ ਤਰਮੀਮਾਂ ਕਰ ਰਹੀ ਸੀ ਤਾਂ ਇਸ ਬਾਰੇ ਲੋਕਾਂ ਵਿੱਚ ਬੜੀ ਚਰਚਾ ਸੀ। ਪ੍ਰੈੱਸ ਕਲੱਬ ਨੇ ਇਸ ਚਰਚਾ ਨੂੰ ਸਾਕਾਰ ਰੂਪ ਦੇਣ ਲਈ ਇੱਕ ਸੈਮੀਨਾਰ ਕਰਵਾਇਆ ਜਿਸ ਵਿੱਚ ਵੱਡੀ ਤਾਦਾਦ ਵਿੱਚ ਲੋਕਾਂ ਨੇ ਹਿੱਸਾ ਲਿਆ। ਲਿਰਬਲ ਅਤੇ ਐਨ ਡੀ ਪੀ ਦੇ ਲਿਬਰਲ ਕ੍ਰਿਟਿੱਕ ਤੋਂ ਇਲਾਵਾ ਡਾ. ਰੂਬੀ ਢਾਲਾ ਨੇ ਵੀ ਇਸ ਵਿੱਚ ਹਿੱਸਾ ਲਿਆ ਸੀ।
ਇਸ ਮੌਕੇ ਪੰਜਾਬੀ ਪ੍ਰੈੱਸ ਕਲੱਬ ਵਲੋਂ "ਕਮਿਊਨਟੀ ਐਕਸੀਲੈਂਸੀ ਅਵਾਰਡ" ਨਾਲ ਕਮਿਊਨਟੀ ਦੀਆਂ ਕੁੱਝ ਬੜੀਆਂ ਗੰਭੀਰ ਅਤੇ ਨਾਮਵਰ ਸ਼ਖ਼ਸ਼ੀਅਤਾਂ ਨੂੰ ਸਨਮਾਨਿਤ ਕੀਤਾ ਗਿਆ। ਇਨਾਂ ਵਿੱਚ ਵਿੱਕੀ ਢਿਲੋਂ, ਡਾ. ਸਲਮਾਨ ਨਾਜ਼, ਡਾ. ਰਨਵੀਰ ਸ਼ਾਰਦਾ, ਜੋਗੰਦਰ ਕਲਸੀ, ਪ੍ਰੋ. ਉਦੈ ਸਿੰਘ, ਹਰਦੇਵ ਸਿੰਘ ਆਰਟਿਸਟ, ਬੀਬੀ ਅਬਨਾਸ਼ ਕੌਰ, ਸੋਹਣ ਕਾਦਰੀ ਅਤੇ ਨਵਜੋਤ ਕੌਰ ਦੇ ਨਾਮ ਸ਼ਾਮਲ ਹਨ।
ਵਿੱਕੀ ਢਿਲੋਂ ਨੇ ਕਿਹਾ ਕਿ ਮੈਂ ਇਸ ਅਵਾਰਡ ਦੇ ਲਾਇਕ ਨਹੀਂ ਹਾਂ ਪਰ ਮੈਨੂੰ ਸਮਨਾਨਿਤ ਕਰਨ ਦੇ ਮੈਨੂੰ ਖੁਸ਼ੀ ਹੈ। ਉਨ੍ਹਾਂ ਇਸ ਭਾਸ਼ਨ ਵਿੱਚ ਅਗਲੇ ਸਾਲ ਦੀ ਮਿਊਂਸਪਲ ਚੋਣਾਂ ਦੀ ਕੈਂਪੇਨ ਵੀ ਆਪਣੇ ਢੰਗ ਨਾਲ ਹੀ ਇਹ ਕਹਿ ਸ਼ੁਰੂ ਕਰ ਦਿੱਤੀ ਕਿਹਾ ਕਿ ਅਗਲੀਆਂ ਚੋਣਾਂ ਵਿੱਚ ਨਵੇਂ ਉਮੀਦਵਾਰ ਆਉਣਗੇ ਪਰ ਮੈਂ ਚਾਹੂਂਗਾ ਕਿ ਮੈਨੂੰ ਕੋਈ ਫੱਟਾ ਨਾ ਗੱਡਣਾ ਪਵੇ। ਵਿੱਲੀ ਢਿਲੋਂ ਨੇ ਕਿਹਾ ਕਿ ਡਰੱਗ ਸਾਡੀ ਕਮਿਊਨਟੀ ਨੂੰ ਘੁਣ ਵਾਗੂੰ ਲੱਗਿਆ ਹੋਇਆ ਹੈ, ਸਾਨੂੰ ਇਸ ਸਮੱਸਿਆ ਨੂੰ ਬੜੀ ਗੰਭੀਰਤਾ ਨਾਲ ਲੈਣਾ ਚਾਹੀਦਾ ਹੈ। ਸਾਨੂੰ ਵੈਨਕੂਵਰ ਵਰਗੇ ਦਿਨ ਨਾ ਵੇਖਣੇ ਪੈਣ ਜਦੋਂ ਕਿ ਇਥੇ ਵੀ ਸਥਿਤੀ ਉਹੋ ਜਿਹੀ ਹੀ ਹੋ ਗਈ ਹੈ। ਲੋਕ ਇਸ ਨੂੰ ਬਿਆਨਬਾਜੀ ਕਹਿ ਕੇ ਨਕਾਰ ਦਿੰਦੇ ਹਨ। ਉਨ੍ਹਾਂ ਨੇ ਪੰਜਾਬੀ ਪ੍ਰੈੱਸ ਕਲੱਬ ਨੂੰ ਵੀ ਕੋਸਿਆ ਕਿ ਇਹ ਡਰੱਗ ‘ਚ ਫੜੇ ਲੋਕਾਂ ਨੂੰ ਨੰਗਿਆ ਕਰਨ ਵਿੱਚ ਸੰਗਦੇ ਰਹਿੰਦੇ ਹਨ। ਵਿੱਕੀ ਨੇ ਕਿਹਾ ਕਿ ਪੁਲੀਸ, ਸਕੂਲ ਜਾਂ ਰਾਜਨੀਤਕ ਲੋਕਾਂ ਦੀ ਜਿ਼ੰਮੇਵਾਰੀ ਨਹੀਂ ਕਿ ਤੁਹਾਡੇ ਬੱਚਿਆਂ ਨੂੰ ਬਚਾਇਆ ਜਾਵੇ, ਇਹ ਤੁਹਾਡੀ ਜਿ਼ੰਮੇਵਾਰੀ ਹੈ।
ਲਿਬਰਲ ਦੇ ਸੀਨੀਅਰ ਆਗੂ ਅਤੇ ਉਨਟਾਰੀਓ ਦੇ ਸਾਬਕਾ ਪ੍ਰੀਮੀਅਰ ਬੌਬ ਰੇਅ ਨੇ ਇਸ ਮੌਕੇ ਕੁੰਜੀਵੱਤ ਭਾਸ਼ਨ ਦੌਰਾਨ ਪੰਜਾਬੀ ਪ੍ਰੈੱਸ ਕਲੱਬ ਨੂੰ ਵਧਾਈ ਦਿੱਤੀ। ਉਨ੍ਹਾਂ ਕਿਹਾ ਕਿ ਮੈਂ ਕਦੀ ਵੀ ਵਿੱਕੀ ਢਿਲੋਂ ਦੇ ਖਿਲਾਫ ਜਿੱਤ ਨਹੀਂ ਸਕਾਂਗਾ, ਕਿਉਂਕਿ ਇਸ ਭਾਈਚਾਰੇ ਵਿੱਚ ਵਿੱਕੀ ਦੀ ਬਹੁਤ ਸੁਪੋਰਟ ਹੈ। ਮੈਂ ਦੱਸਣਾ ਚਾਹੁੰਦਾ ਹਾਂ ਕਿ ਮੈਨੂੰ ਅੱਜ ਉਸ ਨਿੱਕੀ ਲੜਕੀ ਨੇ ਟੁੰਬਿਆ ਹੈ, ਜਿਸ ਨੇ 5 ਸਾਲ ਦੀ ਉਮਰ ਵਿੱਚ ਗੁਟਕੇ ਤੋਂ ਪਾਠ ਕੀਤਾ। ਇੱਕ ਦਿਨ ਇਹ ਲੜਕੀ ਕੈਨੇਡਾ ਦੀ ਪ੍ਰਧਾਨ ਮੰਤਰੀ ਬਣ ਸਕਦੀ ਹੈ ਕਿਉਂਕਿ ਕਿ ਨਿੱਕੀ ਉਮਰ ਵਿੱਚ ਉਹ ਆਪਣੇ ਧੁਰੇ ਨਾਲ ਜੁੜੀ ਹੋਈ ਹੈ।
ਕਾਮਾਗਾਟੂ ਮਾਰੂ ਅਤੇ ਉਸ ਸਮਿਆਂ ਦੀ ਗੱਲ ਕਰਦਿਆਂ ਉਨ੍ਹਾਂ ਕਿਹਾ ਕਿ ਹੁਣ ਕੈਨੇਡਾ ਸਰਕਾਰ ਨੂੰ ਸੌਰੀ ਕਹਿ ਕੇ ਪੱਲਾ ਛੁਡਾ ਲੈਣਾ ਚਾਹੀਦਾ ਹੈ। ਮੈਂ ਮੰਨਦਾ ਹਾਂ ਕਿ ਸਰਕਾਰਾ ਨੂੰ ਮੁਆਫੀ ਮੰਗਣੀ ਚਾਹੀਦੀ ਹੈ ਅਤੇ ਅਜਿਹਾ ਕਰਨਾ ਕਨੇਡੀਅਨ ਕਦਰਾਂ ਕੀਮਤਾਂ ਦੇ ਅਨੂਕੂਲ ਹੈ। ਬੌਬ ਰੇਅ ਨੇ ਬੜੀ ਭਾਵਨਾਤਮਿਕ ਤਕਰੀਰ ਕਰਦਿਆਂ ਕਿਹਾ ਕਿ ਸਾਨੂੰ ਆਪਣੀਆਂ ਜੜਾਂ ਨਾਲ ਜੁੜ ਕੇ ਰਹਿਣਾ ਚਾਹੀਦਾ ਹੈ। ਵਿਕਸਤ ਕੈਨੇਡਾ ਤਾਂ ਹੀ ਸਿਰਜਿਆ ਜਾ ਸਕਦਾ ਹੈ ਅਗਰ ਅਸੀਂ ਆਪਣੀ ਜੜ੍ਹਾਂ ਨਾਲ ਜੁੜ ਕੇ ਇਕੱਠੇ ਹੋ ਕੇ ਇਸ ਦੇ ਵਿਕਾਸ ਵਿੱਚ ਜੁੜਾਂਗੇ। ਬੇਇਨਸਾਫੀ, ਨੈਰੋਨਿਸ, ਡਵਿਜ਼ਨ ਵਰਗੀਆਂ ਅਲਾਮਤਾਂ ਨੂੰ ਤਿਆਗਣਾ ਕੈਨੇਡਾ ਦੀਆਂ ਕਦਰਾਂ ਕੀਮਤਾਂ ਦਾ ਅਨਿਖੜਵਾਂ ਅੰਗ ਹਨ।
ਸੁਖਮਿੰਦਰ ਸਿੰਘ ਹੰਸਰਾ ਨੇ ਇਸ ਮੌਕੇ ਜਿਥੇ ਆਏ ਹੋਏ ਮੋਹਤਬਾਰ ਸ਼ਖਸ਼ੀਅਤਾਂ ਦਾ ਧੰਨਵਾਦ ਕੀਤਾ ਉਥੇ ਦੱਸਿਆ ਕਿ ਪੰਜਾਬੀ ਪ੍ਰੈੱਸ ਕਲੱਬ, ਇੱਕ ਅਜਿਹੀ ਸੰਸਥਾ ਹੈ ਜਿਹੜੀ ਲੋਕਾਂ ਦੀ ਭਲਾਈ ਲਈ ਯਤਨਸ਼ੀਲ ਹੈ। ਹੰਸਰਾ ਨੇ ਕਿਹਾ ਕਿ ਪ੍ਰੈੱਸ ਕਲੱਬ ਦੀ ਕਾਨਫਰੰਸ ਵਿੱਚ ਪਾਸ ਕੀਤੇ ਗਏ ਮਤਿਆਂ ਦਾ ਮੁਲਾਂਕਣ ਕਰਕੇ ਵੇਖੋ ਤਾਂ ਤੁਹਾਨੂੰ ਪਤਾ ਲੱਗੇਗਾ ਕਿ ਇਨਾਂ ਮਤਿਆਂ ਵਿੱਚ ਐਡਾਂ ਦੇ ਰੇਟ ਵਧਾਉਣ ਦਾ ਕੋਈ ਮਤਾ ਨਹੀਂ ਹੈ ਸਾਰੇ ਸਮਾਜ ਨਾਲ ਸਬੰਧਤ ਹਨ, ਪੰਜਾਬੀ ਡਿਕਸ਼ਨਰੀ, ਅੱਖਰਮਾਲਾ, ਗੁੰਮਰਾਹਕੁੰਨ ਪ੍ਰਚਾਰ ਦਾ ਟਾਕਰਾ, ਯੂਥ ਵਾਏਲੈਂਸ, ਡੁਮੈਸਟਿੱਕ ਵਾਏਲੈਂਸ ਆਦਿ ਮੁੱਦੇ ਹਨ, ਜਿਹੜੇ ਸਾਡੀ ਲੀਡਰਸਿ਼ਪ ਨੂੰ ਕਰਨੇ ਚਾਹੀਦੇ ਹਨ, ਪਰ ਪ੍ਰੈੱਸ ਕਲੱਬ ਕਰ ਰਹੀ ਹੈ। ਸ੍ਰ. ਹੰਸਰਾ ਨੇ ਕਿਹਾ ਕਿ ਪੰਜਾਬੀ ਪ੍ਰੈੱਸ ਕਲੱਬ ਨੇ ਮੀਡੀਏ ਦੇ ਖੇਤਰ ਵਿੱਚ ਇੱਕ ਜਾਬਤਾ ਲਾਗੂ ਕੀਤਾ ਹੈ ਜਿਸ ਦੀ ਕਿਸੇ ਵੀ ਅਦਾਰੇ ਨੂੰ ਚਲਾਉਣ ਲਈ ਸਖਤ ਲੋੜ ਹੁੰਦੀ ਹੈ। ਜਿਹੜਾ ਅਦਾਰਾ ਜਾਬਤੇ ਵਿੱਚ ਰਹਿ ਕੇ ਕੰਮ ਨਹੀਂ ਕਰ ਸਕਦਾ, ਉਹ ਸਮਾਜਿਕ ਵਿਕਾਸ ਵਿੱਚ ਯੋਗਦਾਨ ਨਹੀਂ ਪਾ ਸਕਦਾ। ਇਹ ਸਮਾਜ ਨੇ ਵੇਖਣਾ ਹੈ ਕਿ ਕੌਣ ਕੀ ਕਰ ਰਿਹਾ ਹੈ।
ਪੰਜਾਬੀ ਪ੍ਰੈੱਸ ਕਲੱਬ ਦੀ ਇਸ ਸ਼ਾਮ ਨੂੰ ਸਟੇਜੀ ਤਰਤੀਬ ਡਾ. ਬਲਵਿੰਦਰ ਸਿੰਘ ਨੇ ਦਿੱਤੀ। ਨਵਨਿਯੁਕਤ ਕੋਆਰਡੀਨੇਟਰ ਅਵਤਾਰ ਸਿੰਘ ਰੱਖੜਾ, ਸਹਿ ਕੋਆਰਡੀਨੇਟਰ ਗੁਰਪ੍ਰੀਤ ਸਿੰਘ ਮਾਨ ਨੇ ਇਸ ਮੌਕੇ ਆਏ ਹੋਏ ਮਹਿਮਾਨਾਂ ਦਾ ਧੰਨਵਾਦ ਕੀਤਾ। ਅਵਤਾਰ ਸਿੰਘ ਰੱਖੜਾਂ ਨੇ ਪੰਜਾਬੀ ਪ੍ਰੈੱਸ ਕਲੱਬ ਵਲੋਂ ਮਿੱਥੇ ਨਿਸ਼ਾਨਿਆਂ ਦੀ ਪੂਰਤੀ ਲਈ ਵੱਚਨਵੱਧਤਾ ਦੁਹਰਾਈ। ਉਨਾਂ ਜੋਗਿੰਦਰ ਸਿੰਘ ਗਰੇਵਾਲ ਦਾ ਧੰਨਵਾਦ ਕਰਦਿਆ ਕਿਹਾ ਕਿ ਮੈਂ ਇਕੱਲਾ ਕੱਖ ਵੀ ਨਹੀਂ ਕਰ ਸਕਾਂਗਾ, ਇਹ ਟੀਮ ਵਰਕ ਹੈ ਅਤੇ ਮੈਨੂੰ ਹਰ ਇੱਕ ਮੈਂਬਰ ਦੇ ਸਹਿਯੋਗ ਦੀ ਲੋੜ ਹੋਵੇਗੀ। ਉਨ੍ਹਾਂ ਇਹ ਵੀ ਕਿਹਾ ਕਿ ਮੈਨੂੰ ਭਾਈਚਾਰੇ, ਵਪਾਰਕ ਅਦਾਰੇ ਅਤੇ ਰਾਜਕਨੀਤਕਾਂ ਦੇ ਸਹਿਯੋਗ ਦੀ ਵੀ ਲੋੜ ਪਵੇਗੀ।
ਅਖੀਰ ਵਿੱਚ ਚਾਂਦਨੀ ਬੈਂਕੁਐਟ ਹਾਲ ਦੇ ਲਾਡੀ ਅਤੇ ਚੰਨੀ ਦਾ ਵਧੀਆ ਅਤੇ ਸਾਫ ਸੁਥਰਾ ਇੰਤਜਾਮ ਕਰਨ ਲਈ, ਬੌਬ ਦੁਸਾਂਝ ਦਾ ਸਾਊਂਡ ਅਤੇ ਵੀਡੀਓ ਬਣਾਉਣ ਲਈ ਅਤੇ ਸੁਰਿੰਦਰ ਸਿੰਘ ਪਾਬਲਾ (ਪਾਬਲਾ ਸਟੂਡੀਓ) ਦਾ ਫੋਟੋਗਰਾਫੀ ਲਈ ਧੰਨਵਾਦ ਕੀਤਾ ਗਿਆ। ਪੰਜਾਬੀ ਪ੍ਰੈੱਸ ਕਲੱਬ ਦੀ 8ਵੀਂ ਗਾਲਾ ਨਾਈਟ ਅਮਿੱਟ ਪੈੜਾ ਵਾਹੁੰਦੀ ਸਮਾਪਤ ਹੋਈ ਅਤੇ ਅਗਲੀ ਗਾਲਾ ਦੀ ਉਡੀਕ ਵਿੱਚ ਮਹਿਮਾਨਾਂ ਨੇ ਖਾਣਾ ਖਾ ਕੇ ਵਿਦਾਇਗੀ ਲਈ।

ਸਿੱਖ ਕੌਮ 31 ਅਕਤੂਬਰ ਨੂੰ ਗੁਰਦੁਆਰਾ ਸ਼੍ਰੀ ਰਕਾਬ ਗੰਜ ਦਿੱਲੀ ਵਿਖੇ ਪਹੁੰਚ ਕੇ “ਅਰਦਾਸ ਦਿਵਸ” ਵਿੱਚ ਸਮੂਲੀਅਤ ਕਰੇ :- ਮਾਨ

ਫਤਿਹਗੜ੍ਹ ਸਾਹਿਬ, 21 ਅਕਤੂਬਰ :- ਸ: ਸਿਮਰਨਜੀਤ ਸਿੰਘ ਮਾਨ ਪ੍ਰਧਾਨ ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਨੇ ਅੱਜ ਇੱਕ ਵਿਸ਼ੇਸ ਪ੍ਰੈਸ ਰਲੀਜ਼ ਜਾਰੀ ਕਰਦੇ ਹੋਏ ਸਮੁੱਚੀ ਸਿੱਖ ਕੌਮ ਨੂੰ 31 ਅਕਤੂਬਰ ਦਿਨ ਸ਼ਨੀਵਾਰ ਨੂੰ ਸਵੇਰੇ 11 ਵਜੇ ਗੁਰਦੁਆਰਾ ਸ਼੍ਰੀ ਰਕਾਬ ਗੰਜ ਸਾਹਿਬ ਦਿੱਲੀ ਵਿਖੇ ਪਹੁੰਚਣ ਦੀ ਅਪੀਲ ਕਰਦੇ ਹੋਏ ਕਿਹਾ ਹੈ ਕਿ ਇਸ ਦਿਨ ਨੂੰ 1984 ਦੇ ਸਿੱਖ ਕੌਮ ਦੇ ਹੋਏ ਸਾਜਿਸ਼ੀ ਕਤਲੇਆਮ – ਨਸਲਕੁਸੀ ਦੇ 25 ਵਰ੍ਹੇ ਪੂਰੇ ਹੋ ਜਾਣਗੇ। ਹਿੰਦੂਤਵ ਹਕੂਮਤ ਜੋ ਆਪਣੇ ਆਪ ਨੂੰ ਜਮਹੂਰੀਅਤ ਪਸੰਦ ਮੁਲਕ ਹੋਣ ਦਾ ਦਾਅਵਾ ਕਰਦੀ ਹੈ, ਉਸ ਵੱਲੋਂ ਸਿੱਖ ਕੌਮ ਦੇ ਇੱਕ ਵੀ ਕਿਸੇ ਕਾਤਿਲ ਨੂੰ ਕਾਨੂੰਨ ਅਨੁਸਾਰ ਬਣਦੀ ਸਜ਼ਾ ਨਾ ਦੇਣ ਦੀ ਕਾਰਵਾਈ ਸਿੱਖ ਕੌਮ ਦੇ ਜਖਮਾਂ ਨੂੰ ਹੋਰ ਵੀ ਡੂੰਘੇ ਕਰਦੀ ਹੈ। ਹਿੰਦੋਸਤਾਨ ਦੇ ਵਿਧਾਨ, ਕਾਨੂੰਨ ਅਤੇ ਇੱਥੋ ਦੀ ਹਕੂਮਤ ਨੇ 25 ਸਾਲਾਂ ਦਾ ਲੰਮਾ ਸਮਾਂ ਗੁਜ਼ਰਨ ਉਪਰੰਤ ਵੀ ਸਿੱਖ ਕੌਮ ਨੂੰ ਕੋਈ ਇਨਸਾਫ ਨਾ ਦੇ ਕੇ ਇਹ ਸਾਬਿਤ ਕਰ ਦਿੱਤਾ ਹੈ ਕਿ ਸਿੱਖ ਕੌਮ ਦਾ ਹੁਣ “ਆਜਾਦ” ਹੋਣ ਤੋਂ ਬਿਨਾ ਗੁਜ਼ਾਰਾ ਨਹੀਂ ਹੋ ਸਕਦਾ। ਇਸ ਲਈ 31 ਅਕਤੂਬਰ ਦੇ ਦਿਨ ਨੂੰ ਉਪਰੋਕਤ ਗੁਰੂ ਘਰ ਵਿਖੇ ਸਮੁੱਚੀ ਸਿੱਖ ਕੌਮ ਵੱਲੋ ਆਪਣੇ 1984 ਵਿੱਚ ਸ਼ਹੀਦ ਹੋਏ ਸਿੰਘਾਂ-ਸਿੰਘਣੀਆਂ ਨੂੰ ਯਾਦ ਕਰਦੇ ਹੋਏ “ਅਰਦਾਸ ਦਿਵਸ” ਮਨਾਇਆ ਜਾ ਰਿਹਾ ਹੈ, ਜਿਸ ਵਿੱਚ ਹਰ ਗੁਰਸਿੱਖ ਨੂੰ ਸਾ਼ਮਿਲ ਹੋ ਕੇ ਜਿੱਥੇ ਆਪਣੇ ਸ਼ਹੀਦਾਂ ਨੂੰ ਨਤਮਸਤਕ ਹੋਣਾ ਚਾਹੀਦਾ ਹੈ, ਉੱਥੇ ਇਸ ਮੌਕੇ ‘ਤੇ ਸਿੱਖ ਕੌਮ ਨਾਲ ਹੁੰਦੀ ਆ ਰਹੀ ਬੇਇਨਸਾਫੀ ਵਿਰੁੱਧ ਕੌਮਾਂਤਰੀ ਪੱਧਰ ‘ਤੇ ਆਵਾਜ਼ ਬੁਲੰਦ ਕਰਨ ਵਿੱਚ ਵੀ ਯੋਗਦਾਨ ਪਾਉਣਾ ਚਾਹੀਦਾ ਹੈ।
ਸ: ਸਿਮਰਨਜੀਤ ਸਿੰਘ ਮਾਨ ਨੇ ਆਪਣੇ ਬਿਆਨ ਵਿੱਚ ਇਹ ਵੀ ਜਾਣਕਾਰੀ ਦਿੱਤੀ ਕਿ ਇਸ ਦਿਨ ਸਿੱਖ ਕੌਮ ਨਾਲ ਸੰਬੰਧਿਤ ਸਮੁੱਚੀਆਂ ਸਮਾਜਿਕ, ਧਾਰਮਿਕ ਤੇ ਸਿਆਸੀ ਜਥੇਬੰਦੀਆਂ ਦੇ ਨੁਮਾਇੰਦਿਆਂ ਵੱਲੋਂ ਸਾਂਝੇ ਤੌਰ ਤੇ ਮੁਲਕ ਦੇ ਸਦਰ/ ਰਾਸ਼ਟਰਪਤੀ ਨੂੰ ਇੱਕ ਲਿਖਤੀ ਯਾਦਪੱਤਰ ਵੀ ਦਿੱਤਾ ਜਾਵੇਗਾ ਜਿਸ ਵਿੱਚ ਬੀਤੇ ਲੰਮੇ ਸਮੇਂ ਵਿੱਚ ਸਿੱਖ ਕੌਮ ਦੇ ਕਤਲੇਆਮ ਦੇ ਦੋਸ਼ੀਆਂ ਨੂੰ ਸਜਾਵਾਂ ਦੇਣ ਦੀ ਮੰਗ ਕਰਦੇ ਹੋਏ, ਸਿੱਖ ਕੌਮ ਨਾਲ ਇਸ ਮੁਲਕ ਵਿੱਚ ਧਾਰਮਿਕ, ਸਮਾਜਿਕ, ਸੱਭਿਆਚਾਰਿਕ ਅਤੇ ਆਰਥਿਕ ਹੁੰਦੇ ਆ ਰਹੇ ਵੱਡੇ ਵਿਤਕਰਿਆਂ ਨੂੰ ਤੁਰੰਤ ਦੂਰ ਕਰਨ ਦਾ ਵੇਰਵਾ ਦਿੰਦੇ ਹੋਏ ਕੌਮਾਂਤਰੀ ਪੱਧਰ ‘ਤੇ ਇਨਸਾਫ ਦੇਣ ਦੀ ਮੰਗ ਉਠਾਈ ਜਾਵੇਗੀ। ਸੋ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ, ਦਿੱਲੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ, ਸਿੱਖ ਕੌਮ ਨਾਲ ਸੰਬੰਧਿਤ ਸਟੂਡੈਟ ਫੇਡਰੇਸਨਾਂ, ਸੁਖਮਨੀ ਸਾਹਿਬ ਸੁਸਾਇਟੀਆਂ, ਸਿੰਘ ਸਭਾਵਾਂ, ਸੰਤ ਮਹਾਪੁਰਖਾਂ, ਸਮਾਜਿਕ ਅਤੇ ਧਾਰਮਿਕ ਜਥੇਬੰਦੀਆਂ ਨੂੰ ਅਪੀਲ ਕੀਤੀ ਗਈ ਹੈ ਕਿ ਉਹ ਇਸ ਮੌਕੇ ‘ਤੇ ਪਹੁੰਚ ਕੇ, ਅਰਦਾਸ ਦਿਵਸ ਵਿੱਚ ਸਮੂਲੀਅਤ ਕਰਦੇ ਹੋਏ, ਬੇਇਨਸਾਫੀਆਂ ਵਿਰੁੱਧ ਆਵਾਜ਼ ਬੁਲੰਦ ਕਰਕੇ ਆਪਣੇ ਕੌਮੀ ਫਰਜ਼ਾ ਨੂੰ ਪੂਰਨ ਕਰਨ।

ਸ਼੍ਰੋਮਣੀ ਅਕਾਲੀ ਦਲ ਅੰਮ੍ਰਿਤਸਰ ਦੀ ਯੋਰਪ ਕਮੇਟੀ ਵੱਲੋਂ ਪੰਜਾਬ ਪੁਲਿਸ ਦੀ ਦਲ ਦੇ ਯੂਥ ਵਿੰਗ ਜਰਮਨੀ ਦੇ ਆਗੂਆਂ ਖਿਲਾਫ ਕਾਰਵਾਈ ਨੂੰ ਮੰਦਭਾਗਾ ਦੱਸਿਆ

ਸ਼੍ਰੋਮਣੀ ਅਕਾਲੀ ਦਲ ਅੰਮ੍ਰਿਤਸਰ ਦੇ ਯੋਰਪ ਦੇ ਆਗੂਆਂ, ਯੋਰਪ ਕਮੇਟੀ ਦੇ ਪ੍ਰਧਾਨ ਭਾਈ ਚੈਨ ਸਿੰਘ ਫਰਾਂਸ, ਸੀ. ਮੀਤ ਪ੍ਰਧਾਨ ਬਾਬਾ ਸੋਹਣ ਸਿੰਘ ਕੰਗ ਡੁਇਸਬਰਗ, ਭਾਈ ਜਗਤਾਰ ਸਿੰਘ ਮਾਹਲ ਜਰਮਨੀ, ਭਾਈ ਲਾਲ ਸਿੰਘ ਸੁਰਤਾਪੁਰ ਇਟਲੀ, ਭਾਈ ਸਰਬਜੀਤ ਸਿੰਘ ਬਰਨਾਲਾ ਬੈਲਜੀਅਮ, ਮਾਸਟਰ ਅਵਤਾਰ ਸਿੰਘ ਯੂ.ਕੇ, ਭਾਈ ਗੁਰਤਾਜ ਸਿੰਘ ਗਰੀਸਲੈਂਡ, ਭਾਈ ਸੁਖਜੀਵਨ ਸਿੰਘ ਫਿਨਲੈਂਡ, ਭਾਈ ਗੁਰਕਿਰਪਾਲ ਸਿੰਘ ਸਵੀਡਨ, ਭਾਈ ਬਲਵਿੰਦਰ ਸਿੰਘ ਪੁਰਤਗਾਲ, ਭਾਈ ਪਿਸ਼ੌਰਾ ਸਿੰਘ ਸਪੇਨ ਨੇ ਜਾਰੀ ਕੀਤੇ ਇਕ ਸਾਂਝੇ ਪ੍ਰੈਸ ਨੋਟ ਵਿੱਚ ਭਾਰਤ ਸਰਕਾਰ ਦੀ ਸ਼ਹਿ ਹੇਠ ਆਪਣੀਆ ਕੂੜ ਕਾਰਵਾਈਆਂ ਨੂੰ ਅੰਜਾਮ ਦੇ ਰਹੀ ਪੰਜਾਬ ਪੁਲਿਸ ਦੀ ਤਿੱਖੇ ਸ਼ਬਦਾਂ ਚ ਅਲੋਚਨਾ ਕਰਦਿਆਂ ਕਿਹਾ ਕਿ ਮੌਜੂਦਾ ਸਰਕਾਰ ਦਲ ਦੇ ਆਗੂਆਂ ਅਤੇ ਉਹਨਾਂ ਦੇ ਪਰਿਵਾਰਾਂ ਨੂੰ ਬਿਲਾ ਵਜਾ ਤੰਗ ਪਰੇਸ਼ਾਂਨ ਕਰ ਰਹੀ ਹੈ।ਪਿਛਲੇ ਦਿਨੀ ਪਾਰਟੀ ਦੇ ਜਰਮਨੀ ਯੂਥ ਵਿੰਗ ਦੇ ਪ੍ਰਧਾਨ ਭਾਈ ਭੁਪਿੰਦਰ ਸਿੰਘ ਦੇ ਭਰਾ ਨੂੰ ਪੰਜਾਬ ਪੁਲਿਸ ਵਲੋਂ ਅਗਵਾ ਕਰ ਅੰਨਾ ਤਸ਼ੱਦਦ ਕੀਤਾ ਗਿਆ ਅਤੇ ਝੂਠੇ ਕੇਸ ਪਾ ਜੇਲਬੰਦ ਕਰਨ ਦੀ ਪੁਲਿਸ ਦੀ ਕਾਰਵਾਈ ਨੂੰ ਮੰਦਭਾਗੀ ਦੱਸਿਆ।ਉਹਨਾਂ ਕਿਹਾ ਕਿ ਮੌਜੂਦਾ ਸਰਕਾਰ ਇਹੋ ਜਿਹੀਆਂ ਹਰਕਤਾਂ ਹਰ ਉਸ ਅਵਾਜ ਨੂੰ ਦਬਾਉਣ ਕਾਰਨ ਕਰਦੀ ਹੈ ਜੋ ਖਾਲਿਸਤਾਨ ਦੇ ਹੱਕ ਵਿੱਚ ਉਠਦੀ ਹੈ।ਉਹਨਾਂ ਪੰਜਾਬ ਪੁਲਿਸ ਵਲੋਂ ਯੂਥ ਵਿੰਗ ਜਰਮਨੀ ਦੇ ਜਨਰਲ ਸਕੱਤਰ ਭਾਈ ਸੁਖਪ੍ਰੀਤ ਸਿੰਘ ਉੱਪਰ ਪਾਏ ਜਾ ਰਹੇ ਝੂਠੇ ਪੁਲਿਸ ਕੇਸਾਂ ਦੀ ਵੀ ਨਖੇਦੀ ਕੀਤੀ ਅਤੇ ਭਾਈ ਸੁਖਪ੍ਰੀਤ ਸਿੰਘ ਦੇ ਘਰ ਪੁਲਿਸ ਵਲੋਂ ਕੀਤੀ ਤੋੜ ਫੋੜ ਨੂੰ ਮੰਦਭਾਗਾ ਦੱਸਦਿਆਂ ਇਸ ਮਾਮਲੇ ਵਿੱਚ ਜਿੰਮੇਵਾਰ ਪੁਲਿਸ ਅਧਿਕਾਰੀਆਂ ਵਿਰੁੱਧ ਕਾਰਵਾਈ ਦੀ ਮੰਗ ਦੁਹਰਾਈ।ਉਹਨਾਂ ਯਾਦ ਦਿਵਾਉਂਦਿਆਂ ਕਿਹਾ ਕਿ ਭਾਰਤ ਸਰਕਾਰ ਦੀਆਂ ਇਹਨਾਂ ਵਧੀਕੀਆਂ ਕਾਰਨ ਹੀ ਭਾਈ ਭੁਪਿੰਦਰ ਸਿੰਘ ਅਤੇ ਭਾਈ ਸੁਖਪ੍ਰੀਤ ਸਿੰਘ ਵਰਗੇ ਲੱਖਾਂ ਸਿਂਖ ਨੌਜਵਾਨ ਦੇਸ਼ ਛੱਡਣ ਲਈ ਮਜਬੂਰ ਹੋ ਗਏ ਹਨ ਜੋ ਕਿ ਉਹਨਾਂ ਦੀ ਖੁਸ਼ਕਿਸਮਤੀ ਹੈ ਜਦ ਕਿ ਅਜਿਹੇ ਲੱਖਾਂ ਸਿੱਖ ਨੌਜਵਾਨ ਭਾਰਤ ਦੀਆਂ ਅਨੇਕਾਂ ਜ੍ਹੇਲਾਂ ਵਿੱਚ ਆਪਣੀਆਂ ਜਿੰਦਗੀਆਂ ਗਾਲ ਰਹੇ ਹਨ। ਉਹਨਾਂ ਇਸ ਗੱਲ ਤੇ ਜ਼ੋਰ ਪਾਉਂਦਿਆਂ ਕਿਹਾ ਕਿ ਭਾਈ ਭੁਪਿੰਦਰ ਸਿੰਘ ਅਤੇ ਭਾਈ ਸੁਖਪ੍ਰੀਤ ਸਿੰਘ ਜਮਹੂਰੀਅਤ ਪਸੰਦ ਤਰੀਕੇ ਨਾਲ ਸਿੱਖਾਂ ਦੇ ਅਜਾਦ ਘਰ ਖਾਲਿਸਤਾਨ ਦੀ ਪ੍ਰਾਪਤੀ ਲਈ ਅਵਾਜ ਉਠਾਉਂਦੇ ਹੋਏ ਅਮਨ ਪਸੰਦ ਢੰਗ ਨਾਲ ਸ਼੍ਰੋਮਣੀ ਅਕਾਲੀ ਦਲ ਅੰਮ੍ਰਿਤਸਰ ਯੂਥ ਵਿੰਗ ਦੀ ਅਗਵਾਈ ਕਰ ਰਹੇ ਹਨ।

ਭਾਈ ਬਿੱਟੂ ਤੇ ਪ੍ਰੋ. ਗੁਰਬੀਰ ਸਿੰਘ ਸਮੇਤ 6 ਨੂੰ 4 ਤੱਕ ਮੁੜ ਜੇਲ ਭੇਜਿਆ

ਮਾਨਸਾ, 21 ਅਕਤੂਬਰ (ਵਿਸ਼ਵਜੀਤ ਸਿੰਘ ਖੰਡਾ): ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਪੰਚ ਪ੍ਰਧਾਨੀ ਦੇ ਚੇਅਰਮੈਨ ਭਾਈ ਦਲਜੀਤ ਸਿੰਘ ਬਿੱਟੂ ਅਤੇ ਕੌਮੀ ਜਨਰਲ ਸਕੱਤਰ ਪ੍ਰੋ. ਗੁਰਵੀਰ ਸਿੰਘ ਸਮੇਤ 6 ਵਿਅਕਤੀਆਂ ਨੂੰ ਸਥਾਨਕ ਅਦਾਲਤ ਨੇ ਸੌਦਾ ਸਾਧ ਦੇ ਪੈਰੌਕਾਰ ਅਤੇ ਨਹਿਰੀ ਪਟਵਾਰੀ ਲਿੱਲੀ ਸ਼ਰਮਾਂ ਦੇ ਕਤਲ ਦੇ ਸਬੰਧ ਵਿੱਚ ਮੁੜ 4 ਨਵੰਬਰ ਤੱਕ ਜੇਲ ਭੇਜ ਦਿੱਤਾ ਹੈ। ਅੱਜ ਬਾਅਦ ਦੁਪਿਹਰ ਸਥਾਨਕ ਸਦਰ ਥਾਣਾ ਮਾਨਸਾ ਦੀ ਪੁਲਿਸ ਨੇ ਭਾਈ ਦਲਜੀਤ ਸਿੰਘ ਬਿੱਟੂ ਨੂੰ ਸੌਦਾ ਸਾਧ ਦੇ ਪੈਰੋਕਾਰ ਦੀ ਹੱਤਿਆ ਸਬੰਧੀ ਸਿਵਲ ਜੱਜ ਸੀਨੀਅਰ ਡਵੀਜ਼ਨ ਸ੍ਰੀ ਕੇ. ਵੀ. ਰਹੇਜਾ ਦੀ ਅਦਾਲਤ ਵਿੱਚ ਪੇਸ਼ ਕੀਤਾ ਗਿਆ ਜਿਥੋਂ ਮੁੜ ਉਨਖ਼ਾਂ ਨੂੰ 4 ਨਵੰਬਰ ਤੱਕ ਕੇਂਦਰੀ ਜੇਲਖ਼ ਅੰਮ੍ਰਿਤਸਰ ਭੇਜ ਦਿੱਤਾ ਗਿਆ। ਇਸ ਤੋਂ ਪਹਿਲਾਂ ਵੀ ਅੱਜ ਸਵੇਰੇ ਇਸੇ ਅਦਾਲਤ ਵਿਚ ਪ੍ਰੋ. ਗੁਰਵੀਰ ਸਿੰਘ, ਮੱਖਣ ਸਿੰਘ ਸਰਦੂਲਗੜਖ਼, ਅੰਮ੍ਰਿਤਪਾਲ ਸਿੰਘ ਕੋਟਧਰਮੂ, ਕਰਨ ਸਿੰਘ ਝੰਡੂਕੇ, ਗੁਰਦੀਪ ਸਿੰਘ ਨੂੰ ਮਾਣਯੋਗ ਅਦਾਲਤ ਵਿੱਚ ਪੇਸ਼ ਕੀਤਾ ਗਿਆ, ਜਿਨਖ਼ਾਂ ਨੂੰ ਮੁੜ 4 ਨਵੰਬਰ ਤੱਕ ਬਠਿੰਡਾ ਜ਼ੇਲਖ਼ ਭੇਜ ਦਿੱਤਾ ਗਿਆ ਹੈ। ਇਸ ਮੌਕੇ ਮੀਡੀਆ ਨਾਲ ਗੱਲਬਾਤ ਕਰਦਿਆਂ ਭਾਈ ਬਿੱਟੂ ਨੇ ਦੋਸ਼ ਲਗਾਇਆ ਕਿ ਪੰਥਕ ਕਹਾਉਣ ਵਾਲੀ ਪੰਜਾਬ ਦੀ ਅਕਾਲੀ ਸਰਕਾਰ ਆਉਂਦੀਆਂ ਸ਼੍ਰੋਮਣੀ ਕਮੇਟੀ ਚੋਣਾਂ ਦੇ ਮੱਦੇਨਜ਼ਰ ਸਿੱਖ ਨੌਜਵਾਨਾਂ ‘ਤੇ ਤਸੱਦਦ ਢਾਹੁਣ ਲੱਗੀ ਹੈ। ਭਾਈ ਬਿੱਟੂ ਨੇ ਕਿਹਾ ਕਿ ਪੰਥਕ ਕਹਾਉਣ ਵਾਲੀ ਇਸ ਬਾਦਲ ਸਰਕਾਰ ਦਾ ਅਖੌਤੀ ਪੰਥਕ ਨਕਾਬ ਬਿਲਕੁੱਲ ਹੀ ਉੱਤਰ ਚੁੱਕਾ ਹੈ ਜਿਸ ਕਾਰਨ ਇਸਦਾ ਪੰਥ ਵਿਰੋਧੀ ਕਰੂਪ ਚਿਹਰਾ ਸ਼ਪੱਸ਼ਟ ਸਾਹਮਣੇ ਆ ਗਿਆ ਹੈ। ਭਾਈ ਬਿੱਟੂ ਨੇ ਪੰਚ ਪ੍ਰਧਾਨੀ ਦੁਆਰਾ ਸ਼੍ਰੋਮਣੀ ਕਮੇਟੀ ਚੋਣਾਂ ਲੜਨ ਲਈ ਪੰਥਕ ਧਿਰਾਂ ਨੂੰ ਇੱਕ ਪਲੇਟਫਾਰਮ ‘ਤੇ ਇਕੱਠੇ ਕਰਨ ਦੇ ਯਤਨ ਕਰਨ ਦੀ ਗੱਲ ਵੀ ਕਹੀ। ਇਸ ਸਮੇਂ ਭਾਈ ਬਿੱਟੂ ਅਤੇ ਹੋਰ ਸਿੱਖ ਨੌਜਵਾਨਾਂ ਦੇ ਵਕੀਲ ਸ. ਅਜੀਤ ਸਿੰਘ ਭੰਗੂ ਨੇ ਪੰਜਾਬ ਪੁਲਿਸ ਤੇ ਸਿੱਖ ਨੌਜਵਾਨੀ ਨੂੰ ਅਜੇ ਵੀ ਬੇਵਜਖ਼ਾ ਪ੍ਰੇਸ਼ਾਨ ਕਰਨ ਦਾ ਦੋਸ਼ ਵੀ ਲਾਇਆ। ਇਸ ਸਮੇਂ ਹੋਰਨਾਂ ਤੋਂ ਇਲਾਵਾ ਭਾਈ ਬਲਜਿੰਦਰ ਸਿੰਘ ਖਾਲਸਾ ਪ੍ਰਧਾਨ ਏਕ ਨੂਰ ਖਾਲਸਾ ਫੌਜ, ਮਹਿੰਦਰ ਸਿੰਘ ਜਟਾਣਾ, ਗੁਰਤੇਜ ਸਿੰਘ ਜਟਾਣਾ, ਤੇਜ ਸਿੰਘ, ਬੂਟਾ ਸਿੰਘ ਆਦਿ ਹਾਜ਼ਰ ਸਨ।

ਨਾਨਕਸ਼ਾਹੀ ਕੈਲੰਡਰ ਸਬੰਧੀ ਸਿੱਖ ਜਥੇਬੰਦੀਆਂ ਹੋਈਆਂ ਲਾਮਬੰਦ

ਲੰਡਨ, 21 ਅਕਤੂਬਰ (ਮਨਪ੍ਰੀਤ ਸਿੰਘ ਬੱਧਨੀ ਕਲਾਂ)-ਨਾਨਕਸ਼ਾਹੀ ਕੈਲੰਡਰ ਬਾਰੇ ਨਵੇਂ ਵਿਵਾਦ ਵਿਰੁੱਧ ਸਿੱਖ ਜਥੇਬੰਦੀਆਂ ਵੱਲੋਂ ਭੇਜੇ ਵੱਖ- ਵੱਖ ਬਿਆਨਾਂ ਵਿਚ ਕਿਹਾ ਗਿਆ ਹੈ ਕਿ ਸਿੱਖਾਂ ਦਾ ਆਪਣਾ ਕੈਲੰਡਰ ਬੜੇ ਲੰਮੇਂ ਸਮੇਂ ਬਾਅਦ ਜਾਰੀ ਕੀਤਾ ਗਿਆ ਸੀ ਜਿਸ ਨੂੰ ਲਾਗੂ ਵੀ ਕੀਤਾ ਗਿਆ ਅਤੇ ਹੁਣ ਜਦ ਇਹ ਪ੍ਰਚੱਲਿਤ ਹੋ ਗਿਆ ਹੈ ਤਾਂ ਫਿਰ ਕੁਝ ਲੋਕਾਂ ਦੇ ਪ੍ਰਭਾਵ ਹੇਠ ਜਥੇਦਾਰ ਸਾਹਿਬ ਕਿਉਂ ਕੌਮ ਨੂੰ ਮੁੜ ਦੁਬਿਧਾ ਵਿਚ ਫਸਾ ਰਹੇ ਹਨ, ਜਥੇਦਾਰ ਅਵਤਾਰ ਸਿੰਘ ਸੰਘੇੜਾ, ਭਾਈ ਬਲਬੀਰ ਸਿੰਘ ਅਤੇ ਭਾਈ ਜੋਗਾ ਸਿੰਘ ਨੇ ਕਿਹਾ ਕਿ ਇਹ ਸਿੱਖ ਕੌਮ ਦਾ ਮਸਲਾ ਹੈ। ਇਸ ਨੂੰ ਕੋਈ ਜਥੇਦਾਰ ਇਕੱਲਾ ਰੱਦ ਨਹੀਂ ਕਰ ਸਕਦਾ। ਅਖੰਡ ਕੀਰਤਨੀ ਜਥੇ ਵੱਲੋਂ ਭਾਈ ਰਘਬੀਰ ਸਿੰਘ ਨੇ ਵੀ ਕੈਲੰਡਰ ਸਬੰਧੀ ਕੀਤੀ ਮੀਟਿੰਗ ਦਾ ਵਿਰੋਧ ਕੀਤਾ ਹੈ। ਸਿੱਖ ਸੇਵਕ ਸੁਸਾਇਟੀ ਇੰਟਰਨੈਸ਼ਨਲ ਵੱਲੋਂ ਭਾਈ ਮਲਕੀਤ ਸਿੰਘ ਨੇ ਕਿਹਾ ਕਿ ਕੈਲੰਡਰ ਵਿਚ ਸੋਧ ਕਰਨੀ ਕੌਮ ਵਿਚ ਬੇਚੈਨੀ ਪੈਦਾ ਕਰੇਗੀ। ਭਾਈ ਲਵਸ਼ਿੰਦਰ ਸਿੰਘ ਡੱਲੇਵਾਲ, ਭਾਈ ਨਿਰਮਲ ਸਿੰਘ ਯੁੂਨਾਈਟਿਡ ਖਾਲਸਾ ਦਲ ਯੂ. ਕੇ. ਨੇ ਕਿਹਾ ਹੈ ਕਿ ਕੈਲੰਡਰ ਸਬੰਧੀ ਨਵਾਂ ਵਿਵਾਦ ਮੰਦਭਾਗਾ ਹੈ।

ਰੇਲ ਹਾਦਸੇ ’ਚ 25 ਮੌਤਾਂ, 60 ਫੱਟੜ

ਮਥੁਰਾ - ਇਸ ਸ਼ਹਿਰ ਦੇ ਬਾਹਰਵਾਰ ਅੱਜ ਤੜਕੇ 5 ਵਜੇ ਤੋਂ ਸਾਢੇ 5 ਵਜੇ ਦੇ ਵਿਚਕਾਰ ਦਿੱਲੀ-ਆਗਰਾ ਟਰੈਕ ਉਤੇ ਬਜਨਾ ਪੁਲ਼ ਨੇੜੇ ਦੋ ਰੇਲਾਂ ਗੋਆ ਸੰਪਰਕ-ਕ੍ਰਾਂਤੀ ਐਕਸਪ੍ਰੈਸ ਅਤੇ ਮੇਵਾੜ ਐਕਸਪ੍ਰੈਸ ਦੀ ਆਪਸੀ ਟੱਕਰ ਵਿੱਚ 25 ਵਿਅਕਤੀਆਂ ਦੇ ਮਾਰੇ ਜਾਣ ਅਤੇ 60 ਕੁ ਦੇ ਕਰੀਬ ਹੋਰਨਾਂ ਦੇ ਜ਼ਖ਼ਮੀ ਹੋਣ ਦੀ ਖ਼ਬਰ ਮਿਲ਼ੀ ਹੈ। ਰੇਲ ਅਧਿਕਾਰੀਆਂ ਨੇ ਮੌਤਾਂ ਦੀ ਗਿਣਤੀ ਵਧਣ ਦੇ ਖ਼ਦਸ਼ੇ ਤੋਂ ਇਨਕਾਰ ਨਹੀਂ ਕੀਤਾ। ਰਾਹਤ ਕਾਰਜਾਂ ਵਿੱਚ ਫ਼ੌਜ ਦੀ ਮਦਦ ਵੀ ਲਈ ਜਾ ਰਹੀ ਹੈ। ਆਖ਼ਰੀ ਖ਼ਬਰਾਂ ਮਿਲਣ ਵੇਲੇ ਤੱਕ ਵੀ ਕੁੱਝ ਮਹਿਲਾਵਾਂ ਅਤੇ ਬੱਚੇ ਬੁਰੀ ਤਰ੍ਹਾਂ ਨਸ਼ਟ ਹੋ ਚੁੱਕੇ ਡੱਬਿਆਂ ਵਿੱਚ ਫਸੇ ਹੋਏ ਸਨ। ਇਸ ਹਾਦਸੇ ਕਾਰਣ ਅਨੇਕਾਂ ਹੋਰ ਰੇਲਾਂ ਜਾਂ ਤਾਂ ਰੱਦ ਕਰ ਦਿੱਤੀਆਂ ਗਈਆਂ ਹਨ ਅਤੇ ਜਾਂ ਉਨ੍ਹਾਂ ਨੂੰ ਰੂਟ ਬਦਲ ਕੇ ਚਲਾਇਆ ਜਾ ਰਿਹਾ ਹੈ। ਜਿਸ ਥਾਂ ਇਹ ਹਾਦਸਾ ਹੋਇਆ, ਉਹ ਨਵੀਂ ਦਿੱਲੀ ਤੋਂ 150 ਕਿਲੋਮੀਟਰ ਦੀ ਦੂਰੀ ਉਤੇ ਸਥਿਤ ਹੈ। ਰੇਲ ਮੰਤਰਾਲੇ ਨੇ ਇਸ ਹਾਦਸੇ ਦੀ ਜਾਂਚ ਦੇ ਆਦੇਸ਼ ਦੇ ਦਿੱਤੇ ਹਨ। ਰੇਲ ਮੰਤਰੀ ਕੁਮਾਰੀ ਮਮਤਾ ਬੈਨਰਜੀ ਨੇ ਮਾਰੇ ਗਏ ਹਰੇਕ ਮੁਸਾਫ਼ਰ ਦੇ ਪਰਿਵਾਰ ਨੂੰ 5-5 ਲੱਖ ਰੁਪਏ ਦੇਣ ਦਾ ਐਲਾਨ ਕੀਤਾ ਹੈ। ਗੰਭੀਰ ਰੂਪ ਵਿੱਚ ਜ਼ਖ਼ਮੀਆਂ ਨੂੰ 1-1 ਲੱਖ ਰੁਪਏ ਦਾ ਮੁਆਵਜ਼ਾ ਮਿਲ਼ੇਗਾ ਜਦ ਕਿ ਮਾਮੂਲੀ ਜ਼ਖ਼ਮੀਆਂ ਨੂੰ 10-10 ਹਜ਼ਾਰ ਰੁਪਏ ਮਿਲਣਗੇ। ਉਧਰ ਉਤਰ ਪ੍ਰਦੇਸ਼ ਦੇ ਖੇਤੀਬਾੜੀ ਮੰਤਰੀ ਸ੍ਰੀ ਲਕਸ਼ਮੀਨਾਰਾਇਣ ਚੌਧਰੀ ਨੇ ਮ੍ਰਿਤਕਾਂ ਦੇ ਪਰਿਵਾਰਾਂ ਨੂੰ 10-10 ਲੱਖ ਰੁਪਏ ਮੁਆਵਜ਼ਾ ਅਤੇ ਪੀੜਤ ਪਰਿਵਾਰ ਦੇ ਇੱਕ ਵਿਅਕਤੀ ਨੂੰ ਨੌਕਰੀ ਦੇਣ ਦਾ ਐਲਾਨ ਕੀਤਾ ਹੈ। ‘ਹਮਦਰਦ’ ਨੂੰ ਪ੍ਰਾਪਤ ਜਾਣਕਾਰੀ ਮੁਤਾਬਕ ਜੇ ਚਸ਼ਮਦੀਦ ਗਵਾਹਾਂ ਦੀ ਮੰਨੀਏ ਤਾਂ ਗੋਆ ਐਕਸਪ੍ਰੈਸ ਦੇ ਡਰਾਇਵਰ ਨੇ ਸਿਗਨਲ ਤੋੜਿਆ। ਦਿੱਲੀ ਜਾ ਰਹੀ ਗੋਆ ਐਕਸਪ੍ਰੈਸ ਨੇ ਖੜ੍ਹੀ ਮੇਵਾੜ ਐਕਸਪ੍ਰੈਸ ਨੂੰ ਪਿਛਿਓਂ ਟੱਕਰ ਮਾਰੀ। ਜ਼ੋਰਦਾਰ ਟੱਕਰ ਕਾਰਣ ਦੋਵੇਂ ਰੇਲਾਂ ਦੇ ਕੁੱਝ ਡੱਬੇ ਲੀਹੋਂ ਲੱਥ ਕੇ ਕਈ ਪਲਟੀਆਂ ਖਾ ਗਏ। ਇਹ ਵੀ ਪਤਾ ਲੱਗਾ ਹੈ ਕਿ ਪੂਰੇ ਰਾਜਸਥਾਨ ਨੂੰ ਦੇਸ਼ ਦੀ ਰਾਜਧਾਨੀ ਨਵੀਂ ਦਿੱਲੀ ਨਾਲ਼ ਜੋੜਨ ਵਾਲ਼ੀ ਤੇ ਉਸ ਵੇਲੇ ਉਦੇਪੁਰ ਤੋਂ ਦਿੱਲੀ ਜਾ ਰਹੀ ਮੇਵਾੜ ਐਕਸਪ੍ਰੈਸ ਦੇ ਕਿਸੇ ਮੁਸਾਫ਼ਰ ਵੱਲੋਂ ਐਮਰਜੈਂਸੀ ਚੇਨ ਖਿੱਚੇ ਜਾਣ ਕਾਰਣ ਉਹ ਰੇਲ ਮਥੁਰਾ ਸਟੇਸ਼ਨ ਲਾਗੇ ਰਾਹ ਵਿੱਚ ਹੀ ਕਿਤੇ ਰੁਕੀ ਹੋਈ ਸੀ ਅਤੇ ਵਾਸਕੋ ਤੋਂ ਦਿੱਲੀ ਜਾ ਰਹੀ ਗੋਆ ਐਕਸਪ੍ਰੈਸ ਦੇ ਡਰਾਇਵਰ ਨੇ ਸਿਗਨਲ ਦੀ ਅਣਦੇਖੀ ਕਰਦਿਆਂ ਆਪਣੀ ਰੇਲ ਨੂੰ ਮੇਵਾੜ ਐਕਸਪ੍ਰੈਸ ਦੇ ਪਿਛਿਓਂ ਦੀ ਟੱਕਰ ਮਾਰੀ। ਦੋਵੇਂ ਰੇਲਾਂ ਮਥੁਰਾ ਰੇਲਵੇ ਸਟੇਸ਼ਨ ਉਤੇ ਰੁਕਦੀਆਂ ਹਨ। ਰਾਹਤ ਕਰਮਚਾਰੀਆਂ ਨੇ ਮਕੈਨੀਕਲ, ਗੈਸ ਤੇ ਬਿਜਲਈ ਕਟਰਜ਼ ਦੀ ਮਦਦ ਨਾਲ਼ ਡੱਬੇ ਕੱਟ-ਕੱਟ ਕੇ ਤੇ ਤੋੜ-ਤੋੜ ਕੇ ਅਨੇਕਾਂ ਮੁਸਾਫ਼ਰਾਂ ਦੀ ਮੌਕੇ ਉਤੇ ਜਾਨ ਬਚਾਈ। ਡਿਵੀਜ਼ਨਲ ਰੇਲਵੇ ਮੈਨੇਜਰ ਸ੍ਰੀ ਰਾਜਿੰਦਰ ਦੱਤ ਤ੍ਰਿਪਾਠੀ ਨੇ ਦੱਸਿਆ ਕਿ ਜ਼ਖ਼ਮੀਆਂ ਨੂੰ ਮਥੁਰਾ ਤੇ ਆਗਰਾ ਦੇ ਹਸਪਤਾਲਾਂ ਵਿੱਚ ਭਰਤੀ ਕਰਵਾਇਆ ਗਿਆ ਹੈ ਜਦ ਕਿ ਗੰਭੀਰ ਰੂਪ ਵਿੱਚ ਫੱਟੜ ਹੋਏ ਕੁੱਝ ਵਿਅਕਤੀਆਂ ਨੂੰ ਨਵੀਂ ਦਿੱਲੀ ਵੀ ਭੇਜਿਆ ਗਿਆ ਹੈ। ਰਾਹਤ ਸਮੱਗਰੀ ਮੁੱਖ ਤੌਰ ਉਤੇ ਪਲਵਲ ਅਤੇ ਆਗਰਾ ਰੇਲਵੇ ਸਟੇਸ਼ਨਾਂ ਰਾਹੀਂ ਭੇਜੀ ਜਾ ਰਹੀ ਹੈ। ਆਲ਼ੇ ਦੁਆਲ਼ੇ ਦੇ ਪਿੰਡਾਂ ਦੇ ਵਾਸੀ ਤੁਰੰਤ ਘਟਨਾ ਸਥਾਨ ’ਤੇ ਪੁੱਜੇ ਅਤੇ ਰਾਹਤ ਕਾਰਜਾਂ ਵਿੱਚ ਪ੍ਰਸ਼ਾਸਨ ਦੀ ਖ਼ੂਬ ਮਦਦ ਕੀਤੀ। ਦੀਵਾਲ਼ੀ ਦੀਆਂ ਛੁੱਟੀਆਂ ਖ਼ਤਮ ਹੋਣ ਕਾਰਣ ਲੋਕ ਆਪਣੇ ਕੰਮ ਧੰਦਿਆਂ ਉਤੇ ਪਰਤ ਰਹੇ ਸਨ, ਇਸੇ ਕਾਰਣ ਦੋਵੇਂ ਰੇਲਾਂ ਵਿੱਚ ਖ਼ੂਬ ਭੀੜ ਸੀ। ਦਿੱਲੀ ਤੋਂ ਮੁੰਬਈ ਅਤੇ ਚੇਨਈ ਜਾਣ ਵਾਲ਼ੀ ਰੇਲ ਗੱਡੀਆਂ ਦੇ ਰੂਟ ਬਦਲ ਦਿੱਤੇ ਗਏ ਹਨ। ਉਨ੍ਹਾਂ ਨੂੰ ਟੁੰਡਲਾ ਰੇਲਵੇ ਸਟੇਸ਼ਨ ਅਤੇ ਆਗਰਾ ਫ਼ੋਰਟ-ਬਯਾਨਾ ਰੇਲ ਪਟੜੀਆਂ ਤੋਂ ਦੀ ¦ਘਾਇਆ ਜਾ ਰਿਹਾ ਹੈ। 2909 ਬਾਂਦਰਾ-ਨਿਜ਼ਾਮੁੱਦੀਨ ਐਕਸਪ੍ਰੈਸ ਅਤੇ 2192 ਜੱਬਲਪੁਰ-ਐਕਸਪ੍ਰੈਸ ਸਮੇਤ 6 ਰੇਲਾਂ ਦੇ ਰੂਟ ਬਦਲੇ ਗਏ ਹਨ ਜਦ ਕਿ 5 ਰੇਲ ਗੱਡੀਆਂ ਰੱਦ ਕਰ ਦਿੱਤੀਆਂ ਗਈਆਂ ਹਨ। ਇਸ ਹਾਦਸੇ ਬਾਰੇ ਵਧੇਰੇ ਜਾਣਕਾਰੀ ਲਈ ਨਵੀਂ ਦਿੱਲੀ ਸਥਿਤ ਹੈਲਪਲਾਈਨ ਨੰਬਰਾਂ 011-24359748, 011-24355964 ਅਤੇ ਮਥੁਰਾ ਸਥਿਤ ਹੈਲਪਲਾਈਨ ਨੰਬਰਾਂ 0565-2402008, 0565-2402009 ਉਤੇ ਸੰਪਰਕ ਕੀਤਾ ਜਾ ਸਕਦਾ ਹੈ।