ਸ਼੍ਰੋਮਣੀ ਕਮੇਟੀ ਅਤੇ ਸੰਤ ਯੂਨੀਅਨ ਨੇ ਪੰਜਾਬ ਅਤੇ ਸਿੱਖਾਂ ਦਾ ਘਾਣ ਕੀਤਾ : ਮਾਨ

ਅਨੰਦਪੁਰ ਸਾਹਿਬ, 28 ਫਰਵਰੀ - ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਨੇ ਤਫ਼ਤ ਸ੍ਰੀ ਕੇਸਗੜ੍ਹ ਸਾਹਿਬ ਦੇ ਸਾਹਮਣੇ ਵਾਲੇ ਮੈਦਾਨ ਵਿਚ ਕਾਨਫਰੰਸ ਕੀਤੀ। ਸ਼ਾਂਤਮਈ ਢੰਗ ਨਾਲ ਫ਼ਾਲਿਸਤਾਨ ਦੀ ਪ੍ਰਾਪਤੀ ਕਰਨ ਦਾ ਐਲਾਨ ਕਰਨ ਵਾਲੇ ਸ. ਸਿਮਰਨਜੀਤ ਸਿੰਘ ਮਾਨ ਨੇ ਮਿਆਦ ਪੁੱਗਾ ਚੁੱਕੀ ਸ਼੍ਰੋਮਣੀ ਕਮੇਟੀ ਅਤੇ ਸੰਤ ਯੂਨੀਅਨ ਨੂੰ ਸ਼ਬਦੀ ਬਾਣ ਮਾਰਦਿਆਂ ਕਿਹਾ ਕਿ ਵਿਧਾਨਕ ਤੌਰ ’ਤੇ ਮਿਆਦ ਪੁਗਾ ਚੁੱਕੀ ਸ਼੍ਰੋਮਣੀ ਕਮੇਟੀ ਅਤੇ ਬਾਦਲ ਦਲੀਆਂ ਨਾਲ ਸੌਦੇਬਾਜ਼ੀਆਂ ਕਰਨ ਵਾਲੀ ਸੰਤ ਯੂਨੀਅਨ ਨੇ ਸਿੱਖੀ ਸਿਧਾਂਤਾਂ ਨੂੰ ਪਿੱਠ ਦੇ ਕੇ ਜੋ ਆਪ-ਹੁਦਰੇ ਫੈਸਲੇ ਕੀਤੇ ਹਨ, ਉਨ੍ਹਾਂ ਨੂੰ ਉਹ ਪੂਰਨ ਤੌਰ ਤੇ ਰੱਦ ਕਰਦੇ ਹਨ। ਉਨ੍ਹਾਂ ਕਿਹਾ, ‘‘ਸਿੱਖ ਕੌਮ ਦੀ ਵਿਲੱਖਣ ਪਛਾਣ ਰੱਖਣ ਵਾਲੇ ਨਾਨਕਸ਼ਾਹੀ ਕੈਲੰਡਰ ਵਿਚ ਜੋ ਤਬਦੀਲੀਆਂ ਕੀਤੀਆਂ ਗਈਆਂ ਹਨ, ਅਸੀਂ ਉਨ੍ਹਾਂ ਨੂੰ ਪੂਰਨ ਤੌਰ ’ਤੇ ਰੱਦ ਕਰਦੇ ਹਾਂ ਤੇ ਦੇਸ਼-ਵਿਦੇਸ਼ ਦੀ ਸੰਗਤ ਨੂੰ ਅਪੀਲ ਕਰਦੇ ਹਾਂ ਕਿ ਸੰਤ ਯੂਨੀਅਨ ਤੇ ਦਮਦਮੀ ਟਕਸਾਲ ਦੀ ਬ੍ਰਾਹਮਣਵਾਦੀ ਸੋਚ ਤੋਂ ਉਪਰ ਉਠ ਕੇ ਸਾਰੇ ਦਿਨ-ਤਿਉਹਾਰ ਨਾਨਕਸ਼ਾਹੀ ਕੈਲੰਡਰ ਮੁਤਾਬਕ ਹੀ ਮਨਾਏ ਜਾਣ।’’ ਸ. ਮਾਨ ਨੇ ਐਲਾਨ ਕੀਤਾ ਕਿ ਆਉਣ ਵਾਲੀਆਂ ਸ਼੍ਰੋਮਣੀ ਕਮੇਟੀ ਚੋਣਾਂ ਫ਼ਾਲਿਸਤਾਨ ਦੇ ਮੁੱਦੇ ’ਤੇ ਲੜੀਆਂ ਜਾਣਗੀਆਂ। ਉਨ੍ਹਾਂ ਤਾਲਿਬਾਨ ਵਲੋਂ ਸਿੱਖਾਂ ਦੇ ਸਿਰ ਕਲਮ ਕਰਨ ਨੂੰ ਵਹਿਸ਼ੀਆਨਾ ਤੇ ਦਰਿੰਦਗੀ ਭਰੀ ਕਾਰਵਾਈ ਕਰਾਰ ਦਿਤਾ। ਉਨ੍ਹਾਂ ਪੰਜਾਬ ਵਾਟਰ ਟਰਮੀਨੇਸ਼ਨ ਐਕਟ-2004 ਦੀ ਧਾਰਾ-5 ਨੂੰ ਤੁਰਤ ਰੱਦ ਕਰਨ ਦੀ ਮੰਗ ਕੀਤੀ ਤੇ ਧਰਮੀ ਫੌਜੀਆਂ, ਸਿੱਖ ਕਤਲੇਆਮ ਦੇ ਪੀੜਤ ਪਰਵਾਰਾਂ ਅਤੇ ਬੇਸਹਾਰਾ ਬਜ਼ੁਰਗਾਂ ਦੇ ਮੁੜ-ਵਸੇਬੇ ਦਾ ਪ੍ਰਬੰਧ ਕਰਨ ਦੀ ਮੰਗ ਕੀਤੀ। ਇਸ ਮੌਕੇ ਹੋਰਨਾਂ ਤੋਂ ਇਲਾਵਾ ਇਮਾਨ ਸਿੰਘ ਮਾਨ, ਗੁਰਸੇਵਕ ਸਿੰਘ, ਭਾਗ ਸਿੰਘ ਸੁਰਤਾਪੁਰ, ਨਿਰਮਲ ਸਿੰਘ, ਅਨੂਪ ਸਿੰਘ ਸੰਧੂ, ਕੁਲਦੀਪ ਸਿੰਘ ਭਾਗੋਵਾਲ, ਰਣਜੀਤ ਸਿੰਘ, ਫੌਜਾ ਸਿੰਘ ਅਤੇ ਵਰਿੰਦਰ ਸਿੰਘ ਆਦਿ ਹਾਜ਼ਰ ਸਨ।

ਬਾਦਲ ਸਰਕਾਰ ਨੇ ਪੰਜਾਬ ਸਿਰ 70 ਹਜ਼ਾਰ ਕਰੋੜ ਦਾ ਕਰਜ਼ਾ ਚਾੜ੍ਹਿਆ

ਆਨੰਦਪੁਰ ਸਾਹਿਬ, 28 ਫਰਵਰੀ - ਪੰਜਾਬ ਦੇ ਪਾਣੀਆਂ ਦੀ ਰਾਖੀ ਅਤੇ ਸੂਬੇ ਦਾ ਵਿਕਾਸ ਕਾਂਗਰਸ ਪਾਰਟੀ ਦੀ ਸਰਕਾਰ ਵੇਲੇ ਹੋਇਆ ਕਾਂਗਰਸ ਸਰਕਾਰ 1200 ਕਰੋੜ ਰੁਪਏ ਅਕਾਲੀ ਸਰਕਾਰ ਨੂੰ ਸਰਪਲਸ ਧਨ ਦੇ ਕੇ ਗਈ ਸੀ। ਅੱਜ ਪੰਜਾਬ ਦੇ ਸਿਰ 70 ਹਜ਼ਾਰ ਕਰੋੜ ਰੁਪਏ ਦਾ ਕਰਜ਼ਾ ਹੈ। ਇਨ੍ਹਾਂ ਵਿਚਾਰਾਂ ਦਾ ਪ੍ਰਗਟਾਵਾ ਆਨੰਦਪੁਰ ਸਾਹਿਬ ਵਿਖੇ ਹੋਲਾ ਮਹੱਲਾ ਮੌਕੇ ਕਾਂਗਰਸ ਪਾਰਟੀ ਦੀ ਸਿਆਸੀ ਕਾਨਫ਼ਰੰਸ ਦੌਰਾਨ ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਮਹਿੰਦਰ ਸਿੰਘ ਕੇ.ਪੀ. ਨੇ ਕਾਂਗਰਸੀ ਆਗੂਆਂ ਤੇ ਵਰਕਰਾਂ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਪੰਜਾਬ ਨੂੰ ਅਤਿਵਾਦ ਤੋਂ ਨਿਜਾਤ ਦਿਵਾਉਣ ਲਈ ਸਵਰਗੀ ਬੇਅੰਤ ਸਿੰਘ ਨੇ ਆਪਣੀ ਕੁਰਬਾਨੀ ਦਿੱਤੀ ਸੀ। ਅਕਾਲੀ ਪਾਰਟੀ ਦੇ ਸ਼ਾਸ਼ਨ ਸਮੇਂ ਸੂਬਾ ਲਗਾਤਾਰ ਨਿਘਾਰ ਵੱਲ ਜਾ ਰਿਹਾ ਹੈ।ਕਿਸਾਨ, ਮੁਲਾਜ਼ਮ ਤੋਂ ਲੈ ਕੇ ਹਰ ਵਰਗ ਇਸ ਸਰਕਾਰ ਤੋਂ ਦੁਖੀ ਹੈ। ਹਲਕਾ ਖਰੜ ਦੇ ਵਿਧਾਇਕ ਸ. ਬਲਬੀਰ ਸਿੰਘ ਸਿੱਧੂ ਨੇ ਕਾਨਫਰੰਸ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਸ. ਪ੍ਰਕਾਸ਼ ਸਿੰਘ ਬਾਦਲ ਨੇ ਸਾਰੇ ਅਹਿਮ ਵਿਭਾਗ ਆਪਣੇ ਰਿਸ਼ਤੇਦਾਰਾਂ ਨੂੰ ਦੇ ਕੇ ਘਰ ਦੀ ਹੀ ਸਰਕਾਰ ਬਣਾਈ ਹੋਈ ਹੈ। ਆਪਣੇ ਫਾਇਦੇ ਲਈ ਜ਼ਮੀਨਾਂ ਦੇ ਰੇਟ ਘਟਾ ਦਿੱਤੇ ਜਾਂਦੇ ਹਨ। ਹਲਕਾ ਆਨੰਦਪੁਰ ਸਾਹਿਬ ਤੋਂ ਸਾਂਸਦ ਰਵਨੀਤ ਸਿੰਘ ਬਿੱਟੂ ਨੇ ਕਿਹਾ ਕਿ ਕਾਂਗਰਸ ਸਰਕਾਰ ਸਸਤੀਆਂ ਦਰਾਂ 'ਤੇ ਕਣਕ ਅਤੇ ਆਟਾ ਪੰਜਾਬ ਨੂੰ ਦੇ ਰਹੀ, ਪਰ ਇਹ ਅੱਗੋਂ ਮਹਿੰਗੇ ਭਾਅ 'ਤੇ ਪੰਜਾਬ ਸਰਕਾਰ ਵੇਚ ਰਹੀ ਹੈ।

ਕੇਂਦਰ ਨੇ ਸਿੱਖ ਕੌਮ ਨੂੰ ਕਦੇ ਇਨਸਾਫ਼ ਨਹੀਂ ਦਿੱਤਾ।

ਆਨੰਦਪੁਰ ਸਾਹਿਬ, 28 ਫਰਵਰੀ -ਹੋਲਾ ਮਹੱਲੇ ਮੌਕੇ ਅੱਜ ਵੱਖ ਵੱਖ ਸਿਆਸੀ ਧਿਰਾਂ ਨੇ ਜਿਥੇ ਪਿਛਲੇ ਸਾਲਾਂ ਵਾਂਗ ਜਿਥੇ ਇਕ ਦੂਜੇ ਨੂੰ ਖੂਬ ਸਿਆਸੀ ਰਗੜੇ ਲਗਾਏ ਉਥੇ ਹੀ ਪੰਜਾਬ ਦੀ ਸੱਤਾਧਾਰੀ ਧਿਰ ਵਲੋਂ ਕਾਨਫ਼ਰੰਸ ਨੂੰ ਸੰਬੋਧਨ ਕਰਦਿਆਂ ਪੰਜਾਬ ਦੇ ਉਪ ਮੁੱਖ ਮੰਤੀਰ ਸੁਖਬੀਰ ਸਿੰਘ ਬਾਦਲ ਨੇ ਕਿਹਾ ਕਿ ਸਿੱਖ ਕੌਮ ਨੂੰ ਕੇਂਦਰ ਨੇ ਕਦੇ ਇਨਸਾਫ਼ ਨਹੀਂ ਦਿੱਤਾ। ਤਕਰੀਬਨ 25 ਸਾਲ ਪਹਿਲਾਂ ਵਾਪਰੇ ਸਿੱਖ ਕਤਲੇਆਮ ਦੇ ਦੋਸ਼ੀ ਅੱਜ ਵੀ ਸ਼ਰੇਆਮ ਘੁੰਮ ਰਹੇ ਹਨ, ਜਿਸ ਲਈ ਸਿਰਫ਼ ਤੇ ਸਿਰਫ਼ ਕੇਂਦਰ 'ਤੇ ਕਾਬਜ਼ ਸਿੱਖ ਵਿਰੋਧੀ ਜਮਾਤ ਕਾਂਗਰਸ ਜ਼ਿੰਮੇਵਾਰ ਹੈ। ਉਨ੍ਹਾਂ ਦੋਸ਼ ਲਗਾਇਆ ਕਿ ਕਾਂਗਰਸੀ ਆਗੂ ਐਚ ਕੇ ਐਲ ਭਗਤ, ਸੱਜਣ ਕੁਮਾਰ ਅਤੇ ਜਗਦੀਸ਼ ਟਾਈਟਲਰ ਆਦਿ ਵਰਗੇ ਆਗੂ ਕੇਂਦਰ ਦੀ ਕ੍ਰਿਪਾ ਨਾਲ ਅੱਜ ਵੀ ਕਾਨੂੰਨ ਦੇ ਸ਼ਿਕੰਜੇ ਤੋਂ ਬਾਹਰ ਹਨ। ਉਨ੍ਹਾਂ ਵਧ ਰਹੀ ਮਹਿੰਗਾਈ ਲਈ ਸਿੱਧੇ ਤੌਰ 'ਤੇ ਕੇਂਦਰ ਸਰਕਾਰ ਨੂੰ ਦੋਸ਼ੀ ਠਹਿਰਾਉਂਦਿਆਂ ਕਿਹਾ ਕਿ ਇਸ ਕਾਰਨ ਗਰੀਬ ਅਤੇ ਸਮਾਜ ਦੇ ਕਮਜ਼ੋਰ ਵਰਗ ਦੋ ਸਮੇਂ ਦੀ ਰੋਟੀ ਤੋਂ ਵੀ ਮੁਥਾਜ ਹੋ ਕੇ ਰਹਿ ਗਿਆ ਹੈ।

ਡੇਰਾ ਸਿਰਸਾ ਵੱਲੋਂ ਕੀਤੇ ਹਿੰਸਕ ਰੋਸ ਪ੍ਰਦਸ਼ਨ ‘ਚ ਬੱਸਾਂ ਭੰਨਣ ਤੇ ਅੱਗਾਂ ਲਗਾਉਣ ‘ਚ 10 ਔਰਤਾਂ ਸਮੇਤ 46 ਵਿਰੁੱਧ ਮਾਮਲਾ ਦਰਜ

ਮੋਗਾ , 28 ਫਰਵਰੀ-ਬੀਤੀ ਸ਼ਾਮ ਡੇਰਾ ਸਿਰਸਾ ਦੇ ਪ੍ਰੇਮੀਆਂ ਵੱਲੋਂ ਕੀਤੇ ਗਏ ਹਿੰਸਕ ਰੋਸ ਪ੍ਰਦਸ਼ਨ ਦੌਰਾਨ ਮੋਗਾ ਦੇ ਬੱਸ ਅੱਡੇ ਅਤੇ ਬਾਹਿਰ ਦਰਜ਼ਨ ਦੇ ਕਰੀਬ ਬੱਸਾਂ ਦੀ ਤੋੜ ਭੰਨ ਅਤੇ ਸਾੜਨ ਕਾਰਨ ਮੋਗਾ ਪੁਲਿਸ ਨੇ 10 ਮਹਿਲਾਵਾਂ ਸਮੇਤ 46 ਦੋਸ਼ੀਆਂ ਦੇ ਖਿਲਾਫ ਧਾਰਾ 307,436, 427, 124-186,343,148,149 ਤੋਂ ਇਲਾਵਾ ਆਰਮਜ਼ ਐਕਟ ਦੇ ਤਹਿਤ ਮਾਮਲਾ ਦਰਜ ਕਰਕੇ ਗ੍ਰਿਫਤਾਰ ਕੀਤਾ ਹੈ। ਥਾਣਾ ਸਿਟੀ ਦੇ ਇੰਚਾਰਜ ਕਿੱਕਰ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਗੁਪਤ ਸਚਨਾ ਮਿਲੀ ਸੀ ਕਿ ਡੇਰਾ ਸਿਰਸਾ ਦੇ ਪ੍ਰੇਮੀਆਂ ਦਾ ਇਕੱਠ ਬੱਸ ਅੱਡੇ 'ਚ ਹੋ ਰਿਹਾ ਹੈ, ਜਿੱਥੇ ਗੜਬੜ ਦੀ ਸੰਭਾਵਨਾ ਹੈ। ਉਹ ਫੌਰਨ ਪੁਲਿਸ ਪਾਰਟੀ ਸਮੇਤ ਘਟਨਾ ਵਾਲੀ ਥਾਂ 'ਤੇ ਪੁਜੇ ਜਿੱਥੇ ਮੋਗਾ ਵਾਸੀ ਵਿਪਨ ਕੁਮਾਰ,ਮਨਜੀਤ ਸਿੰਘ ਅਤੇ ਪਿੰਡ ਧੱਲੇਕੇ ਵਾਸੀ ਅਮਰ ਸਿੰਘ ਭੜਕਾਊ ਭਾਸ਼ਨ ਦੇ ਰਹੇ ਸਨ, ਜਿਨ੍ਹਾਂ ਨੂੰ ਸੁਣ ਕੇ ਇਕੱਤਰ ਹੋਈ ਭੀੜ ਨੇ ਰੋਹ 'ਚ ਆ ਕੇ ਬੱਸਾਂ ਦੀ ਭੰਨ-ਤੋੜ ਸ਼ੁਰੂ ਕਰ ਦਿੱਤੀ ਤੇ ਅੱਗਾਂ ਲਾਉਣ ਲੱਗੇ। ਰੋਕਣ 'ਤੇ ਉਨ੍ਹਾਂ ਪੁਲਿਸ ਮੁਲਾਜ਼ਮਾਂ 'ਤੇ ਵੀ ਹਮਲਾ ਕਰ ਦਿੱਤਾ।ਉਨ੍ਹਾਂ ਦੱਸਿਆ ਕਿ ਪੁਲਿਸ ਨੂੰ ਦੋਸ਼ੀਆਂ ਦੀ ਪਹਿਚਾਣ ਵਾਸੀ ਪਿੰਡ ਘੱਲਕਲਾਂ ਬਲਦੇਵ ਸਿੰਘ,ਜਗਦੀਪ ਸਿੰਘ,ਜਗਰੂਪ ਸਿੰਘ,ਹਰਭਜਨ ਸਿੰਘ,ਛਿੰਦਰ ਸਿੰਘ, ਪ੍ਰੀਤਮ ਸਿੰਘ,ਹਰਮੇਲ ਸਿੰਘ,ਸੁਰਿੰਦਰ ਸਿੰਘ,ਦੇਵ ਸਿੰਘ,ਪ੍ਰਤਿਮ ਸਿੰਘ, ਕੁਲਦੀਪ ਸਿੰਘ, ਕਰਮਜੀਤ ਸਿੰਘ ਤੋਂ ਇਲਾਵਾ ਚਰਨਜੀਤ ਕੌਰ, ਪੂਜਾ ਇਨਸਾਂ, ਜੋਤੀ ਇਨਸਾਂ, ਸਿਮਰਨ ਇਨਸਾਂ, ਦਿਵੰਤੀ ਇਨਸਾਂ,ਕੁਲਵਿੰਦਰ ਕੌਰ,ਸਰਬਜੀਤ ਕੌਰ,ਕੰਮਲਜੀਤ ਕੌਰ, ਬਿਮਲਾ ਰਾਣੀ ਅਤੇ ਕੰਵਲਜੀਤ ਕੌਰ ਤੇ ਦੌਲਤਪੁਰਾ ਨੀਵਾਂ ਵਾਸੀ ਸੋਹਣਜੀਤ,ਮਹੇਸਰੀ ਵਾਸੀ ਗੁਰਨਾਮ ਸਿੰਘ, ਬਹੋਨਾ ਚੌਂਕ ਮੋਗਾ ਵਾਸੀ ਜਗੀਰ ਸਿੰਘ, ਮੋਗਾ ਵਾਸੀ ਵਿਪਨ ਕੁਮਾਰ, ਵੱਡਾ ਘਰ ਵਾਸੀ ਤਰਸੇਮ ਸਿੰਘ, ਬਾਘਾਪੁਰਾਨਾ ਵਾਸੀ ਕ੍ਰਿਪਾਲ ਸਿੰਘ, ਨਿਹਾਲ ਸਿੰਘ ਵਾਲਾ ਵਾਸੀ ਪ੍ਰਿੰਸ ਇਨਸਾਂ ਤੇ ਗੋਵਰਧਨ, ਬੱਟਰ ਕਲਾਂ ਵਾਸੀ ਜੀਵਨ ਇਨਸਾਂ, ਹਰਦਿਆਲ ਸਿੰਘ ਤੇ ਗਰੁਮੇਲ ਸਿੰਘ, ਬੱਧਨੀ ਖੁਰਦ ਵਾਸੀ ਕੁਲਵੰਤ ਸਿੰਘ ਤੇ ਬੂਟਾ ਸਿੰਘ, ਰਾਮੂੰ ਵਾਲਾ ਵਾਸੀ ਗੁਭਾਨ ਸਿੰਘ, ਬਾਰੇ ਵਾਲਾ ਵਾਸੀ ਨਿਰੰਜਨ ਸਿੰਘ, ਰਣਸੀਂਹ ਕਲਾਂ ਵਾਸੀ ਮੁਖਤਿਆਰ ਸਿੰਘ, ਧੂੜਕੋਟ ਰਣਸੀਂਹ ਦਾ ਜਸਵਿੰਦਰ ਸਿੰਘ, ਪੱਖਰਵੱਡ ਵਾਸੀ ਬਿਅੰਤ ਸਿੰਘ,ਦੀਨਾ ਸਾਹਿਬ ਦਾ ਨਿਰਮਲ ਸਿੰਘ, ਚੜਿੱਕ ਵਾਸੀ ਤਰਸੇਮ ਸਿੰਘ, ਮੋਠਾਂ ਵਾਲੀ ਵਾਸੀ ਜਸਵੀਰ ਸਿੰਘ, ਸਾਧੂ ਸਿੰਘ, ਅਤੇ ਲੰਢੇਕੇ ਵਾਸੀ ਬਿਅੰਤ ਸਿੰਘ ਵਜੋਂ ਹੋਈ ਹੈ। ਦੋਸ਼ੀ ਫਰਾਰ ਹੋਣ 'ਚ ਕਾਮਯਾਬ ਹੋ ਗਏ।ਇਸੇ ਤਰ੍ਹਾਂ ਬਾਘਾਪੁਰਾਨਾ ਵਿਖੇ ਸਾੜੀਆਂ ਤਿੰਨ ਬੱਸਾਂ ਦੇ ੮ ਦੋਸ਼ੀਆਂ ਦੇ ਖਿਲਾਫ ਬਾਘਾਪੁਰਾਨਾ ਪੁਲਿਸ ਨੇ ਧਾਰਾ 307,436, 427, 124-186,343,148,149 ਤੋਂ ਇਲਾਵਾ ਆਰਮਜ਼ ਐਕਟ ਦੇ ਤਹਿਤ ਮਾਮਲਾ ਦਰਜ ਕੀਤਾ ਹੈ। ਇੰਚਾਰਜ ਪ੍ਰਤਾਪ ਸਿੰਘ ਨੇ ਦੱਸਿਆ ਕਿ ਉਹਨਾ ਨੂੰ ਗੁਪਤ ਸੂਚਨਾ ਮਿਲੀ ਸੀ ਕਿ ਡੇਰਾ ਸਿਰਸਾ ਦੇ ਪ੍ਰੇਮੀ ਬੱਸ ਅੱਡੇ ਦੇ ਲਾਗੇ ਇਕੱਠੇ ਹੋ ਰਹੇ ਹਨ, ਜਿੱਥੇ ਗੜਬੜ ਦੀ ਸੰਭਾਵਨਾ ਹੈ। ਉਹ ਫੋਰਨ ਪੁਲਿਸ ਪਾਰਟੀ ਸਮੇਤ ਘਟਨਾ ਸਥਲ 'ਤੇ ਪੁਜੇ ਜਿੱਥੇ ਪਿੰਡ ਮਾੜੀ ਮੁਸਤਫਾ ਦੇ ਸਾਬਕਾ ਸਰਪੰਚ ਹਰਨੇਕ ਸਿੰਘ ਭੜਕਾਊ ਭਾਸ਼ਨ ਦੇ ਰਿਹਾ ਸੀ ਜਿਸ ਨੁੰ ਸੁਣ ਕੇ ਇਕੱਤਰ ਹੋਈ ਭੀੜ ਨੇ ਰੋਹ ਚ ਆ ਕੇ ਬੱਸਾਂ ਦੀ ਭੰਨ ਤੋੜ ਸ਼ੁਰੂ ਕਰ ਦਿੱਤੀ ਤੇ ਅੱਗਾਂ ਲਾਉਣ ਲੱਗੇ। ਪੁਲਿਸ ਦੇ ਰੋਕਣ ਸਮੇਂ ਉਹਨਾ ਪੁਲਿਸ ਮੁਲਾਜ਼ਮਾਂ 'ਤੇ ਹਮਲਾ ਕੀਤਾ।ਉਹਨਾ ਦੱਸਿਆ ਕਿ ਪੁਲਿਸ ਨੂੰ ਦੋਸੀਆਂ ਦੀ ਪਹਿਚਾਨ ਪਿੰਡ ਮਾੜੀ ਮੁਸਤਫਾ ਵਾਸੀ ਸਾਬਕਾ ਸਰਪੰਚ ਹਰਨੇਕ ਸਿੰਘ,ਕੇਸ਼ਾ ਸਿੰਘ,ਭਿੰਦਰ ਸਿੰਘ, ਅਨੰਤ ਰਾਮ ਤੇ ਸੁਖਦੇਵ ਸਿੰਘ ਬਾਘਾਪੁਨਾ ਦੇ ਬੈਂਕ ਦੇ ਫੌਜੀ ਗਾਰਡ ਵਜੋਂ ਹੋਈ ਹੈ।ਮਾਨਸਾ ਤੋਂ ਜਗਦੀਸ਼ ਬਾਂਸਲ/ਸੰਜੀਵ ਲੱਕੀ ਅਨੁਸਾਰ: ਸਿਰਸਾ ਡੇਰੇ ਦੇ ਮੁੱਖੀ ਵਿਰੁੱਧ ਪਰਚਾ ਦਰਜ ਹੋਣ ਕਾਰਨ ਬੀਤੇ ਕੱਲ ਡੇਰਾ ਸਮਰੱਥਕਾਂ ਵੱਲੋਂ ਕੀਤੀ ਗਈ ਸਰਕਾਰੀ ਸੰਪਤੀ ਦੀ ਭੰਨਤੋੜ ਅਤੇ ਬੱਸਾਂ ਨੂੰ ਅੱਗ ਲਗਾਏ ਜਾਣ ਕਾਰਨ ਅੱਜ ਦੂਸਰੇ ਦਿਨ ਵੀ ਲੋਕਾਂ ਦੇ ਮਨਾਂ ਵਿੱਚ ਡਰ ਅਤੇ ਦਹਿਸ਼ਤ ਦਾ ਮਾਹੌਲ ਦੇਖਣ ਨੂੰ ਮਿਲਿਆ। ਸ਼ਹਿਰ ਮਾਨਸਾ ਦੇ ਬਜ਼ਾਰ ਬੰਦ ਰਹੇ ਅਤੇ ਸੜਕੀ ਅਤੇ ਰੇਲ ਆਵਾਜਾਈ ਵੀ ਠੱਪ ਰਹੀ। ਰੇਲਾਂ ਅਤੇ ਬੱਸਾਂ ਬੰਦ ਰਹਿਣ ਕਾਰਨ ਆਮ ਜਨਤਾ ਨੂੰ ਕਾਫੀ ਪਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪਿਆ। ਸੁਰੱਖਿਆ ਦੇ ਮੱਦੇਨਜ਼ਰ ਬੱਸਾਂ ਨੂੰ ਬੱਸ ਸਟੈਂਡ ਤੋਂ ਜ਼ਿਲ੍ਹਾ ਪ੍ਰਬੰਧਕੀ ਕੰਪਲੈਕਸ ਮਾਨਸਾ ਵਿੱਚ ਸ਼ਿਫਟ ਕੀਤਾ ਗਿਆ ਹੈ।ਬੱਸਾਂ ਤੋਂ ਇਲਾਵਾ ਅੱਜ ਕਈ ਰੇਲ ਗੱਡੀਆਂ ਜਿਵੇਂ ਕਿ ਪੰਜਾਬ ਮੇਲ 2137 (ਫਿਰੋਜ਼ਪੁਰ ਤੋਂ ਮੁੰਬਈ),ਪੰਜਾਬ ਮੇਲ 2138(ਮੁੰਬਈ ਤੋਂ ਫਿਰੋਜ਼ਪੁਰ),ਦੈਨਿਕ ਸੁਪਰਫਾਸਟ 2482(ਸ੍ਰੀ ਗੰਗਾਨਗਰ ਤੋਂ ਦਿੱਲੀ),ਜੀਂਦ ਤੋਂ ਫਿਰੋਜ਼ਪੁਰ 345 ਅਤੇ ਦਿੱਲੀ ਤੋਂ ਫਿਰੋਜ਼ਪੁਰ ਰੇਲ ਨੰਬਰ 341 ਨੂੰ ਵੀ ਰੱਦ ਕਰ ਦਿੱਤਾ ਗਿਆ ਹੈ, ਜਿਸ ਕਾਰਨ ਯਾਤਰੀਆਂ ਨੂੰ ਕਾਫੀ ਪ੍ਰੇਸ਼ਾਨੀ ਝੱਲਣੀ ਪਈ। ਜ਼ਿਲ੍ਹਾ ਪ੍ਰਸ਼ਾਸਨ ਵੱਲੋਂ ਕਿਸੇ ਅਣਸੁਖਾਵੀਂ ਘਟਨਾ ਦੇ ਮੱਦੇਨਜ਼ਰ ਸ਼ਹਿਰ ਵਿੱਚ ਵੱਡੀ ਗਿਣਤੀ ਵਿੱਚ ਪੁਲਿਸ ਫੌਰਸ ਤੈਨਾਤ ਕੀਤੀ ਗਈ ਹੈ। ਜ਼ਿਲ੍ਹਾ ਪੁਲਿਸ ਮੁੱਖੀ ਹਰਦਿਆਲ ਸਿੰਘ ਮਾਨ ਨੇ ਕਿਹਾ ਕਿ ਕਿਸੇ ਵੀ ਵਿਅਕਤੀ ਨੂੰ ਅਮਨ ਕਾਨੂੰਨ ਭੰਗ ਕਰਨ ਦੀ ਇਜਾਜ਼ਤ ਨਹੀਂ ਦਿੱਤੀ ਜਾਵੇਗੀ ਅਤੇ ਸ਼ਰਾਰਤੀ ਅਨਸਰਾਂ ਨਾਲ ਸਖਤੀ ਨਾਲ ਨਜਿੱਠਿਆ ਜਾਵੇਗਾ।

ਖਾਲਸੇ ਦੀ ਜਨਮ ਭੂਮੀ ਸ਼੍ਰੀ ਅਨੰਦਪੁਰ ਸਾਹਿਬ ਵਿਖੇ ਹੋਲਾ-ਮਹੱਲਾ ਖਾਲਸਾਈ ਜਾਹੋ-ਜਲਾਲ ਨਾਲ ਸ਼ੁਰੂ

ਅਨੰਦਪੁਰ ਸਾਹਿਬ, 27 ਮਾਰਚ -ਖਾਲਸੇ ਦੀ ਜਨਮ ਭੂਮੀ ਸ਼੍ਰੀ ਅਨੰਦਪੁਰ ਸਾਹਿਬ ਵਿਖੇ ਤਿੰਨ ਦਿਨਾਂ ਹੋਲਾ-ਮਹੱਲਾ ਅੱਜ ਪੂਰੀਆਂ ਧਾਰਮਿਕ ਰਹੁ-ਰੀਤਾਂ ਨਾਲ ਸ਼ੁਰੂ ਹੋ ਗਿਆ। ਵੱਡੀ ਗਿਣਤੀ ਵਿੱਚ ਸ਼ਰਧਾਲੂ ਸੰਗਤਾਂ ਗੁਰਦੁਆਰਾ ਤਖਤ ਸ਼੍ਰੀ ਕੇਸਗੜ੍ਹ ਸਾਹਿਬ, ਕਿਲਾ ਆਨੰਦਗੜ੍ਹ ਸਾਹਿਬ ਅਤੇ ਹੋਰ ਇਤਿਹਾਸਿਕ ਗੁਰਦੁਆਰਿਆਂ ਵਿਖੇ ਮੱਥਾ ਟੇਕ ਰਹੀਆਂ ਹਨ ਅਤੇ ਸਰੋਵਰ ਵਿੱਚ ਇਸ਼ਨਾਨ ਕਰ ਰਹੀਆਂ ਹਨ। ਇਸੇ ਦੌਰਾਨ ਐਸ.ਜੀ.ਪੀ.ਸੀ. ਗਰਊਂਡ ਵਿਖੇ ਪੰਜਾਬ ਦੇ ਵਿਕਾਸ ਨੂੰ ਦਰਸਾਉਂਦੀਆਂ ਰੁਜ਼ਗਾਰ ਵਿਭਾਗ, ਭਾਸ਼ਾ ਵਿਭਾਗ, ਸਰਵ ਸਿੱਖਿਆ ਵਿਭਾਗ, ਮਿਲਕਫੈੱਡ, ਪਸ਼ੂ ਪਾਲਣ ਵਿਭਾਗ, ਖੁਰਾਕ ਅਤੇ ਵੰਡ ਵਿਭਾਗ, ਜ਼ਿਲ੍ਹਾ ਉਦਯੋਗ ਕੇਂਦਰ ਮੋਹਾਲੀ, ਡੀ.ਆਰ.ਡੀ.ਏ. ,ਡੀ.ਏ.ਵੀ.ਪੀ. ਨਵੀਂ ਦਿੱਲੀ, ਮੱਛੀ ਪਾਲਣ ਵਿਭਾਗ, ਮਾਰਕਫੈੱਡ, ਸਿਹਤ ਵਿਭਾਗ, ਪੰਜਾਬ ਸਟੇਟ ਏਡਜ਼ ਕੰਟਰੋਲ ਸੰਸਥਾ, ਬਾਗਬਾਨੀ ਵਿਭਾਗ, ਖੇਤੀਬਾੜੀ ਵਿਭਾਗ, ਪਨਸਪ, ਰੈੱਡ ਕਰਾਸ, ਰਿਜ਼ਰਵ ਬੈਂਕ ਅਤੇ ਪੰਜਾਬ ਤਕਨੀਕੀ ਸਿੱਖਿਆ ਵਿਭਾਗ ਵਲੋਂ ਆਮ ਜਨਤਾ ਨੂੰ ਜਾਗਰੂਕ ਕਰਨ ਲਈ ਵਿਕਾਸ ਪ੍ਰਦਰਸ਼ਨੀਆਂ ਲਗਾਈਆਂ ਗਈਆਂ ਹਨ। ਇਹਨਾਂ ਵਿਕਾਸ ਪ੍ਰਦਰਸ਼ਨੀਆਂ ਦਾ ਅੱਜ ਇਥੇ ਸ਼੍ਰੀ ਅਰਵਿੰਦ ਪਾਲ ਸਿੰਘ ਸੰਧੂ ਐਸ.ਡੀ.ਐਮ-ਕਮ-ਮੇਲਾ ਅਫਸਰ ਅਨੰਦਪੁਰ ਸਾਹਿਬ ਨੇ ਉਦਘਾਟਨ ਕੀਤਾ। ਇਸ ਮੌਕੇ ਉਹਨਾਂ ਨਾਲ ਸ਼੍ਰੀ ਹਰਜੀਤ ਸਿੰਘ ਗਰੇਵਾਲ ਜ਼ਿਲ੍ਹਾ ਲੋਕ ਸੰਪਰਕ ਅਫਸਰ ਰੂਪਨਗਰ ਅਤੇ ਹਰਭਜਨ ਸਿੰਘ ਨਾਇਬ ਤਹਿਸੀਲਦਾਰ ਨੂਰਪੁਰ ਬੇਦੀ ਵੀ ਹਾਜ਼ਰ ਸਨ।ਸ੍ਰੀ ਸੰਧੂ ਨੇ ਦੱਸਿਆ ਕਿ ਇਹ ਪਹਿਲੀ ਵਾਰ ਹੈ ਕਿ ਰਿਜ਼ਰਵ ਬੈਂਕ ਆਫ ਇੰਡੀਆ, ਡੀ..ਏ.ਵੀ.ਪੀ. ਨਵੀਂ ਦਿੱਲੀ ਅਤੇ ਨੈਸ਼ਨਲ ਏਡਜ਼ ਕੰਟਰੋਲ ਸੁਸਾਇਟੀ ਪੰਜਾਬ ਨੇ ਵੀ ਪ੍ਰਦਰਸ਼ਨੀ ਲਗਾਈ ਹੈ। ਇਸ ਮੌਕੇ ਪੁਸ਼ਪਾ ਗੁਜਰਾਲ ਸਾਇੰਸ ਸਿਟੀ ਕਪੂਰਥਲਾ ਦੀ ਇੱਕ ਮੋਬਾਇਲ ਵੈਨ ਵੀ ਫਿਲਮ ਰਾਹੀਂ ਜਨਤਾ ਨੂੰ ਏਡਜ਼ ਤੋਂ ਸਾਵਧਾਨ ਅਤੇ ਬਚਾਅ ਲਈ ਜਾਗਰੂਕਤਾ ਪੈਦਾ ਕਰ ਰਹੀ ਹੈ।ਸ਼੍ਰੀ ਸੰਧੂ ਨੇ ਇਹ ਵੀ ਦੱਸਿਆ ਕਿ ਸਮੁੱਚੇ ਮੇਲਾ ਖੇਤਰ ਨੂੰ 9 ਸੈਕਟਰਾਂ ਵਿਚ ਵੰਡਿਆ ਗਿਆ ਹੈ ਅਤੇ ਹਰ ਇਕ ਸੈਕਟਰ ਵਿਚ ਇਕ ਪੁਲਿਸ ਪੋਸਟ, ਸਿਹਤ ਵਿਭਾਗ ਵਲੋਂ ਫਸਟਏਡ ਪੋਸਟ ਅਤੇ ਰੈਡ ਕਰਾਸ ਵੱਲੋਂ ਵੀ 16 ਫਸਟਏਡ ਪੋਸਟਾਂ ਲਗਾਈਆਂ ਗਈਆਂ ਹਨ। ਉਹਨਾਂ ਨੇ ਇਹ ਵੀ ਦੱਸਿਆ ਕਿ ਮੇਲੇ ਦੌਰਾਨ ਅਮਨ ਅਤੇ ਸ਼ਾਂਤੀ ਬਣਾਈ ਰੱਖਣ ਲਈ ਰੂਪਨਗਰ ਜਿਲ੍ਹੇ ਦੇ ਨਾਲ-ਨਾਲ ਬਾਹਰਲੇ ਜਿਲ੍ਹਿਆਂ ਤੋਂ ਵੀ ਲੋੜੀਦੀ ਸੰਖਿਆ ਵਿਚ ਪੁਲਿਸ ਫੋਰਸ ਦਾ ਪ੍ਰਬੰਧ ਕੀਤਾ ਗਿਆ ਹੈ।ਜ਼ਿਕਰਯੋਗ ਹੈ ਕਿ ਇਸ ਵਾਰ ਐਸ.ਜੀ.ਪੀ.ਸੀ.ਗਰਾਉਂਡ ਵਿਖੇ ਸ਼੍ਰੋਮਣੀ ਕਮੇਟੀ ਵਲੋਂ ਕਰਵਾਈ ਗੱਤਕਾ ਪ੍ਰਦਰਸ਼ਨੀ ਦੌਰਾਨ ਵੱਖ-ਵੱਖ ਗੱਤਕਾ ਟੀਮਾਂ ਵਲੋਂ ਗੱਤਕੇਬਾਜ਼ੀ ਦੇ ਸ਼ਾਨਦਾਰ ਜ਼ੌਹਰ ਦਿਖਾਏ ਗਏ। ਇਸ ਮੌਕੇ ਵਿਚਾਰ ਪ੍ਰਗਟ ਕਰਦਿਆਂ ਪੰਜਾਬ ਗੱਤਕਾ ਐਸੋਸੀਏਸ਼ਨ ਦੇ ਜਨਰਲ ਸੱਕਤਰ ਸ਼੍ਰੀ ਹਰਜੀਤ ਸਿੰਘ ਗਰੇਵਾਲ ਨੇ ਦੱਸਿਆ ਕਿ ਅਤੇ ਐਸੋਸੀਏਸ਼ਨ ਨੂੰ ਪੰਜਾਬ ਉਲੰਪਿਕ ਐਸੋਸੀਏਸ਼ਨ ਵਲੋਂ ਵੀ ਮਾਨਤਾ ਦੇ ਦਿੱਤੀ ਗਈ ਹੈ ਤੇ ਸਿੱਖਿਆ ਵਿਭਾਗ ਪੰਜਾਬ ਵਲੋਂ ਗੱਤਕੇ ਨੂੰ ਪੰਜਾਬ ਰਾਜ ਦੇ ਸਕੂਲਾਂ, ਕਾਲਜਾਂ ਅਤੇ ਯੂਨੀਵਰਸਿਟੀਆਂ ਦੇ ਖੇਡ ਕੈਲੰਡਰ ਵਿੱਚ ਸ਼ਾਮਲ ਕਰ ਲਿਆ ਗਿਆ ਹੈ।

ਪੀਲੇ ਪਟਕੇ ਬੰਨਣ ਨੂੰ ਹੀ ਸਿੱਖੀ ਸਮਝ ਰਹੇ ਨੇ ਘੋਨ-ਮੋਨ ਨੌਜਵਾਨ

ਮਾਛੀਵਾੜਾ 27 ਫਰਵਰੀ (ਸੁਸ਼ੀਲ ਸ਼ਰਮਾ) ਹਰ ਸਾਲ ਦੀ ਤਰਾ ਹੋਲੇ ਮਹੱਲੇ ਦੇ ਵੱਡੇ ਜੋੜ ਮੇਲਾ ਤੇ ਆਨੰਦਪੁਰ ਸਾਹਿਬ ਜਾਣ ਵਾਲੀਆ ਦੇਸ਼ ਵਿਦੇਸ਼ ਤੋ ਆਉਦੀਆ ਸੰਗਤਾ ਮਾਛੀਵਾੜਾ ਦੀ ਪਵਿੱਤਰ ਧਰਤੀ ਤੇ ਵੀ ਨਤਮਸਤਕ ਹੋਣ ਪਹੁੰਚਦੀਆ ਹਨ। ਜਿੱਥੇ ਦਸ਼ਮੇਸ਼ ਪਿਤਾ ਸ੍ਰੀ ਗੁਰੂ ਗੋਬਿੰਦ ਸਿੰਘ ਜੀ ਨਾਲ ਸਬੰਧਤ ਚਾਰ ਗੁਰਦੁਆਰੇ ਨੇ ਤੇ ਸੰਸਾਰ ਪ੍ਰਸਿੱਧ ਅਕਾਲ ਪੁਰਖ ਨਾਲ ਅਭੇਦਤਾ ਦਾ ਪ੍ਰਤੀਕ ਸ਼ਬਦ ਮਿੱਤਰ ਪਿਆਰੇ ਨੂੰ ਹਾਲ ਮੁਰੀਦਾ ਦਾ ਕਹਿਣਾ ਵੀ ਗੁਰੂ ਸਾਹਿਬ ਨੇ ਇੱਥੇ ਹੀ ਉਚਾਰਿਆ ਸੀ ਹੁਣ ਹਜ਼ਾਰਾ ਹੀ ਨਹੀ ਬਲ ਕਿ ਲੱਖਾ ਦੀ ਗਿਣਤੀ ਵਿਚ ਪਹੁੰਚਣ ਵਾਲੀ ਸੰਗਤ ਦੀ ਸ਼ਹਿਰ ਤੇ ਇਲਾਕਾ ਵਾਸੀਆ ਵੱਲੋ ਥਾ-ਥਾ ¦ਗਰ ਲਗਾ ਕੇ ਸੇਵਾ ਕੀਤੀ ਜਾ ਰਹੀ ਹੈ। ਭਾਵੇ ਕਿ ਟਰੱਕਾ,ਟਰਾਲੀਆ ਤੇ ਮੋਟਰ ਸਾਇਕਲਾ ਤੇ ਆਉਣ ਵਾਲੀ ਸੰਗਤ ਵਿਚ ਜਿਆਦਾ ਗਿਣਤੀ ਨੌਜਵਾਨਾ ਦੀ ਹੀ ਹੈ ਪਰ ਜਦੋ ਇਨ੍ਹਾ ਸਿੱਖ ਨੌਜਵਾਨਾ ਦੇ ਮੂੰਹ ਸਿਰ ਘੋਨ-ਮੋਨ ਤੇ ਕੰਨਾ ਵਿਚ ਨੱਤੀਆ ਦੇਖਦੇ ਹਾ ਤਾ ਸਰਬੰਸਦਾਨੀ ਵੱਲੋ ਸਿੱਖੀ ਲਈ ਕੀਤੀਆ ਕੁਰਬਾਨੀਆ ਨੂੰ ਚੇਤੇ ਕਰਕੇ ਰੂਹ ਕੁਰਲਾ ਉਠਦੀ ਹੈ ਤੇ ਇਹ ਅੱਜ ਦੇ ਨੌਜਵਾਨ ਸਿਰਾ ਤੇ ਪੀਲੇ ਪੱਟਕੇ ਬੰਨ੍ਹਣਾ ਤੇ ਗੱਡੀਆ ਉਪੱਰ ਝੰਡੀਆ ਲਾਉਣ ਨੂੰ ਹੀ ਸਿੱਖੀ ਸਮਝ ਰਹੇ ਹਨ। ਕਿਸੇ ਸਮੇ ਮਝੈਲਾ ਦੇ ਸਿੱਖ ਸਰਦਾਰਾ ਦੀ ਚੜ੍ਹਤ ਸੀ ਪਰ ਹੁਣ ਜਿਆਦਾ ਮਾਝੇ ਵਿਚੋ ਆਉਣ ਵਾਲੇ ਲੋਕ ਹੀ ਸਿੱਖੀ ਤੋ ਦੂਰ ਹੁੰਦੇ ਜਾਪਦੇ ਹਨ। ਸ੍ਰੀ ਅੰਮ੍ਰਿਤਸਰ ਸਾਹਿਬ ਦੇ ਨੇੜਲੇ ਪਿੰਡਾ ਤੋ ਆਏ ਕੁਝ ਨੌਜਵਾਨਾ ਨਾਲ ਗੱਲ ਕਰਨ ਤੇ ਉਹਨਾ ਕਿਹਾ ਕਿ ਕਿਸੇ ਨੇ ਸਾਨੂੰ ਸਿੱਖੀ ਦੇ ਇਤਿਹਾਸ ਵੱਲ ਪ੍ਰੇਰਿਆ ਹੀ ਨਹੀ ਅਸੀ ਤਾ ਸਿਰਫ ਇਨ੍ਹਾ ਵੇਹਲੇ ਦਿਨਾ ਵਿਚ ਆਮ ਵਾਗ ਹੀ ਇਹਨਾ ਦਿਹਾੜਿਆ ਤੇ ਆ ਜਾਦੇ ਹਾ ਤੇ ਪੱਟਕੇ ਤੇ ਝੰਡੀਆ ਵੀ ਰਸਤੇ ਵਿਚੋ ਹੀ ਖ਼ਰੀਦ ਲੈਦੇ ਹਾ। ਅਜੋਕੇ ਸਮੇ ਵਿਚ ਮੁੰਡਿਆ ਦੇ ਵੱਧ ਰਹੇ ਪਤਿਤਪੁਣੇ ਬਾਰੇ ਗੱਲ ਕਰਦਿਆ ਬਹੁਜਨ ਸਮਾਜ ਪਾਰਟੀ ਦੇ ਸਕੱਤਰ ਜੱਥੇਦਾਰ ਅਮਰਜੀਤ ਸਿੰਘ ਬਾਲਿਉ ਨੇ ਕਿਹਾ ਕਿ ਜਦੋ ਤੋ ਬਾਦਲ ਭਾਜਪਾ ਤੇ ਆਰ ਐਸ ਐਸ ਦੇ ਧੱਕੇ ਚੜਿਆ ਹੈ ਉੱਦੋ ਤੋ ਹੀ ਸਿੱਖੀ ਦੇ ਦਰਖ਼ਤ ਨੂੰ ਟੱਕ ਲਗਣੇ ਸ਼ੁਰੂ ਹੋ ਗਏ ਨੇ ਹੁਣ ਸਿੱਖਾ ਦੇ ਨੱਬੇ ਫੀਸਦੀੇ ਮੁੰਡੇ ਸਿੱਖੀ ਤੋ ਦੂਰ ਹੁੰਦੇ ਜਾ ਰਹੇ ਹਨ। ਆਪ ਹੀ ਵੇਖ ਲਉ ਕਿ ਅੱਜ ਗੁਰਦੁਆਰਾ ਸਾਹਿਬ ਵਿਚ ਕਿਨ੍ਹੇ ਕੁ ਨੌਜਵਾਨ ਕੇਸ ਧਾਰੀ ਹਨ ਤੇ ਸ੍ਰੋਮਣੀ ਕਮੇਟੀ ਵੀ ਆਪਣਾ ਬਣਦਾ ਫ਼ਰਜ ਨਹੀ ਨਿਭਾ ਰਹੀ। ਫੋਟੋ ਫਾਇਲ ਨੇਮ ; ਮਾਛੀਵਾੜਾ ਗੁਰਦੁਆਰਾ ਕੈਪਸ਼ਨ; ਮਾਛੀਵਾੜਾ ਦੇ ਇਤਿਹਾਸਕ ਗੁਰਦੁਆਰਾ ਸ੍ਰੀ ਚਰਨ ਕੰਵਲ ਸਾਹਿਬ ਦੇ ਦਰਸ਼ਨਾ ਲਈ ਆਏ ਨੌਜਵਾਨ ਮੱਥਾ ਟੇਕਣ ਉਪਰੰਤ ਬਾਹਰ ਆਉਦੇ ਹੋਏ।

ਸ਼੍ਰੋਮਣੀ ਯੂਥ ਅਕਾਲੀ ਦਲ (ਅੰਮ੍ਰਿਤਸਰ) ਯੂ.ਕੇ.ਦੀ ਐਗਜਿਕਟਵ ਕਮੇਟੀ ਦੀ ਮੀਟਿੰਗ ਵਿੱਚ ਨੌਜਵਾਨਾਂ ਨੂੰ ਵੱਧ ਤੋਂ ਵੱਧ ਯੂਥ ਵਿੰਗ ਵਿੱਚ ਭਰਤੀ ਕਰਨ ਅਤੇ ਮੌਜੂਦਾ ਪੰਥਕ ਮਸਲਿਆਂ ਤੇ ਵਿਚਾਰਾਂ

ਬਰਮਿੰਘਮ (ਬਿਅੰਤ ਸਿੰਘ) ਬੀਤੇ ਦਿਨੀ ਬਰਤਾਨੀਆਂ ਦੇ ਵੱਡੇ ਸ਼ਹਿਰ ਬਰਮਿੰਘਮ ਵਿੱਚ ਵੈਸਟ ਬ੍ਰਾਮਿਚ ਦੇ ਗੁਰੂ ਨਾਨਕ ਗੁਰਦਵਾਰਾ ਐਡਵਰਡ ਸਟਰੀਟ ਵਿਖੇ ਸ਼੍ਰੋਮਣੀ ਯੂਥ ਅਕਾਲੀ ਦਲ (ਅੰਮ੍ਰਿਤਸਰ) ਯੂ.ਕੇ. ਦੇ ਐਗਜਕਟਿਵ ਮੈਬਰਾਂ ਦੀ ਇੱਕ ਵਿਸ਼ੇਸ਼ ਮੀਟਿੰਗ ਯੂਥ ਵਿੰਗ ਯੂ.ਕੇ. ਦੇ ਪ੍ਰਧਾਨ ਭਾਈ ਕੁਲਵੰਤ ਸਿੰਘ ਮੁਠੱਡਾ ਦੀ ਪ੍ਰਧਾਨਗੀ ਹੇਠ ਹੋਈ। ਮੀਟਿੰਗ ਵਿੱਚ ਜਿਥੇ ਯੂਥ ਵਿੰਗ ਨੂੰ ਸਮੁੱਚੇ ਯੂ.ਕੇ ਵਿੱਚ ਵੱਡੇ ਪੱਧਰ ਤੇ ਲਾਮਬੰਦ ਕਰਨ ਅਤੇ ਵੱਧ ਤੋਂ ਵੱਧ ਨੌਜਵਾਨਾਂ ਨੂੰ ਇਸ ਵਿੱਚ ਭਰਤੀ ਕਰਨ,ਪੰਜਾਬ ਵਿੱਚ ਪਿਛਲੇ ਲੰਬੇ ਸਮੇ ਤੋਂ ਜੇਲਾਂ ਵਿੱਚ ਨਜਰਬੰਦ ਨੌਜਵਾਨਾਂ ਦੀ ਕਨੂੰਨੀ ਪੈਰਵਾਈ ਕਰਨ ਅਤੇ ਉਨਾਂ ਦੀ ਆਰਥਿਕ ਤੌਰ ਤੇ ਮਦਦ ਕਰਨ ਅਤੇ ਸਿੱਖ ਕੌਮ ਵਿੱਚ ਪਿਛਲੇ ਥੋੜੇ ਸਮੇਂ ਤੋਂ ਵੱਧ ਰਹੇ ਆਪਸੀ ਵਾਦ ਵਿਵਾਦ, ਪੰਜਾਬ ਵਿੱਚ ਆ ਰਹੀਆਂ ਸ਼੍ਰੋਮਣੀ ਕਮੇਟੀ ਚੋਣਾਂ ਬਾਰੇ,ਵਿਚਾਰ ਵਟਾਂਦਰਾ ਯੂ.ਕੇ ਵਿੱਚ ਸਮੁੱਚੀਆਂ ਪੰਥਕ ਜਥੇਬੰਦੀਆਂ ਵਿੱਚ ਆਪਸੀ ਪ੍ਰੇਮ ਪਿਆਰ ਅਤੇ ਏਕਤਾ ਦੇ ਯਤਨਾਂ ਵਜੋਂ ਸ਼੍ਰੋਮਣੀ ਯੂਥ ਅਕਾਲੀ ਦਲ (ਅੰਮ੍ਰਿਤਸਰ) ਦੇ ਸਮੁਚੇ ਨੌਜਵਾਨਾਂ ਵਲੋਂ ਯੂ.ਕੇ ਦੇ ਵੱਖ ਵੱਖ ਗੁਰੁ ਘਰਾਂ ਵਿਖੇ ਗੁਰਮਤ ਸਮਾਗਮਾਂ ਦੀ ਲੜੀ ਅਰੰਭਣ ਦਾ ਫੈਸਲਾ ਕੀਤਾ ਗਿਆ ਹੈ ਜਿਸ ਦੀ ਤਰੀਖ ਦਾ ਐਲਾਨ ਜਲਦੀ ਹੀ ਕਰ ਦਿੱਤਾ ਜਾਵੇਗਾ ਮੀਟਿੰਗ ਦੌਰਾਨ ਯੂਥ ਵਿੰਗ ਵਿੱਚ ਕੁੱਝ ਨਿਯੁਕਤੀਆਂ ਵੀ ਕੀਤੀਆਂ ਗਈਆਂ ਜਿਸ ਵਿੱਚ ਭਾਈ ਸੁੱਖਾ ਸਿੰਘ ਨੂੰ ਯੂਥ ਵਿੰਗ ਯੂ.ਕੇ ਦਾ ਵਾਈਸ ਪ੍ਰਧਾਨ ਅਤੇ ਬਲਜਿੰਦਰ ਸਿੰਘ ਨੂੰ ਤਾਲਮੇਲ ਸਕੱਤਰ ਨਿਯੁਕਤ ਕੀਤਾ ਗਿਆ ਇਸ ਮੌਕੇ ਯੂਥ ਵਿੰਗ ਦੇ ਜਨਰਲ ਸਕੱਤਰ ਭਾਈ ਸਤਿੰਦਰ ਸਿੰਘ ਮੰਗੂਵਾਲ. ਸੀ: ਮੀਤ:ਪ੍ਰਧਾਨ ਭਾਈ ਤੇਜਵੀਰ ਸਿੰਘ, ਖਜਾਨਚੀ ਭਾਈ ਮਲਕੀਤ ਸਿੰਘ ਬਾਬਾ ਬਕਾਲਾ, ਸਕੱਤਰ ਭਾਈ ਮਨਦੀਪ ਸਿੰਘ ਅਜਨਾਲਾ, ਬ੍ਰਮਿੰਘਮ ਬ੍ਰਾਂਚ ਦੇ ਪ੍ਰਧਾਨ ਭਾਈ ਦਲਜੀਤ ਸਿੰਘ ਟਿਪਟਨ, ਜਨਰਲ ਸਕੱਤਰ ਭਾਈ ਗੁਰਦਾਵਰ ਸਿੰਘ ਮੁਠੱਡਾ, ਭਾਈ ਬਲਜਿੰਦਰ ਸਿੰਘ ਸੰਘਾ, ਬਿਅੰਤ ਸਿੰਘ ਸਾਬਕਾ ਖਜਾਨਚੀ ਸੌਦਾ ਸਾਧ, ਸਰਬਜੀਤ ਸਿੰਘ ਜਨਰਲ ਸਕੱਤਰ ਸ਼੍ਰੋਮਣੀ ਅਕਾਲੀ ਦਲ (ਅ), ਸੂਬਾ ਸਿੰਘ ਲਿੱਤਰਾਂ ਸਪੋਕਸਮੈਨ ਸ਼੍ਰੋਮਣੀ ਅਕਾਲੀ ਦਲ (ਅ), ਇੰਦਰ ਸਿੰਘ ਸੋਹਲ, ਭਾਈ ਇੰਦਰਜੀਤ ਸਿੰਘ ਗਰੇਵਾਲ, ਰਣਜੀਤ ਸਿੰਘ ਸ਼ੇਰਗਿਲ, ਭਾਈ ਅਜੈਬ ਸਿੰਘ ਅਤੇ ਹੋਰ ਕਈ ਆਗੂ ਸ਼ਾਮਲ ਸਨ।

ਰਾਹੁਲ ਗਾਂਧੀ ਦੇ ਸੁਪਨਿਆਂ ਨੂੰ ਸਾਕਾਰ ਕਰਾਂਗੇ:ਜਸਦੇਵ ਟਾਂਡਾ

ਮਾਛੀਵਾੜਾ 27 ਫਰਵਰੀ (ਸੁਸ਼ੀਲ ਸ਼ਰਮਾ) ਆਮ ਆਦਮੀ ਦਾ ਹਿੰਦੋਸਤਾਨ ਬਣਾਉਣ ਦਾ ਸੁਪਨਾ ਪਾਰਟੀ ਦੇ ਕੌਮੀ ਜਰਨਲ ਸਕੱਤਰ ਤੇ ਹਰਮਨ ਪਿਆਰੇ ਨੋਜਵਾਨ ਨੇਤਾ ਰਾਹੁਲ ਗਾਂਧੀ ਨੇ ਦੇਸ਼ ਭਾਵਨਾਂ ਨਾਲ ਲਿਆ ਹੈ । ਅਸੀ ਸਾਰੇ ਰਲ ਕੇ ਉਨਾਂ ਦੀ ਸੋਚ ਦੇ ਫੁੱਲ ਚੜਾਉਦੇ ਹੋਏ ਉਨ੍ਹਾ ਦੇ ਸੁਪਨਿਆਂ ਨੂੰ ਸਾਕਾਰ ਕਰਾਂਗੇ ਇਨਾਂ ਗੱਲਾਂ ਦਾ ਪ੍ਰਗਟਾਵਾ ਕਰਦਿਆਂ ਯੂਥ ਕਾਂਗਰਸ ਦੇ ਸੀਨੀਅਰ ਨੇਤਾ ਤੇ ਡੈਲੀਗੇਟ ਜਸਦੇਵ ਸਿੰਘ ਟਾਂਡਾ ਕੁਸ਼ਲ ਸਿੰਘ ਨੇ ਕਿਹਾ ਜਦ ਤੋ ਪਾਰਟੀ ਦੀ ਕਮਾਨ ਰਾਹੁਲ ਗਾਂਧੀ ਦੇ ਹੱਥ ਵਿੱਚ ਆਈ ਹੈ ਉਦੋ ਤੋ ਹੀ ਪਾਰਟੀ ਦੇ ਨੋਜਵਾਨਾਂ ਵਿੱਚ ਭਾਰੀ ਉਤਸ਼ਾਹ ਪਾਇਆ ਜਾ ਰਿਹਾ ਹੈ ਤੇ ਸੱਤਾ ਵਿੱਚ ਵੀ ਯੂਥ ਵਿੰਗ ਨੂੰ ਬਣਦਾ ਮਾਣ ਸਤਿਕਾਰ ਮਿਲਿਆ ਹੈ । ਇਸ ਦੇ ਨਾਲ ਹੀ ਪਾਰਟੀ ਦੀ ਨੁਹਾਰ ਵੀ ਬਦਲ ਗਈ ਹੈ ਜਸਦੇਵ ਨੇ ਕਿਹਾ ਕਿ ਜਿਸ ਤਰਾਂ ਪਾਰਟੀ ਵਿੱਚ ਲੋਕਤੰਤਰਤਾ ਅਪਣਾਈ ਗਈ ਹੈ । ਇਸ ਨਾਲ ਪਾਰਟੀ ਲਈ ਸੱਚੇ ਦਿਲੋ ਕੰਮ ਕਰਨ ਵਾਲਿਆਂ ਦੀ ਕਦਰ ਪਈ ਹੈ । ਅਸੀ ਰਾਹੁਲ ਗਾਂਧੀ ਵੱਲੋ ਜੋ ਵੀ ਪ੍ਰੋਗਰਾਮ ਆਵੇਗਾ ਉਸ ਤੇ ਫੁੱਲ ਚੜਾਂਵਾਂਗੇ ਤੇ ਪਾਰਟੀ ਲਈ ਤਨ ਮਨ ਤੇ ਧਨ ਨਾਲ ਸੇਵਾ ਕਰਾਂਗੇ । ਜਸਦੇਵ ਟਾਡਾ ਦੀ ਫਾਇਲ ਫੋਟੋ

ਝੂਠੇ ਸੌਦੇ ਸਮਰਥਕਾਂ ਵਲੋਂ ਕੀਤੀ ਜਾ ਰਹੀ ਤਬਾਹੀ ਦੀ ਜਿੰਮੇਵਾਰ ਮੌਜੂਦਾ ਬਾਦਲ ਸਰਕਾਰ ਕੇਵਲ ਸਿਂਖਾਂ ਤੇ ਹੀ ਗੋਲੀਆਂ ਚਲਾਉਣ ਦੇ ਸਮਰੱਥ, ਹੱਥਾਂ ਨਾਲ ਦਿੱਤੀਆਂ ਦੰਦਾਂ ਨਾਲ ਖੌਲਣੀਆਂ ਪੈ ਸਕਦੀਆਂ ਹਨ ‐ ਸ਼੍ਰੌਮਣੀ ਅਕਾਲੀ ਦਲ (ਅ) ਯੂਥ ਵਿੰਗ ਜਰਮਨੀ

ਬਾਦਲ ਸਰਕਾਰ ਦੇ ਚਹੇਤੇ ਡੇਰੇਦਾਰ ਝੂਠੇ ਸੌਦਾ ਸਾਧ ਤੇ ਦਰਜ ਹੋਏ ਕਤਲ ਕੇਸ ਕਾਰਨ ਪਹਿਲਾਂ ਤੋਂ ਹੀ ਸੱਚਾਈ ਤੋਂ ਭਟਕੇ ਲੌਕਾਂ ਨੇ ਆਪਣੀ ਮੰਦਬੁੱਧੀ ਦੀ ਉਦਾਹਰਣ ਹੋਰ ਗੂੜੀ ਕਰਦਿਆਂ ਆਪਣੇ ਹੀ ਘਰ ਅਤੇ ਸੰਪਤੀ ਅੱਗ ਹਵਾਲੇ ਕਰ ਦਿੱਤੇ, ਆਪਣਿਆਂ ਤੇ ਚੱਲੀਆਂ ਗੋਲੀਆਂ, ਹੋਏ ਤਸ਼ੱਦਦਾਂ, ਹੋਈਆਂ ਬੇਪਤੀਆਂ ਵੇਲੇ ਚੁੱਪ ਦੇ ਧਾਰਨੀ ਅੱਜ ਖਬਰੇ ਕਿਸ ਅਣਖ ਕਾਰਨ ਇਹ ਤਬਾਹੀ ਦੇ ਸਰੋਤ ਬਣ ਰਹੇ ਹਨ। ਬਾਦਲ ਸਰਕਾਰ ਦੀ ਦੋਹਰੀ ਅਤੇ ਸਿੱਖੀ ਵਿਰੋਧੀ ਨੀਤੀ ਦੀ ਝਲਕ ਲੁਧਿਆਣਾ ਚ ਹੋਏ ਗੋਲੀ ਕਾਂਡ, ਉਸ ਤੋਂ ਪਹਿਲਾਂ ਪੰਜਾਬ ਵਿੱਚ ਹੋਏ ਪ੍ਰਵਾਸੀ ਮਜਦੂਰਾਂ ਦੇ ਮਚਾਏ ਖਤਰਨਾਕ ਤਾਂਡਵ, ਆਸ਼ੂਤੋਸ਼ ਪ੍ਰਤੀ ਵਰਤੇ ਨਰਮ ਵਤੀਰੇ ਦੇ ਅਣਬੁੱਜੇ ਕਾਰਨਾਂ ਅਤੇ ਹੁਣ ਝੂਠੇ ਸੌਦਾ ਸਾਧ ਅਤੇ ਉਸ ਦੇ ਸਮਰੱਥਕਾ ਵਲੋਂ ਕੀਤੇ ਜਾ ਰਹੇ ਇਹਨਾਂ ਘਾਤਕ ਹਮਲਿਆਂ ਤੋਂ ਸ਼ਰੇਆਮ ਦਿਖਾਈ ਦਿੰਦੀ ਹੈ।ਕੀ ਪੰਜਾਬ ਸਰਕਾਰ ਦੀਆਂ ਗੋਲੀਆਂ ਕੇਵਲ ਸਿਂਖੀ ਦੇ ਰਖਵਾਲਿਆਂ ਦੇ ਹਿੱਸੇ ਹੀ ਲਿੱਖੀਆਂ ਹਨ ? ਦਿੱਲ਼ੀ ਅਤੇ ਹੁਣ ਇਹ ਜੋ ਵੀ ਪੰਜਾਬ ਅਤੇ ਸਿੱਖੀ ਨਾਲ ਗਿਣੀ ਮਿਥੀ ਸ਼ਾਜਿਸ਼ ਅਧੀਨ ਹੋ ਰਿਹਾ ਹੈ, ਤੋਂ ਇਕ ਗੱਲ ਤਾਂ ਬਿਨਾਂ ਸ਼ੱਕ ਸਾਬਿਤ ਹੁੰਦੀ ਹੈ ਕਿ ਦੁਸ਼ਮਣ ਆਪਣੀਆਂ ਸ਼ਾਜਿਸ਼ਾਂ ਨੂੰ ਦਿਨ ਰਾਤ ਅਮਲੀ ਜਾਮਾ ਪਹਿਨਾਉਣ ਵਿੱਚ ਅਣਥੱਕ ਕੋਸ਼ਿਸ਼ਾਂ ਕਰ ਰਿਹਾ ਹੈ, ਇਸ ਕਾਰਨ ਅਗਰ ਕੌਮ ਅੱਜ ਵੀ ਨਾ ਜਾਗੀ ਤਾਂ ਆਉਣ ਵਾਲਾ ਸਮਾਂ ਹੋਰ ਵੀ ਭਿਆਨਕ ਹੋ ਸਕਦਾ ਹੈ ਅਤੇ ਸਿਂਟੇ ਗੰਭੀਰ।ਮਾਰਸ਼ਲ ਕੌਮ ਕੋਲ ਆਪਣੇ ਆਪ ਨਂੂੰ ਮਜਬੂਤ ਅਤੇ ਇੱਕਜੁੱਟ ਕਰੇ, ਇਕੱਤਰਤਾ ਵਿੱਚ ਹੀ ਕੌਮ ਦੇ ਸਿਰ ਖੜੇ ਇਹਨਾਂ ਗੰਭੀਰ ਮਸਲਿਆਂ ਦਾ ਹੱਲ ਹੈ, ਇਹੋ ਇਕ ਹਥਿਆਰ ਕੌਮ ਦੇ ਦੁਸ਼ਮਣਾਂ ਲਈ ਪ੍ਰਮਾਣੂ ਬੰਭ ਵਰਗਾ ਸਾਬਿਤ ਹੋ ਸਕਦਾ ਹੈ। ਇਕਜੁੱਟ ਹੋ ਧਰਮਯੁੱਦ ਮੋਰਚਾ, ਜਿਸ ਦੀ ਅਗਵਾਈ ਸੰਤ ਜਰਨੈਲ ਸਿੰਘ ਜੀ ਖਾਲਸਾ ਭਿੰਡਰਾਂਵਾਲਿਆਂ ਵਲੋਂ ਉਲੀਕੀ ਨੀਤੀ ਅੱਜ ਵੀ ਕਰ ਸਕਦੀ, ਅਰੰਭਣ ਦੀ ਸਖਤ ਜਰੂਰਤ ਹੈ, ਕੌਮ ਖੁਂਦ ਨੂੰ, ਆਪਣੀ ਪਹਿਚਾਣ ਨੂੰ, ਆਪਣੀ ਹੋਂਦ ਨੂੰ ਅਤੇ ਆਪਣੇ ਧਰਮ ਨੂੰ ਦੁਸ਼ਮਣ ਵਲੋਂ ਲਗਾਈ ਇਸ ਅੱਗ ਦੀ ਲਪੇਟ ਵਿੱਚ ਆਉਣ ਤੋਂ ਸਿਰਫ ਅਤੇ ਸਿਰਫ ਸਿੱਖੀ ਦੇ ਪਹਿਰੇਦਾਰ ਬਣ ਕੇ ਹੀ ਬਚਾ ਸਕਦੀ ਹੈ।ਸਿੱਖ ਕੌਮ ਦੀਆਂ ਵੰਡਾਂ ਪਾਉਣ ਚ ਰੁਝੀਆਂ ਹਿੰਦੁੂਵਾਦੀ ਪਾਰਟੀਆਂ ਦਿਨ ਰਾਤ ਸਿਰਫ ਇਹੋ ਜਿਹੇ ਹੀ ਮਨਸੂਬਿਆਂ ਨੂੰ ਘੜਣ ਵਿੱਚ ਲੱਗੀਆਂ ਹਨ ਅਤੇ ਇਹਨਾਂ ਨੂੰ ਅੰਜਾਮ ਤੱਕ ਲੈ ਜਾਣ ਲਈ ਸਾਡੇ ਹੀ ਭੁੱਲੇ ਅਤੇ ਭਟਕੇ ਆਪਣਿਆਂ ਦਾ ਸਹਾਰਾ ਲੈ ਰਹੀਆਂ ਹਨ, ਇਹਨਾਂ ਆਰ ਐਸ ਐਸ ਅਤੇ ਇਸ ਵਰਗੀਆਂ ਹੋਰ ਸਿੱਖੀ ਵਿਰੋਧੀ ਪਾਰਟੀਆਂ ਅਤੇ ਇਹਨਾਂ ਦੇ ਕਾਰਕੁੰਨਾਂ ਜਿੰਵੇ ਝੂਠੇ ਸੌਦਾ ਸਾਧ ਅਤੇ ਬੱਲ਼ਾਂ ਵਾਲਿਆਂ ਵਰਗਿਆਂ ਦੇ ਕਰਨਾਮੇ ਕੌਮ ਤੋਂ ਲੁਕੇ ਨਹੀ ਹਨ। ਕੌਮ ਇਹ ਵੀ ਭਲੀ ਭਾਂਤ ਜਾਣ ਲਵੇ ਕਿ ਬਾਹਰਲੇ ਮੁਲਕਾਂ ਤਕ ਆਪਣੀ ਸ਼ਾਜਿਸ਼ ਅਧੀਨ ਸਿੱਖਾਂ ਦੀ ਪਹਿਚਾਣ ਖੋਹਣ ਦੀਆਂ ਕੋਸ਼ਿਸ਼ਾਂ ਨੂੰ ਵੀ ਦੁਸ਼ਮਣ ਅੰਜਾਮ ਤੱਕ ਲੈਜਾਣ ਲਈ ਤਤਪਰ ਲਗਦਾ ਹੈ ਇਹੇ ਹੀ ਕਾਰਨ ਹੈ ਕਿ ਪੱਗ ਨਂੂੰ ਲੈ ਕਿ ਕੁਝ ਮੁਲਕ ਕਾਨੂੰਨ ਦਾ ਸਹਾਰਾ ਲੈ ਪਗੜੀ ਬੰਨਣ ਤੇ ਜੋ ਰੋਕ ਲਗਾ ਰਹੇ ਹਨ, ਇਹ ਭਾਰਤ ਸਰਕਾਰ ਦੇ ਦਿਮਾਗ ਦੀ ਹੀ ਕਾਢ ਹੈ। ਇਸ ਦਾ ਪਤਾ ਇਸ ਮੁਂਦੇ ਪ੍ਰਤੀ ਭਾਰਤ ਸਰਕਾਰ ਦੀ ਚੂੱਪ ਤੋ ਸ਼ਰੇਆਮ ਲਗਦਾ ਹੈ।ਕੌਮ ਨੂੰ ਜਥੇਬੰਦ ਹੋਣਾ ਹੀ ਪਵੇਗਾ, ਨਹੀਂ ਤਾਂ ਦੁਸ਼ਮਣ ਨੂੰ ਇਹੇ ਜਿਹੀਆਂ ਕੂੜ ਨੀਤੀਆਂ ਨੂੰ ਅੰਜਾਮ ਦਿੰਦਿਆਂ ਆਪਣੇ ਗੰਦੇ ਅਤੇ ਸਿਂਖੀ ਵਿਰੋਧੀ ਮਨਸੂਬਿਆਂ ਨੂੰ ਅਮਲੀ ਜਾਮਾ ਪਹਿਨਾਉਣ ਵਿੱਚ ਬਹੁਤੀ ਦੇਰ ਨਹੀ ਲੱਗਣੀ। ਇਹ ਵਿਚਾਰ ਸ਼੍ਰੋਮਣੀ ਅਕਾਲੀ ਦਲ (ਅ) ਯੂਥ ਵਿੰਗ ਜਰਮਨੀ ਦੇ ਮੈਂਬਰਾਂ ਪ੍ਰਧਾਨ ਭਾਈ ਭੁਪਿੰਦਰ ਸਿੰਘ, ਜਨਰਮ ਸਕੱਤਰ ਭਾਈ ਸੁੱਖਪ੍ਰੀਤ ਸਿੰਘ, ਭਾਈ ਗੁਰਮੀਤ ਸਿੰਘ, ਭਾਈ ਜਸਬੀਰ ਸਿੰਘ, ਭਾਈ ਬਲਜੀਤ ਸਿੰਘ, ਭਾਈ ਬਲਕਾਰ ਸਿੰਘ, ਭਾਈ ਦਿਲਬਰ ਸਿੰਘ, ਭਾਈ ਰਣਜੀਥ ਸਿੰਘ, ਭਾਈ ਮਨਦੀਪ ਸਿੰਘ ਗਿੱਲ ਅਤੇ ਭਾਈ ਰਾਜ ਸਿੰਘ ਨੇ ਆਪਣੀ ਹਫਤਾਵਾਰੀ ਹੋਈ ਮੀਟਿੰਗ ਦੌਰਾਨ ਜਾਹਿਰ ਕਰਦਿਆਂ ਸਿਂਖ ਨੌਜਵਾਨਾ ਨੂੰ ਜਾਗਰਿਤ ਹੋਣ ਦੀ ਅਪੀਲ ਕਰਦਿਆਂ ਕਿਹਾ ਕਿ ਕੌਮ ਦੇ ਭਲੇ ਚੰਗੇ ਦੀ ਸੌਚਣ ਦੀ ਜਿੰਮੇਵਾਰੀ ਆਪਣੇ ਮੋਢਿਆਂ ਤੇ ਚੁੱਕਣ ਲਈ ਕਮਰਕੱਸੇ ਕਰ ਲੈਣ।

ਚਿੱਲੀ 'ਚ ਅੱਜ ਭੁਚਾਲ ਦੇ 8.8 ਤੀਬਰਤਾ ਦੇਝਟਕੇ, 200 ਦੀ ਮੌਤ .

.27 ਫਰਵਰੀ -ਚਿੱਲੀ 'ਚ ਅੱਜ ਭੁਚਾਲ ਦੇ ਤਕੜੇ ਝਟਕੇ ਮਹਿਸੂਸ ਕੀਤੇ ਗਏ । ਰਿਕਟਰ ਪੈਮਾਨੇ 'ਤੇ ਇਨ੍ਹਾਂ ਝਟਕਿਆਂ ਦੀ ਤੀਬਰਤਾ 8.8 ਮਾਪੀ ਗਈ। ਭੁਚਾਲ ਤੋਂ ਬਾਅਦ ਪ੍ਰਸ਼ਾਂਤ ਮਹਾਸਾਗਰ ਵਿੱਚ ਸੁਨਾਮੀ ਦੀਆਂ 9 ਫੁੱਟ ਉਚੀਆਂ ਲਹਿਰਾਂ ਉਠਦੀਆਂ ਦੇਖੀਆਂ ਗਈਆਂ। ਪ੍ਰਾਪਤ ਸੂਚਨਾ ਅਨੁਸਾਰ ਹੁਣ ਤੱਕ 200 ਮੌਤਾਂ ਦੀ ਪੁਸ਼ਟੀ ਹੋ ਚੁੱਕੀ ਸੀ। ਇਹ ਭੁਚਾਲ ਹੈਤੀ 'ਚ ਆਏ ਭੁਚਾਲ ਤੋਂ 80 ਗੁਣਾ ਵੱਧ ਤਾਕਤਵਰ ਸੀ। ਅਮਰੀਕੀ ਭੂ-ਗਰਭ ਸਰਵੇਖਣ ਦੇ ਅਨੁਸਾਰ ਅੱਜ ਸਵੇਰੇ 3.34 ਮਿੰਟ 'ਤੇ ਆਏ ਇਸ ਭੁਚਾਲ ਨਾਲ ਇਮਾਰਤਾਂ ਹਿੱਲਣ ਲੱਗੀਆਂ। ਰਾਜਧਾਨੀ ਸੈਂਟੀਆਗੋ ਦੇ ਜ਼ਿਆਦਾਤਰ ਹਿੱਸੇ 'ਚ ਬਿਜਲੀ ਜਾਣ ਨਾਲ ਹਨੇਰਾ ਛਾ ਗਿਆ। ਭੁਚਾਲ ਦਾ ਕੇਂਦਰ ਕਾਨਸੈਪੀਸਾਨ ਤੋਂ 90 ਕਿਲੋਮੀਟਰ ਦੂਰ ਉਤਰ ਪੂਰਬ ਵਿੱਚ ਜ਼ਮੀਨ ਤੋਂ 55 ਕਿਲੋਮੀਟਰ ਹੇਠਾਂ ਸਥਿਤ ਸੀ। ਮੌਕੇ ਦੇ ਗਵਾਹਾਂ ਅਨੁਸਾਰ ਭੁਚਾਲ ਦੇ ਝਟਕੇ 10 ਤੋਂ 30 ਸੈਕਿੰਡ ਤੱਕ ਮਹਿਸੂਸ ਕੀਤੇ ਗਏ। ਇਸ ਦੌਰਾਨ ਪ੍ਰਸ਼ਾਂਤ ਸੁਨਾਮੀ ਚੇਤਾਵਨੀ ਕੇਂਦਰ ਨੇ ਚਿੱਲੀ ਅਤੇ ਪੇਰੂ ਲਈ ਸੁਨਾਮੀ ਦੀ ਚੇਤਾਵਨੀ ਜਾਰੀ ਕਰ ਦਿੱਤੀ ਹੈ। ਕੇਂਦਰ ਨੇ ਕਿਹਾ ਹੈ ਕਿ ਇੰਨੀ ਤੀਬਰਤਾ ਵਾਲੇ ਭੁਚਾਲ ਨਾਲ ਤਟਵਰਤੀ ਇਲਾਕਿਆਂ 'ਚ ਕੁਝ ਹੀ ਮਿੰਟਾਂ 'ਚ ਸੁਨਾਮੀ ਆ ਸਕਦੀ ਹੈ।

ਕਿਸਾਨ ਆਗੂ ਤਖਤਪੂਰਾ ਦੇ ਕਾਤਲਾਂ ਨੂੰ ਤੁਰੰਤ ਗ੍ਰਿਫਤਾਰ ਕੀਤਾ ਜਾਵੇ

ਮਾਛੀਵਾੜਾ 27 ਫਰਵਰੀ (ਸੁਸ਼ੀਲ ਸ਼ਰਮਾ) ਬਿਜਲੀ ਮੁਲਾਜਮਾਂ ਦੀ ਜੱਥੇਬੰਦੀ ਟੈਕਨੀਕਲ ਸਰਵਿਸ ਯੂਨੀਅਨ ਰਜਿ: ਸਬਡਵੀਜਨ ਮਾਛੀਵਾੜਾ ਸਬ ਯੂਨਿਟ ਕਮੇਟੀ ਦੀ ਹੰਗਾਮੀ ਮੀਟਿੰਗ ਪ੍ਰਧਾਨ ਖੜਕ ਸਿੰਘ ਦੀ ਪ੍ਰਧਾਨਗੀ ਹੇਠ ਹੋਈ । ਇਸ ਸਬੰਧੀ ਪ੍ਰੈਸ ਨੂੰ ਜਾਣਕਾਰੀ ਸਬਡਵੀਜਨ ਸਕੱਤਰ ਸਾਥੀ ਸਰੂਪ ਸਿੰਘ ਗੜੀ ਨੇ ਪ੍ਰੈਸ ਨੋਟ ਜਾਰੀ ਕਰਕੇ ਦਿੱਤੀ । ਜਿਸ ਵਿੱਚ ਭਾਰਤੀ ਕਿਸਾਨ ਯੂਨੀਅਨ (ਏਕਤਾ) ਦੇ ਸੂਬਾ ਆਗੂ ਸਾਧੂ ਸਿੰਘ ਤਖਤਪੂਰਾ ਦੀ ਗੁੰਡਾ ਅਨਸਰਾਂ ਵੱਲੋ ਸਿਆਸੀ ਤੇ ਪ੍ਰਸ਼ਾਸਨ ਦੀ ਸਹਿ ਤੇ ਕੀੱਤੇ ਘਿਨੌਣੇ ਕਤਲ ਦੀ ਜੋਰਦਾਰ ਨਿਖੇਧੀ ਕੀਤੀ ਗਈ। ਇਸ ਮੀਟਿੰਗ ਵਿੱਚ ਸ਼ਹੀਦ ਕਿਸਾਨ ਆਗੂ ਦੇ 28 ਫਰਵਰੀ ਦੇ ਸ਼ਰਧਾਂਜਲੀ ਸਮਾਗਮ ਵਿੱਚ ਸ਼ਮੂਲੀਅਤ ਕਰਨ ਦਾ ਫੈਸਲਾ ਕੀਤਾ ਅਤੇ ਮੰਗ ਕੀਤੀ ਕਿ ਕਿਸਾਨ ਆਗੂ ਦੇ ਕਾਤਲ ਨੂੰ ਤੁਰੰਤ ਗ੍ਰਿਫਤਾਰ ਕੀਤਾ ਜਾਵੇ ਅਤੇ ਸਖਤ ਸਜਾਵਾਂ ਦਿੱਤੀਆਂ ਜਾਣ

ਕਰਿਆਨਾ ਯੂਨੀਅਨ ਵੱਲੋ ਹੋਲੇ ਦੇ ਤਿਉਹਾਰ ਤੇ ਐਤਵਾਰ ਨੂੰ ਦੁਕਾਨਾ ਖ਼ੁਲਣਗੀਆ

ਮਾਛੀਵਾੜਾ 27 ਫਰਵਰੀ (ਸੁਸ਼ੀਲ ਸ਼ਰਮਾ) ਪਿਛਲੇ ਪੰਜ ਸਾਲਾ ਤੋ ਦਕਾਨਦਾਰਾ ਦੀ ਬਣੀ ਜੱਥੇਬੰਦੀ ਦੀ ਰਿਟੇਲ ਕਰਿਆਨਾ ਐਸੋਸੀਏਸਨ ਵੱਲੋ ਕੱਲ 28 ਫਰਬਰੀ ਐਤਵਾਰ ਨੂੰ ਹੋਲੀ ਤੇ ਹੋਲਾ ਮੱਹਲਾ ਦੇ ਤਿਉਹਾਰ ਨੂੰ ਦੇਖਦਿਆ ਦੁਕਾਨਾ ਖੁੱਲੀਆ ਰੱਖਣ ਦਾ ਫੈਸਲਾ ਕੀਤਾ ਹੈ। ਐਸੇ; ਦੇ ਪੰਜ ਸਾਲ ਪੂਰੇ ਹੋਣ ਦੀ ਖ਼ੁਸ਼ੀ ਵਿਚ ਜੱਥੇਬੰਦੀ ਦੇ ਲਗਾਤਾਰ ਪ੍ਰਧਾਨ ਬਣਦੇ ਆ ਰਹੇ ਸ਼ਤੀਸ ਸਿੰਗਲਾ ਨੇ ਦੱਸਿਆ ਕਿ ਸਾਡੇ ਸੰਸਥਾ ਨਾਲ ਕਰੀਬ 100 ਦੁਕਾਨਦਾਰ ਜੁੜੇ ਹੋਏ ਹਨ ਜੋ ਕਿ ਦੁਕਾਨਾ ਨਾਲ ਸਬੰਧਤ ਮਸਲੇ ਸਮੇ -ਸਮੇ ਤੇ ਵਿਚਾਰ ਲੈਦੇ ਹਨ। ਉਨ੍ਹਾ ਕਿਹਾ ਕਿ ਮਹੀਨੇ ਦੇ ਅਖੀਰਲੇ ਐਤਵਾਰ ਨੂੰ ਦੁਕਾਨਾ ਬੰਦ ਰੱਖੀਆ ਜਾਦੀਆ ਨੇ ਪਰ ਇਸ ਵਾਰ ਇੱਕਠੇ ਆਏ ਸਾਝੇ ਤਿਉਹਾਰ ਨੂੰ ਮੁੱਖ ਰੱਖਦਿਆ ਐਤਵਾਰ ਨੂੰ ਵੀ ਬਾਜ਼ਾਰ ਖੁੱਲਾ ਰੱਖਣ ਦਾ ਫੈਸਲਾ ਲਿਆ ਹੈ। ਸਿੰਗਲਾ ਨੇ ਕਿਹਾ ਅਸੀ ਮੀਟਿੰਗ ਵਿਚ ਇਹ ਵੀ ਫੈਸਲਾ ਲਿਆ ਹੈ ਕਿ ਸੰਸਥਾ ਦੇ ਖ਼ਰਚੇ ਤੇ ਜਲਦੀ ਹੀ ਮੈਬਰਾ ਨੂੰ ਪਰਿਵਾਰ ਸਮੇਤ ਤਿੰਨ ਦਿਨ ਲਈ ਕਿਸੇ ਚੰਗੀ ਸ਼ੈਲਾਨੀ ਜਗ੍ਹਾ ਤੇ ਸ਼ੈਰ ਕਰਵਾਈ ਜਾਵੇਗੀ ਕੁਝ ਮੈਬਰਾ ਤੋ ਮਿਲੀ ਜਾਣਕਾਰੀ ਅਨੁਸਾਰ ਆਪਣੇ ਕੰਮ ਦੇ ਪ੍ਰਤੀ ਚੰਗੀ ਕਾਰਗੁਜਾਰੀ ਰੱਖਣ ਵਾਲੇ ਇਸ ਸਾਲ ਫਿਰ ਸ਼ਤੀਸ ਸਿੰਗਲਾ ਹੀ ਸੰਸਥਾ ਦੇ ਪ੍ਰਧਾਨ ਬਣਨਗੇ।ਇਸ ਮੌਕੇ ਉਪ ਪ੍ਰਧਾਨ ਹਰੀਸ਼ ਕੁਮਾਰ,ਸਕੱਤਰ ਵਿਜੇ ਮਹਿੰਦਰੂ, ਸੰਜੇ ਜੈਨ,ਅਜੰਡਾ ਇੰਚਾਰਜ ਰੋਹੀਤ ਕੁਮਾਰ,ਜਿਮੀ ਜੈਨ,ਸੰਜੇ ਗਰਗ,ਅਸ਼ਵਨੀ ਕੁਮਾਰ,ਕਸਤੂਰੀ ਲਾਲ,ਬੰਟੀ ਗੋਇਲ, ਰਾਜੀਵ ਨਾਗਪਾਲ,ਕਾਲੂ ਮਿਤੱਲ,ਲਵਲੀ ਨਰੇਸ਼ ਖੇੜਾ,ਨਰੇਸ਼ ਕੁਮਾਰ,ਸੁਰਿੰਦਰ ਕੁਮਾਰ,ਰਾਜਨ ਗੁਪਤਾ, ਸਤਿਨਾਮ ਬਵੇਜਾ,ਚਿੰਟੂ ਸਿੰਗਲਾ, ਸੁਰਿੰਦਰ ਰਿੰਕੀ ਵੀ ਮੌਜੂਦ ਸਨ।